កាសែតព័រទុយហ្គាល់ និងហូឡង់ ភ្ញាក់ផ្អើលនៅពេលដែល Messi ជាប់ជាបេក្ខភាព The Best FIFA Men’s Player in 2024
កាសែតព័រទុយហ្គាល់ និងហូឡង់ ភ្ញាក់ផ្អើលនៅពេលដែល Messi ជាប់ជាបេក្ខភាព The Best FIFA Men’s Player in 2024
កាសែតព័រទុយហ្គាល់ និងហូឡង់ជាច្រើន មានការភ្ញាក់ផ្អើល និងមិនបានរំពឹងថា កីឡាករសញ្ជាតិអាហង្សទីន Lionel Messi នឹងជាប់ក្នុងបញ្ជីកីឡាករល្អបំផុតទាំង ១១នាក់សម្រាប់ប្រជែងពានរង្វាន់ The Best FIFA Men’s Player in 2024។
បេក្ខភាពសម្រាប់ប្រជែងពានរង្វាន់នេះ រួមមាន ៖ Dani Carvajal, Erling Haaland, Federico Valverde, Florian Wirtz, Jude Bellingham, Kylian Mbappe, Lamine Yamal, Rodri, Toni Kroos, Vinicius Junior និង Messi ដែលត្រូវបានជ្រើសរើសដោយគណៈកម្មាធិការជំនាញរបស់ FIFA ដោយផ្អែកលើការសម្តែងរបស់កីឡាករចាប់ពីថ្ងៃទី ២១ ខែសីហា ឆ្នាំ ២០២៣ ដល់ថ្ងៃទី ១០ ខែសីហា ឆ្នាំ ២០២៤។
កាសែតព័រទុយហ្គាល់ A Bola បានសរសេរថា៖ «បញ្ជីឈ្មោះបេក្ខជនរួមបញ្ចូលបេក្ខជនដែលត្រូវបានរំពឹងទុក ប៉ុន្តែក៏មានការភ្ញាក់ផ្អើលមួយចំនួនផងដែរ។ ទីមួយគឺ Messi ដែលបានឈ្នះ Copa America កាលពីរដូវកាលមុន ប៉ុន្តែមិនបានឈ្នះពានណាមួយជាមួយ Inter Miami »។
ជាមួយគ្នានេះ គេហទំព័រកីឡារបស់ប្រទេសហូឡង់ Voetbal International មានទស្សនៈស្រដៀងគ្នានេះ នៅពេលរាយការណ៍អំពីការតែងតាំងបេក្ខភាពទាំងនេះ។ កាសែតនេះ បានសរសេរថា ៖«Messi មិនត្រូវបានតែងតាំង សម្រាប់ Ballon d’Or 2024 ប៉ុន្តែត្រូវបានជ្រើសរើសសម្រាប់ The Best។ Messi បានឈ្នះពានរង្វាន់ Copa America 2024 ប៉ុន្តែ James Rodriguez ត្រូវបានគេដាក់ឈ្មោះថា ជាកីឡាករល្អបំផុតនៃការប្រកួត»។
ក្នុងចំណោមកីឡាករទាំង ១១នាក់ ដែលត្រូវបានតែងតាំងសម្រាប់ The Best មាន ៧ នាក់ ស្ថិតក្នុង Top 11 នៅក្នុងការប្រជែងពាន Ballon d’Or ។ Messi មិនស្ថិតក្នុង Top ៣០នោះទេ សម្រាប់ Ballon d’Or ខណៈដែល Valverde និង Florian Wirtz ស្ថិតនៅលេខ ១៧ និង ១២រៀងគ្នា។ កីឡាករបីនាក់ ដែលស្ថិតក្នុង Top 11 សម្រាប់ Ballon d’Or ដែលមិនត្រូវបាន FIFA ជ្រើសរើសនោះ មាន Lautaro Martinez, Harry Kane និង Phil Foden។
នៅក្នុងការណែនាំអំពីសមិទ្ធិផលរបស់កីឡាករ ដែលត្រូវបានតែងតាំងនៅលើគេហទំព័ររបស់ FIFA នោះ Messi មានព័ត៌មានតិចបំផុត គឺមានតែការឈ្នះ Copa America និងស្ថិតក្នុងក្រុមធម្មតាប៉ុណ្ណោះ។ កីឡាករដែលមានសមិទ្ធិផលច្រើនជាងគេយោងទៅតាមព័ត៌មានរបស់គេហទំព័រគឺ Wirtz ជាមួយនឹងជើងឯក Bundesliga ជាមួយ Bayer Leverkusen និងពានរង្វាន់ផ្ទាល់ខ្លួនជាច្រើន។
គួរបញ្ជាក់ថា The Best គឺផ្អែកលើការបោះឆ្នោតពីក្រុមចំនួនបួន រួមមានគ្រូបង្វឹក និងប្រធានក្រុមជម្រើសជាតិ អ្នកសារព័ត៌មានមកពីសហព័ន្ធសមាជិក និងអ្នកអានតាមអ៊ីនធឺណិត។ The Best ត្រូវបានប្រគល់ជូនតាំងពីឆ្នាំ ២០១៦ ហើយ Messi ជាប់កំណត់ត្រាឈ្នះពានរង្វាន់នេះ ៣ដងក្នុងឆ្នាំ 2019, 2022 និង 2023។ Cristiano Ronaldo និង Robert Lewandowski ឈ្នះម្នាក់ ២ដង ខណៈដែល Luka Modric បានឈ្នះពានរង្វាន់នេះម្តង។ ពិធីប្រកត់ពាននេះ ត្រូវបានគេរំពឹងថា នឹងប្រព្រឹត្តទៅនៅខែមករា ឆ្នាំ ២០២៥៕
