កាន់តែក្ដៅហើយ! សហព័ន្ធកីឡាប្រដាល់គុនខ្មែរ ពិន័យ លោក អេ ភូថង ភរិយា និងកូនស្រី មិនឲ្យចូលរួមប្រកួតគុនខ្មែរ ៦ខែ

កាន់តែក្ដៅហើយ! សហព័ន្ធកីឡាប្រដាល់គុនខ្មែរ ពិន័យ លោក អេ ភូថង ភរិយា និងកូនស្រី មិនឲ្យចូលរួមប្រកួតគុនខ្មែរ ៦ខែ

សហព័ន្ធកីឡាប្រដាល់គុនខ្មែរ កាលពីល្ងាចមិញនេះ បានសម្រេចដាក់ពិន័យ លោក អេ ភូថង រួមជាមួយភរិយា និងកូនស្រី មិនឱ្យចូលរួមក្នុងការប្រកួតកីឡាប្រដាល់គុនខ្មែររយៈពេល ៦ខែ បន្ទាប់ពីភាពចម្រូងចម្រាស់ និងការប្រើឥរិយាបថមិនសមរម្យលើសង្វៀន អំឡុងការប្រកួតដណ្តើមខ្សែក្រវាត់វគ្គផ្តាច់ព្រ័ត្រ រវាង ម៉ឺន មេឃា និង ចាន់ ប៊ុនហឿន នៅស្ថានីយទូរទស្សន៍ PNN កាលពីម្សិលមិញ។

មែនទែនទៅ ការសម្រេចដាក់វិន័យនេះ បានកើតឡើង បន្ទាប់ពីមានភាពចម្រូងចម្រាស់ ដោយមានករណីតវ៉ាលើសង្វៀន PNN ចំពោះការបញ្ឈប់របស់អាជ្ញាកណ្ដាល ក្នុងការប្រកួតរវាង ម៉ឺន មេឃា និង ចាន់ ប៊ុនហឿន នាជំនួបផ្តាច់ព្រ័ត្រដណ្តើមខ្សែក្រវាត់ នៅយប់ថ្ងៃទី២១ ខែកក្កដា។

ភាគីលោកគ្រូ អេ ភូថង មិនអស់ចិត្ត ឡើងមកសង្វៀន តវ៉ា និងមានការផ្សាយផ្ទាល់តាមហ្វេសប៊ុកជាដើម ដោយការតវ៉ាទាំងនោះ មិនបានឆ្លងកាត់ឧទរណ៍ ឬមានការប្ដឹងជាលាយលក្ខណ៍អក្សរឡើយ។ រូបភាពបែបនេះ បានបង្ហាញភាពអនាធិបតេយ្យ និងភាពគ្មានក្រមសីលធម៌ ក្នុងនាមជាអ្នកកីឡា និងនាំឲ្យមានការវែកញ៉ែកពេញបណ្ដាញសង្គម។មិនតែប៉ុណ្ណោះ កូនស្រីរបស់គ្រូ អេ ភូថង កីឡាការិនី អេ យ៉ានុត បាន Share លើបណ្ដាញសង្គមហ្វេសប៊ុក នូវពាក្យពេជ្រមិនសមរម្យថែមទៀតផង។

ក្រោយមានករណីនេះកើតឡើង នៅថ្ងៃទី២២ ខែកក្កដានេះ លោក ខូវ ឆាយ សហព័ន្ធកីឡាប្រដាល់គុនខ្មែរ បានបើកកិច្ចប្រជុំមួយ ជាមួយក្រុមមន្រ្តីសហព័ន្ធ រួចក៏សម្រេចដាក់វិន័យ លោក អេ ភូថង រួមជាមួយភរិយា លោក ស្រី សាំង សុម៉ាលី និងកូនស្រី អេ យ៉ានុត មិនឱ្យពាក់ព័ន្ធក្នុងសកម្មភាពគុនខ្មែរ ដែលរៀបចំដោយសហព័ន្ធរយៈពេល៦ខែ៕