វៀតណាម និងចិន បើកកិច្ចសន្ទនាយុទ្ធសាស្ត្រថ្នាក់រដ្ឋមន្ត្រី ៣+៣ ជាលើកដំបូង

វៀតណាម និងចិន បើកកិច្ចសន្ទនាយុទ្ធសាស្ត្រថ្នាក់រដ្ឋមន្ត្រី ៣+៣ ជាលើកដំបូង

ហាណូយ (VNA)៖ វៀតណាម និងចិន បានរៀបចំកិច្ចសន្ទនាយុទ្ធសាស្ត្រថ្នាក់រដ្ឋមន្ត្រីជាលើកដំបូង រវាងក្រសួងការបរទេស ក្រសួងការពារជាតិ និងក្រសួងសន្តិសុខសាធារណៈ ដែលត្រូវបានហៅថា “កិច្ចសន្ទនា ៣+៣” នៅទីក្រុងហាណូយ កាលពីថ្ងៃទី១៦ ខែមីនា។

កិច្ចប្រជុំនេះត្រូវបានដឹកនាំដោយសហប្រធានពីភាគីទាំងពីរ រួមមាន ភាគីវៀតណាម៖ លោក Le Hoai Trung រដ្ឋមន្ត្រីការបរទេស លោក Phan Van Giang រដ្ឋមន្ត្រីក្រសួងការពារជាតិ និងលោក Luong Tam Quang រដ្ឋមន្ត្រីក្រសួងសន្តិសុខសាធារណៈ; និងភាគីចិន៖ លោក Wang Yi រដ្ឋមន្ត្រីក្រសួងការបរទេស លោក Dong Jun រដ្ឋមន្ត្រីក្រសួងការពារជាតិ និងលោក Wang Xiaohong រដ្ឋមន្ត្រីក្រសួងសន្តិសុខសាធារណៈ។

រដ្ឋមន្ត្រីទាំងអស់បានបញ្ជាក់ពីសារៈសំខាន់នៃយន្តការកិច្ចសន្ទនា ៣+៣ ក្នុងការអនុវត្តការយល់ឃើញរួមកម្រិតខ្ពស់ និងលើកកម្ពស់តួនាទីរបស់ស្ថាប័នសំខាន់ៗ ក្នុងការជំរុញទំនាក់ទំនងវៀតណាម–ចិន ព្រមទាំងពង្រឹងកិច្ចសហប្រតិបត្តិការនៅវិស័យផ្សេងៗ ដើម្បីបង្កើនទំនុកចិត្តនយោបាយ និងរួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។

ភាគីទាំងពីរបានវាយតម្លៃថា ទំនាក់ទំនងទ្វេភាគីកំពុងរក្សាសន្ទុះវិជ្ជមាន ស្របតាមទិសដៅសំខាន់ៗទាំង៦ នៃកិច្ចសហប្រតិបត្តិការរវាងប្រទេសទាំងពីរ។

ក្នុងបរិបទដែលស្ថានការណ៍តំបន់ និងពិភពលោកកំពុងមានការប្រែប្រួលយ៉ាងឆាប់រហ័ស និងស្មុគស្មាញ ភាគីទាំងពីរបានឯកភាពថា ត្រូវពង្រឹងសាមគ្គីភាព បង្កើនទំនុកចិត្តនយោបាយ និងធានាការសម្របសម្រួលរវាងការអភិវឌ្ឍ និងសន្តិសុខ។ ពួកគេក៏បានបញ្ជាក់ពីការបន្តគោរពច្បាប់អន្តរជាតិ និងធម្មនុញ្ញអង្គការសហប្រជាជាតិ ក្នុងការដោះស្រាយបញ្ហាប្រឈមសកល។

ភាគីចិនបានសម្តែងការអបអរសាទរចំពោះសមិទ្ធផលអភិវឌ្ឍន៍របស់វៀតណាម ក្រោមការដឹកនាំរបស់គណៈកម្មាធិការមជ្ឈិមបក្សកុម្មុយនីស្តវៀតណាម ដែលមានលោក To Lam ជាអគ្គលេខាធិការ។ ពួកគេបានបង្ហាញជំនឿចិត្តលើទស្សនវិស័យអភិវឌ្ឍន៍របស់ប្រទេសទាំងពីរ និងបញ្ជាក់ពីការត្រៀមខ្លួនបន្តពង្រឹងកិច្ចសហប្រតិបត្តិការ រួមទាំងការផ្លាស់ប្តូរបទពិសោធន៍ក្នុងការកសាងបក្ស និងការគ្រប់គ្រងរដ្ឋ។

ភាគីវៀតណាមវិញ បានសម្តែងការអបអរសាទរចំពោះសមិទ្ធផលរបស់ចិន ក្រោមការដឹកនាំរបស់គណៈកម្មាធិការមជ្ឈិមបក្សកុម្មុយនីស្តចិន ដែលមានលោកប្រធានាធិបតី Xi Jinping ជាស្នូល។ វៀតណាមបានបញ្ជាក់ថា ការអភិវឌ្ឍទំនាក់ទំនងជាមួយចិន គឺជាគោលនយោបាយអាទិភាពកំពូល និងជាជម្រើសយុទ្ធសាស្ត្ររយៈពេលវែងក្នុងគោលនយោបាយការបរទេសរបស់ខ្លួន។

វៀតណាមក៏បានបញ្ជាក់ជាថ្មីពីការប្រកាន់ខ្ជាប់គោលនយោបាយ “ចិនតែមួយ” និងការត្រៀមចូលរួមយ៉ាងសមស្របក្នុងគំនិតផ្តួចផ្តើមសកលរបស់ចិន។

ភាគីវៀតណាមបានស្នើឱ្យបន្តពង្រឹងទំនុកចិត្តនយោបាយ អនុវត្តកិច្ចព្រមព្រៀងកម្រិតខ្ពស់ឱ្យមានប្រសិទ្ធភាព និងជំរុញការផ្លាស់ប្តូររវាងគណបក្ស និងរដ្ឋ។ ពួកគេក៏បានអំពាវនាវឱ្យពង្រឹងកិច្ចសហប្រតិបត្តិការនៅវិស័យដូចជា ការគ្រប់គ្រងព្រំដែន អន្តោប្រវេសន៍ និងការប្រយុទ្ធប្រឆាំងឧក្រិដ្ឋកម្ម ព្រមទាំងការចែករំលែកព័ត៌មានលើបញ្ហាសន្តិសុខសំខាន់ៗ។

ភាគីទាំងពីរបានឯកភាពបន្តសម្របសម្រួល និងគាំទ្រគ្នាទៅវិញទៅមក ក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ សកម្មភាពមនុស្សធម៌ និងវេទិកាកិច្ចសហប្រតិបត្តិការតំបន់ ដែលមានអាស៊ានជាមជ្ឈមណ្ឌល។

ជាមួយគ្នានេះ រដ្ឋមន្ត្រីបានសង្កត់ធ្ងន់លើសារៈសំខាន់នៃការគ្រប់គ្រង និងដោះស្រាយបញ្ហាដែនសមុទ្រឱ្យបានត្រឹមត្រូវ និងប្រកបដោយសន្តិវិធី ស្របតាមច្បាប់អន្តរជាតិ ដើម្បីរក្សាបរិយាកាសសន្តិភាព និងស្ថិរភាពសម្រាប់ការអភិវឌ្ឍរបស់ប្រទេសទាំងពីរ និងតំបន់៕