Maguire នឹងចូលរួមជាមួយ West Ham ក្នុងតម្លៃខ្លួន ៣០លានផោន

Maguire នឹងចូលរួមជាមួយ West Ham ក្នុងតម្លៃខ្លួន ៣០លានផោន

ក្លឹប West Ham United បានយល់ព្រមលើកិច្ចព្រមព្រៀងជាគោលការណ៍ជាមួយនឹងគូប្រជែងក្នុងក្របខ័ណ្ឌ Premier League គឺក្លិបបិសាចក្រហម Manchester United សម្រាប់ខ្សែការពារអង់គ្លេស Harry Maguire។ នេះបើយោងតាមសារព័ត៌មានធំៗបានរាយការណ៍ កាលពីថ្ងៃពុធ។

ទូរទស្សន៍ Sky Sports និង BBC បាននិយាយថា កិច្ចព្រមព្រៀងផ្ទេរ Harry Maguire មានតម្លៃប្រហែល ៣០លានផោន ឬស្មើនឹង ៣៨លានដុល្លារ ហើយលក្ខខណ្ឌផ្ទាល់ខ្លួន ត្រូវបានគេរំពឹងថា នឹងមិនមានបញ្ហានោះទេ។

ក្រុមរបស់លោក David Moyes កំពុងស្វែងរកការពង្រឹងក្រុមបន្ថែម បន្ទាប់ពីលក់ Declan Rice ទៅឱ្យ Arsenal ក្នុងកិច្ចព្រមព្រៀងតម្លៃ ១០៥ លានផោន ខណៈដែល Maguire នឹងសង្ឃឹមថា នឹងធ្វើឱ្យអាជីពរបស់គាត់រស់ឡើងវិញ បន្ទាប់ពីបានធ្លាក់ចុះយ៉ាងខ្លាំង ក្រោមការដឹកនាំរបស់ Erik ten Hag ។

លោក Erik ten Hag អ្នកចាត់ការទូទៅរបស់ក្រុម Manchester United កាលពីខែមុន បានដក Maguire ចេញពីតំណែងជាប្រធានក្រុម បន្ទាប់ពីកីឡាករវ័យ ៣០ឆ្នាំរូបនេះ លេងបានត្រឹមតែ ៨ ប្រកួតប៉ុណ្ណោះ នៅក្របខ័ណ្ឌ Premier League កាលពីរដូវកាលមុន  ដោយចំណាយពេលច្រើននៅលើកៅអីបម្រុង ឬរបួស ហើយ Lisandro Martinez, Raphael Varane និង Victor Lindelof ជាជម្រើសទីមួយ។

គួរបញ្ជាក់ថា Maguire បានក្លាយជាខ្សែការពារថ្លៃបំផុតរបស់ពិភពលោក នៅពេលដែល United បានចុះហត្ថលេខាលើរូបគេពីក្រុម Leicester City ក្នុងតម្លៃ ៨០លានផោន ក្នុងឆ្នាំ ២០១៩ ខណៈកិច្ចសន្យារបស់ Maguire ជាមួយ United នឹងផុតកំណត់នៅឆ្នាំ ២០២៥៕