សហព័ន្ធកីឡាបាល់ទាត់កម្ពុជា កំពុងធ្វើការតស៊ូមតិជាមួយ FIFA ដើម្បីចុះឈ្មោះ Privat Mbarga លេងឲ្យក្រុមជម្រើសជាតិកម្ពុជា
សហព័ន្ធកីឡាបាល់ទាត់កម្ពុជា កំពុងធ្វើការតស៊ូមតិជាមួយ FIFA ដើម្បីចុះឈ្មោះ Privat Mbarga លេងឲ្យក្រុមជម្រើសជាតិកម្ពុជា
សហព័ន្ធកីឡាបាល់ទាត់កម្ពុជា នៅព្រឹកថ្ងៃ សុក្រ ទី១០ ខែវិច្ឆិកា ឆ្នាំ២០២៣នេះ បានបញ្ចេញព័ត៌មានអំពីក្រុមជម្រើសជាតិកម្ពុជា ពាក់ព័ន្ធនឹងការចុះឈ្មោះ Privat Mbarga លេងឲ្យក្រុមជម្រើសជាតិកម្ពុជា បន្ទាប់ពីព្រះមហាក្សត្រចេញព្រះរាជក្រឹត្យត្រាស់បង្គាប់ ផ្តល់សញ្ជាតិខ្មែរជាផ្លូវការដល់កីឡាករ កាមេរូន រូបនេះ។
ខាងក្រោមនេះ ជាសេចក្ដីប្រកាសព័ត៌មានរបស់សហព័ន្ធកីឡាបាល់ទាត់កម្ពុជា៖
តបតាមការស្នើសុំរបស់ផ្នែកបច្ចេកទេសនៃក្រុមជម្រើសជាតិកម្ពុជា ដែលឃើញពីភាពអំណោយផល និងសមត្ថភាពរបស់កីឡាករ Privat Mbarga ហើយក៏ដូចជាមានគោលជំហរក្នុងការតាំងចិត្តចង់ចូលសញ្ជាតិដើម្បីចូលរួមលេងអោយក្រុមជម្រើសជាតិកម្ពុជា ។ សហព័ន្ធកីឡាបាល់ទាត់កម្ពុជា បានដាក់សំណើទៅរាជរដ្ឋាភិបាលកម្ពុជា ហើយរាជរដ្ឋាភិបាលក៏បានចូលរួមគាំទ្រក្នុងការស្នើសុំព្រះមហាក្សត្រកម្ពុជា ក្នុងការចេញព្រះរាជក្រឹត្យត្រាស់បង្គាប់ ផ្តល់សញ្ជាតិខ្មែរជាផ្លូវការដល់កីឡាករ Privat Mbarga។
អំឡុងការកោះហៅកីឡាករបោះជុំរំហ្វឹកហាត់ត្រៀមលេងពានរង្វាន់បាល់ទាត់ FIFA World Cup 2026 Preliminary Joint Qualification វគ្គជម្រុះជុំទី១ កាលពីខែតុលាកន្លងទៅ នៅក្នុងការចុះឈ្មោះកីឡាករ FIFA ពុំបានបញ្ជាក់ច្បាស់លាស់អំពីលក្ខណៈបុគ្គលិករបស់កីឡាករ Privat Mbarga ដែលអាចលេងតំណាងអោយកម្ពុជាបាន។
នៅក្នុងការឆ្លើយតបទៅបញ្ហានេះ សហព័ន្ធកីឡាបាល់ទាត់កម្ពុជា បានជួលមេធាវីនៅប្រទេសស្វីស ដែលជាអ្នកឯកទេសក្នុងច្បាប់កីឡា បើកក្តីក្នុងការតស៊ូមតិទៅកាន់ FIFA ដើម្បីបញ្ជាក់នូវលក្ខណៈវិនិច្ឆ័យរបស់ Privat Mbarga ក្នុងការលេងអោយក្រុមជម្រើសជាតិកម្ពុជា ដែលបច្ចុប្បន្ន មេធាវីដែលសហព័ន្ធកីឡាបាល់ទាត់កម្ពុជា បានជួលអោយធ្វើការតស៊ូមតិជាមួយ FIFA កំពុងធ្វើការងារក្នុងករណីនេះ។ ពួកយើងនឹងធ្វើបច្ចុប្បន្នភាពបន្ថែមទៀតនៅពេលទទួលបានព័ត៌មានបន្ថែមអំពីករណីនេះ។
គួរបញ្ជាក់ថា Privat Mbarga មកដល់កម្ពុជាដំបូងក្នុងឆ្នាំ២០១៣ ក្នុងនាមជាកីឡាករបឹងកេត។ ជាបន្តបន្ទាប់ Privat បានផ្ទេរទៅក្លិបនានាដូចជា វេស្ទើនភ្នំពេញ, អង្គរថាយហ្គឺរ, ណាហ្កាវើលដ៍, អាស៊ីអឺរ៉ុបយូណាយធីត, ព្រះខ័នរាជស្វាយរៀង និងបច្ចុប្បន្នលេងឱ្យ Bali United នៅឥណ្ឌូនេស៊ី។ Privat Mbarga ទទួលបានសញ្ជាតិខ្មែរជាផ្លូវការ នៅព្រឹកថ្ងៃទី១១ ខែតុលា ឆ្នាំ២០២៣៕
