លោក 𝐏𝐞𝐩 𝐌𝐮ñ𝐨𝐳 នឹងចាកចេញពីតួនាទីជាគ្រូបង្វឹកព្រះខ័នរាជស្វាយរៀង នៅសប្ដាហ៍ក្រោយនេះ

លោក 𝐏𝐞𝐩 𝐌𝐮ñ𝐨𝐳 នឹងចាកចេញពីតួនាទីជាគ្រូបង្វឹកព្រះខ័នរាជស្វាយរៀង នៅសប្ដាហ៍ក្រោយនេះ

លោក 𝐏𝐞𝐩 𝐌𝐮ñ𝐨𝐳 គ្រូបង្វឹកដឹកនាំស្វាយរៀង ជោគជ័យបំផុត នឹងចាកចេញពីតួនាទីជាគ្រូបង្វឹកនៅចប់រដូវកាលនេះហើយ ខណៈការប្រកួតវគ្គផ្ដាច់ព្រ័ត្រ 𝐇𝐮𝐧 𝐒𝐞𝐧 𝐂𝐮𝐩 ទល់ភ្នំពេញក្រោន នៅចុងសប្ដាហ៍នេះ គឺជាការដឹកនាំក្រុមស្វាយរៀង ជាលើកចុងក្រោយរបស់លោកហើយ។

ខាងក្រោមនេះជាសេចក្តីថ្លែងការណ៍ របស់ក្លិបព្រះខ័នរាជស្វាយរៀង៖
«នៅចុងបញ្ចប់នៃរដូវកាលនេះ លោក Pep Muñoz នឹងចាកចេញពីតួនាទីជាគ្រូបង្វឹក ព្រះខ័នរាជស្វាយរៀង។ ក្រោមការដឹកនាំរបស់គាត់ ក្លិបបានសម្រេចនូវសមិទ្ធផលក្នុងព្រឹត្តិការណ៍សំខាន់ៗ និងទទួលបានភាពជោគជ័យដែលមិនធ្លាប់មានពីមុនមកក្នុងការប្រកួតទាំងក្នុង និងក្រៅប្រទេស។
គ្រប់គ្នានៅព្រះខ័នរាជស្វាយរៀង សូមថ្លែងអំណរគុណយ៉ាងស្មោះស្ម័គ្រចំពោះ Pep សម្រាប់ការចូលរួមដឹកនាំ រៀបចំដ៏បុិនប្រសប់របស់គាត់ ហើយយើងសូមជូនពរគាត់ឱ្យទទួលបានជោគជ័យក្នុងជំហ៊ានបន្ទាប់នៃអាជីពគ្រូបង្វឹករបស់គាត់។
ជំរាបជូនថា Pep នឹងទទួលបន្ទុកដឹកនាំការប្រកួតចុងក្រោយរបស់គាត់សម្រាប់ក្លិបក្នុងវគ្គផ្តាច់ព្រ័ត្រ ពានរង្វាន់ សម្តេចអគ្គមហាសេនាបតីតេជោ ហ៊ុន សែន នៅចុងសប្តាហ៍នេះ ដូច្នេះសូមគោរពអញ្ជើញបងប្អូនទាំងអស់គ្នា ចូលរួមទស្សនាអោយបានច្រើនកុះករ និងបង្ហាញក្តីស្រលាញ់រាប់អានរបស់យើងទាំងអស់គ្នាទៅកាន់ Pep»។

គួរបញ្ជាក់ថា រយៈពេល ២រដូវកាល ក្រោមការដឹកនាំរបស់លោក Pep Munoz ព្រះខ័នរាជស្វាយរៀង បានសម្រេចសមិទ្ធផលដ៏ភ្ញាក់ផ្អើល ដោយបានគ្រងជើងឯកលីគកំពូលកម្ពុជា ២រដូវកាលជាប់គ្នា សម្រាប់ឆ្នាំ២០២៣/២៤ និងឆ្នាំ២០២៤/២៥ ក៏ដូចជាការគ្រងជើងឯកពានសម្ដេចតេជោ ហ៊ុន សែន លើកទី១៧ ឆ្នាំ២០២៣/២៤ និងត្រៀមប្រកួតវគ្គផ្ដាច់ព្រ័ត្រ ដើម្បីការពារជើងឯក រដូវកាលឆ្នាំ២០២៤/២៥ ថែមទៀត។

អ្វីដែលធ្វើឲ្យអ្នកគាំទ្រ ចាំមិនភ្លេចនោះ គឺលោកបានដឹកនាំក្រុមលីគកំពូលកម្ពុជា មួយនេះ ឡើងវគ្គផ្ដាច់ព្រ័ត្រពានរង្វាន់ក្លិបបាល់ទាត់កម្រិតទី៣ ទ្វីបអាស៊ី AFC Challenge League 2024/25 តែសោកស្ដាយ បានត្រឹមជើងឯករង បន្ទាប់ពីចាញ់ក្រុម FK Arkadag របស់ប្រទេសតួកម៉េនីស្ថាន ២-១ ក្នុងវគ្គផ្ដាច់ព្រ័ត្រ៕