បុរសម្នាក់ ត្រូវបានពិន័យ ១០០ បាត ក្រោយពីជះទឹកត្រីដាក់លើរូបថតសម្ដេចតេជោ ហ៊ុន សែន

បុរសម្នាក់ ត្រូវបានពិន័យ ១០០ បាត ក្រោយពីជះទឹកត្រីដាក់លើរូបថតសម្ដេចតេជោ ហ៊ុន សែន

បាងកក៖ យោងតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃទី ៩ ខែកក្កដា ឆ្នាំ ២០២៥ ឱ្យដឹងថាអតីតគ្រូបង្វឹកកីឡាវាយកូនបាល់ លោក Thewa Sritawan វ័យ ៦៩ ឆ្នាំ ត្រូវបានពិន័យ ១០០ បាត បន្ទាប់ពីបានជះទឹកត្រីដាក់លើរូបថតរបស់ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន នៅខាងក្រៅស្ថានទូតកម្ពុជាក្នុងទីក្រុងបាងកក កាលពីថ្ងៃច័ន្ទ។

លោក Thewa ដែលបានដើរជើងទទេពីផ្ទះរបស់លោកនៅក្នុងខេត្តណុនថាបុរី (Nonthaburi) បានប្រាប់ប៉ូលិសថា លោកតវ៉ាចំពោះ “អាកប្បកិរិយាឈ្លានពាន” របស់សម្ដេចតេជោ ហ៊ុន សែន ទាក់ទងនឹងតំបន់ព្រំដែនដែលមានជម្លោះ។

លោកបានមកដល់ស្ថានទូតប្រហែលម៉ោង ១១ ព្រឹក បន្ទាប់ពីដើរអស់ប្រហែល ៥ ម៉ោង។ នៅទីនោះ លោកបានដាក់រូបថតសម្តេចតេជោ ហ៊ុន សែន នៅលើដី រួចជះទឹកត្រីដាក់តែម្ដង មុននឹងត្រូវបានប៉ូលិសឃាត់ខ្លួន។

ប៉ូលិសបាននិយាយថា លោក Thewa បានសម្តែងការមិនពេញចិត្តរបស់លោកចំពោះការទាមទារទឹកដីរបស់កម្ពុជា។ គេរាយការណ៍ថា លោកធ្លាប់បានដើរ ១០ ថ្ងៃទៅតំបន់ព្រំដែនដែលមានជម្លោះកាលពីមុន ដើម្បីគាំទ្រទាហានថៃនៅទីនោះ ហើយលោកខឹងសម្បានឹងអ្វីដែលលោកយល់ថាជាការអនុញ្ញាតរបស់អាជ្ញាធរថៃឲ្យទាហានកម្ពុជាល្បាតតំបន់ជម្លោះទាំងនោះ។

ស្ថានទូតកម្ពុជាបានបដិសេធមិនប្តឹងផ្តល់។ ផ្ទុយទៅវិញ ប៉ូលិសបានពិន័យលោក Thewa ១០០ បាត ពីបទចោលសម្រាមលើចិញ្ចើមផ្លូវ ដែលជាចំនួនអតិបរមាដែលលោកអាចមានលទ្ធភាពបង់ពីមូលនិធិដែលនៅសេសសល់របស់លោក។ នេះមិនមែនជាការតវ៉ាលើកទីមួយរបស់លោកទេ។ កាលពីខែកក្កដា ឆ្នាំ ២០២៣ លោកក៏ធ្លាប់បានជះទឹកត្រីដាក់ក្នុងការិយាល័យគណៈកម្មការរៀបចំការបោះឆ្នោត ដើម្បីបង្ហាញការមិនពេញចិត្តនឹងការអនុវត្តការងាររបស់ស្ថាប័ននោះផងដែរ។

បន្ទាប់ពីបង់ប្រាក់ពិន័យ លោកThewa បានដើរត្រឡប់ទៅផ្ទះវិញ ដោយបានសន្យាថានឹងបន្តការតវ៉ារបស់លោកប្រឆាំងនឹងអ្វីដែលលោកចាត់ទុកថាជាគោលនយោបាយឈ្លានពានរបស់កម្ពុជា ហើយបានគំរាមធ្វើសកម្មភាពស្រដៀងគ្នាប្រឆាំងនឹងទីភ្នាក់ងាររដ្ឋាភិបាលថៃណាមួយដែលលោកយល់ថាពុករលួយ៕