រកឃើញ ៦ក្រុម ឡើងទៅវគ្គ ៨ ក្រុមចុងក្រោយ ពានរង្វាន់ Hun Sen Cup ថ្នាក់ខេត្ត

រកឃើញ ៦ក្រុម ឡើងទៅវគ្គ ៨ ក្រុមចុងក្រោយ ពានរង្វាន់ Hun Sen Cup ថ្នាក់ខេត្ត

គិតត្រឹមថ្ងៃទី៧ ខែវិច្ឆិកា ឆ្នាំ២០២៤នេះ ការប្រកួតពានរង្វាន់សម្តេចអគ្គមហាសេនាបតី តេជោ ហ៊ុន សែន (Hun Sen Cup) ឆ្នាំ២០២៤-២៥ ជើងឯកថ្នាក់ខេត្តបានស្វែងរកឃើញក្រុមនៅតាមពូលមួយចំនួនឡើងទៅជុំបន្តរួចហើយ ខណៈបានរកឃើញក្រុមចំនួន៦ កក់កៅអីឡើងទៅវគ្គ៨ក្រុមចុងក្រោយ។

សម្រាប់ដែលកក់កៅអីឡើងទៅជុំបន្តតាមពូលនីមួយៗ មានដូចជា៖ មន្ទីរអប់រំយុវជននិងកីឡាខេត្តកំពង់ស្ពឺ, មិនទាន់ចប់ការប្រកួត, សមាគមបាល់ទាត់ខេត្តស្វាយរៀង, ក្លិបបាល់ទាត់ឈើតុំ ខេត្តពោធិ៍សាត់, ក្លិបបាល់ទាត់ឡាយអ៊ិនឃីង ខេត្តសៀមរាប, សមាគមកីឡាបាល់ទាត់ខេត្តកំពង់ធំ និងមន្ទីរអប់រំយុវជននិងកីឡាខេត្តត្បូងឃ្មុំ។

ក្នុងចំណោមពូលទាំងអស់នៅសល់តែពូល ខ មួយទេ ដែលនៅសល់ប្រកួតក្នុងដៃ ក្រៅពីនោះ បានបញ្ចប់ការប្រកួតតាមពូលអស់ហើយ ខណៈគូចុងក្រោយប្រចាំពូល ខ នោះក្រុមសមាគមបាល់ទាត់ខេត្តកែប ត្រូវជួបក្រុមតាកែវអែហ្វស៊ី នៅថ្ងៃទី១២ ខែវិច្ឆិកា ខាងមុខ វេលាម៉ោង៣:៣០នាទីរសៀល លើទីលានកីឡដ្ឋានខេត្តកែប។

សម្រាប់ពានរង្វាន់សម្តេចតេជោ ហ៊ុន សែន ថ្នាក់ខេត្ត ឆ្នាំ២០២៤-២៥នេះ មានក្រុមចូលរួមចំនួន២១ក្រុម ដោយបែងចែកជា៧ពូល ក្នុង១ពូលមាន៣ក្រុម។ ក្រុមឈរចំណាត់ថ្នាក់លេខ១ តាមពូល មានឈ្មោះ ឡើងទៅវគ្គ៨ក្រុមចុងក្រោយ ខណៈក្រុម១ក្រុមទៀត នឹងជ្រើសចេញពីក្រុមចំណាត់ថ្នាក់លេខ២ល្អ ក្នុងចំណោមពូលទាំង៧។ក្រុមខេត្តកំពង់ចាម គឺជាម្ចាស់ការពារដំណែងជើងឯកឆ្នាំនេះ៕