អ៊ីរ៉ង់៖ ការធ្វើឃាតមេដឹកនាំក្រុមហាម៉ាសមិនអាចធ្វើទៅរួចទេ បើគ្មានការគាំទ្រពីសហរដ្ឋអាមេរិក

អ៊ីរ៉ង់៖ ការធ្វើឃាតមេដឹកនាំក្រុមហាម៉ាសមិនអាចធ្វើទៅរួចទេ បើគ្មានការគាំទ្រពីសហរដ្ឋអាមេរិក

អ៊ីរ៉ង់៖ រដ្ឋមន្ត្រីការបរទេសចាំផ្ទះរបស់ប្រទេសអ៊ីរ៉ង់ លោក Ali Bagheri Kani បាននិយាយថា ការធ្វើឃាតប្រធានការិយាល័យនយោបាយរបស់ក្រុមហាម៉ាស់ លោក Ismail Haniyeh មិនអាចទៅរួចទេ បើគ្មានភ្លើងខៀវ និងការគាំទ្រពីសហរដ្ឋអាមេរិក។

លោក Ali Bagheri Kani បានធ្វើការកត់សម្គាល់បែបនេះ នៅក្នុងកិច្ចប្រជុំថ្នាក់រដ្ឋមន្ត្រីវិសាមញ្ញកាលពីថ្ងៃពុធនៃគណៈកម្មាធិការប្រតិបត្តិនៃអង្គការសហប្រតិបត្តិការឥស្លាមដែលបានធ្វើឡើងនៅទីក្រុង Jeddah ប្រទេសអារ៉ាប៊ីសាអូឌីត ដើម្បីពិភាក្សាអំពីការធ្វើឃាតលោក Haniyeh ក្នុងចំណោមរឿងជាច្រើនទៀត។ នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងការបរទេសរបស់ប្រទេសអ៊ីរ៉ង់។

នាឱកាសនោះលោក Bagheri Kani បានពណ៌នាការធ្វើឃាតមេដឹកនាំក្រុមហាម៉ាស់ថា ជាឧក្រិដ្ឋកម្មភេរវកររបស់ប្រទេសអ៊ីស្រាអែល។ លោក និយាយថាវាគឺជា «ការឈ្លានពាន ប្រឆាំងនឹងអធិបតេយ្យភាពជាតិ និងបូរណភាពទឹកដីរបស់ប្រទេសអ៊ីរ៉ង់»។

ជាមួយគ្នានោះ លោកបានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិ ដាក់បន្ទុកឱ្យប្រទេសអ៊ីស្រាអែលទទួលខុសត្រូវចំពោះការរំលោភបែបនេះ ហើយនាំអ្នកទទួលខុសត្រូវមកកាត់ទោស និងផ្តន្ទាទោស។
លោក Bagheri Kani បាននិយាយថាទំនួលខុសត្រូវរបស់សហរដ្ឋអាមេរិកក្នុងនាមជាអ្នកគាំទ្រដ៏សំខាន់របស់អ៊ីស្រាអែលមិនគួរត្រូវបានមើលរំលងនៅក្នុង «ឧក្រិដ្ឋកម្មដ៏សាហាវនេះ» ។ ករណីនេះ មិនអាចធ្វើទៅបានទេបើគ្មានភ្លើងខៀវ និងការគាំទ្រផ្នែកចារកម្មរបស់សហរដ្ឋអាមេរិក។

លោកបាននិយាយទៀតថា ក្នុងករណីដែលគ្មានសកម្មភាពសមស្របណាមួយដោយក្រុមប្រឹក្សាសន្តិសុខអង្គការសហប្រជាជាតិ ប្រទេសអ៊ីរ៉ង់គ្មានជម្រើសផ្សេងក្រៅពីប្រើ «សិទ្ធិដែលមានស្រាប់ក្នុងការការពារខ្លួនស្របច្បាប់ ដើម្បីប្រឈមមុខនឹងការឈ្លានពានរបស់អ៊ីស្រាអែល»។

លោក Bagheri Kani បានសង្កត់ធ្ងន់ថាសកម្មភាពបែបនេះរបស់អ៊ីរ៉ង់គឺចាំបាច់ដើម្បីការពារ ការឈ្លានពាន បន្ថែមទៀតរបស់អ៊ីស្រាអែលប្រឆាំងនឹងអធិបតេយ្យភាព ប្រជាជន និងទឹកដីរបស់អ៊ីរ៉ង់ ហើយនឹងត្រូវធ្វើឡើងនៅ «ពេលវេលាសមស្រប និងក្នុងទម្រង់សមាមាត្រណាមួយ» ។

លោក Haniyeh ដែលត្រូវបានអញ្ជើញឱ្យចូលរួមក្នុងពិធីស្បថចូលកាន់តំណែងប្រធានាធិបតីអ៊ីរ៉ង់ លោក Masoud Pezeshkian ត្រូវបានសម្លាប់រួមជាមួយអង្គរក្សរបស់លោកនៅព្រឹកព្រលឹមថ្ងៃទី ៣១ ខែកក្កដា នៅក្នុងទីក្រុង Tehran ។

ប្រទេស អ៊ីរ៉ង់បានចោទអ៊ីស្រាអែលថាបានធ្វើការវាយប្រហារនោះ ហើយបានសច្ចាថា «ធ្វើការឆ្លើយតបវិញ»៕