Manchester United ឡើងទៅកាន់វគ្គ១៦ក្រុមចុងក្រោយ Europa League ក្រោយទម្លាក់ Barcelona ក្រោមក្រសែភ្នែកអ្នកគាំទ្រជាង៧ម៉ីននាក់
Manchester United ឡើងទៅកាន់វគ្គ១៦ក្រុមចុងក្រោយ Europa League ក្រោយទម្លាក់ Barcelona ក្រោមក្រសែភ្នែកអ្នកគាំទ្រជាង៧ម៉ីននាក់
(បាល់ទាត់)៖ ក្រុមបិសាចក្រហម Manchester United បានឡើងទៅកាន់វគ្គ ១៦ក្រុមចុងក្រោយនៃក្របខ័ណ្ឌ Europa League ក្រោយយកឈ្នះក្រុមអ្នកមានបុណ្យ Barcelona ២-១ កាលពីយប់មិញ ក្រោមក្រសែភ្នែកអ្នកគាំទ្រ ៧៣,០២១នាក់ ហើយសរុបលទ្ធផលទាំងពីរជើង ៤ ទល់នឹង ៣ ។
ការប្រកួតយប់មិញនេះ ក្រុមភ្ញៀវ Barcelona បានបើកការនាំមុខដោយ Robert Lewandowski ដោយការស៊ុតបាល់ប៉េណាល់ទី នៅតង់ទីមួយ នាទី១៨។ លុះចូលដល់តង់ទីពីរ នាទី៤៧ ខ្សែបម្រើបិសាចក្រហម Fred បានស៊ុតគ្រាប់បាល់តាមស្មើ បន្ទាប់ពីការបញ្ជូលយ៉ាងល្អពី Bruno Fernandes ហើយនៅពាក់កណ្ដាលផ្លូវតង់ទី២ ពោលគឺនៅនាទី៧៣ ម្ចាស់ផ្ទះ បានស៊ុតគ្រាប់បាល់ជ័យជំនះ ដោយ Antony Santos ធ្វើឲ្យ Barcelona ត្រឡប់ទៅផ្ទះវិញទាំងទឹកភ្នែក។
ជម្នះ នៅ Old Trafford នេះ ធ្វើឲ្យ Manchester United បន្ថែម Barcelona ទៅក្នុងបញ្ជីរឈ្នះក្នុងរដូវកាលនេះ ដែលរួមមាន ហង្សក្រហម Liverpool, កាំភ្លើងធំ Arsenal, មាន់ខ្នាយមាស Tottenham និងមេឃខៀវ Manchester City។
ក្រោយទទួលបានជ័យជំនះលើ Barcelona លោក Ten Hag បាននិយាយថា ៖«ខ្ញុំគិតថា នេះគឺជាជំហានមួយទៀត ពីព្រោះនៅពេលដែលអ្នកអាចយកឈ្នះ Barcelona ដែលជាក្រុមល្អបំផុតមួយនៅក្នុងទ្វីបអឺរ៉ុប នាពេលនេះ នោះជំនឿរបស់អ្នកពិតជារឹងមាំ នោះអ្នកនឹងអាចយកឈ្នះក្រុមណាក៏បានដែរ»៕
