លោក Biden សន្យាជំរុញកិច្ចសហប្រតិបត្តិការជាមួយ អេហ្ស៊ីប និងកាតា ដើម្បីអនុវត្តបទឈប់បាញ់អ៊ីស្រាអែល-ហាម៉ាស់
លោក Biden សន្យាជំរុញកិច្ចសហប្រតិបត្តិការជាមួយ អេហ្ស៊ីប និងកាតា ដើម្បីអនុវត្តបទឈប់បាញ់អ៊ីស្រាអែល-ហាម៉ាស់
បរទេស៖ សេតវិមានបាននិយាយកាលពីថ្ងៃចន្ទថា ប្រធានាធិបតីសហរដ្ឋអាមេរិក លោក Joe Biden បានសន្យាថានឹងធ្វើការជាមួយប្រទេសអេហ្ស៊ីប និងកាតា ដើម្បីធានាការអនុវត្តបទឈប់បាញ់ដែលបានស្នើឡើងរវាងអ៊ីស្រាអែល និងក្រុមហាម៉ាស។
នៅក្នុងការសន្ទនាតាមទូរស័ព្ទជាមួយប្រធានាធិបតីអេហ្ស៊ីប លោក Abdel Fattah el-Sissi និងកាតា លោក Emir Sheikh Tamim bin Hamad Al Thani លោក Biden បានជំរុញឱ្យមេដឹកនាំទាំងពីរនេះធ្វើអស់ពីសមត្ថភាពដើម្បីជំរុញឱ្យមានការដោះលែងចំណាប់ខ្មាំងដែលនៅតែត្រូវបានក្រុមហាម៉ាសនៅហ្គាហ្សាគ្រប់គ្រង។
សេចក្តីថ្លែងការណ៍របស់សេតវិមានបានពណ៌នាចំពោះការដោះលែងចំណាប់ខ្មាំងថា ជា “ឧបសគ្គតែមួយគត់ចំពោះបទឈប់បាញ់ និងការផ្តល់ជំនួយសង្គ្រោះបន្ទាន់សម្រាប់ប្រជាជននៅតំបន់ហ្គាហ្សា”។
សហរដ្ឋអាមេរិក អេហ្ស៊ីប និងកាតា បានចូលរួមក្នុងកិច្ចចរចាជាច្រើនខែ ដែលផ្តោតលើការសម្រេចបាននូវការបញ្ឈប់ការប្រយុទ្ធគ្នា។ សំណើដែលកំពុងពិចារណានាពេលនេះរួមមានបទឈប់បាញ់ដែលមានរយៈពេលប្រហែលប្រាំមួយសប្តាហ៍ ការដោះលែងចំណាប់ខ្មាំងដែលកាន់កាប់ដោយក្រុមហាម៉ាស ការដោះលែងអ្នកទោសប៉ាឡេស្ទីនដែលកាន់កាប់ដោយអ៊ីស្រាអែល និងការកើនឡើងនៃជំនួយមនុស្សធម៌សម្រាប់ជនស៊ីវិលប៉ាឡេស្ទីននៅតំបន់ហ្គាហ្សា។
មន្ត្រីក្រុមហាម៉ាស់បានជួបជាមួយតំណាងមកពីប្រទេសអេហ្ស៊ីប និងកាតានៅទីក្រុងគែរកាលពីថ្ងៃចន្ទ ដើម្បីពិភាក្សាអំពីសំណើនេះ។
កិច្ចពិភាក្សានេះធ្វើឡើងនៅពេលដែលរដ្ឋមន្ត្រីការបរទេសអាមេរិកលោក Antony Blinken កំពុងបំពេញទស្សនកិច្ចក្នុងតំបន់ ដើម្បីពិភាក្សាអំពីស្ថានភាពជាមួយមន្ត្រីនៅក្នុងប្រទេសអារ៉ាប៊ីសាអូឌីត ហ្ស៊កដានី និងអ៊ីស្រាអែល។
មន្ត្រីសុខាភិបាលប៉ាឡេស្ទីនបាននិយាយកាលពីថ្ងៃចន្ទថា ការវាយប្រហារតាមអាកាសជាបន្តបន្ទាប់របស់អ៊ីស្រាអែលពេញមួយយប់បានសម្លាប់មនុស្សយ៉ាងហោចណាស់ 22 នាក់នៅក្នុងទីក្រុង Rafah ភាគខាងត្បូងនៃ Gaza Strip ។
សាក្សី និងគ្រូពេទ្យបាននិយាយថា ការវាយប្រហារតាមអាកាសបានវាយប្រហារផ្ទះបីខ្នងក្នុងក្រុង Rafah។
តំបន់ដែលស្ថិតនៅតាមបណ្តោយព្រំដែនរវាងតំបន់ហ្គាហ្សា និងអេហ្ស៊ីប បច្ចុប្បន្នគឺជាកន្លែងសម្រាប់ប្រជាជនជាងពាក់កណ្តាលនៃប្រជាជនហ្គាហ្សា ខណៈដែលប្រជាជនស្វែងរកទីជំរកពីយុទ្ធនាការយោធារបស់អ៊ីស្រាអែល ក្នុងគោលបំណងលុបបំបាត់ក្រុមសកម្មប្រយុទ្ធហាម៉ាស។
យោធាអ៊ីស្រាអែលបាននិយាយកាលពីថ្ងៃចន្ទថា យន្តហោះចម្បាំងរបស់ខ្លួនបានធ្វើការវាយប្រហារប្រឆាំងនឹងពួកសកម្មប្រយុទ្ធ Hezbollah នៅភាគខាងត្បូងប្រទេសលីបង់។
ក្រុមហាម៉ាស់បានសម្លាប់មនុស្ស ១,២០០ នាក់នៅក្នុងការវាយប្រហារដំបូងក្នុងប្រទេសអ៊ីស្រាអែលកាលពីខែតុលាឆ្នាំមុន ហើយបានចាប់ចំណាប់ខ្មាំងប្រហែល ២៥០ នាក់ ។ នេះ បើយោងតាមចំនួនស្ថិតិសរុបរបស់អ៊ីស្រាអែល។
ការវាយលុកសងសឹកជាបន្តបន្ទាប់របស់អ៊ីស្រាអែលនៅហ្គាហ្សាបានសម្លាប់មនុស្សជាង ៣៤.៤០០នាក់ ប្រហែល ២ភាគ ៣ ពួកគេជាស្ត្រី និងកុមារ។ នេះបើយោងតាមក្រសួងសុខាភិបាលហ្គាហ្សា។
ក្រុមហាម៉ាស់ត្រូវបានគេជឿថានៅតែចាប់ចំណាប់ខ្មាំងប្រហែល ១០០ នាក់ រួមជាមួយនឹងចំណាប់ខ្មាំង ប្រមាណ៣០ នាក់ឬច្រើនជាងនេះដែលត្រូវបានសម្លាប់ឬក៏បានស្លាប់នៅក្នុងប៉ុន្មានខែបន្តបន្ទាប់ទៀត៕
