Ronaldo ៖ ការប្រកួតប្រជែងរបស់ខ្ញុំជាមួយ Messi បានផ្លាស់ប្តូរប្រវត្តិសាស្ត្របាល់ទាត់ ប៉ុន្តែពេលនេះវាបានបញ្ចប់ហើយ
![Ronaldo ៖ ការប្រកួតប្រជែងរបស់ខ្ញុំជាមួយ Messi បានផ្លាស់ប្តូរប្រវត្តិសាស្ត្របាល់ទាត់ ប៉ុន្តែពេលនេះវាបានបញ្ចប់ហើយ](https://ennasia.com/wp-content/uploads/2023/09/1Update-File-Thumbnail-For-Webside-final-06-07-2023-35.jpg)
ខ្សែប្រយុទ្ធរបស់ក្រុមបាល់ទាត់ Al Nassr និងក្រុមជម្រើសជាតិព័រទុយហ្គាល់ កីឡាករ Cristiano Ronaldo បាននិយាយថា ការប្រជែងរបស់គាត់ជាមួយ Lionel Messi បានបញ្ចប់ហើយ ដោយអ្នកទាំងពីរបានផ្លាស់ប្តូរប្រវត្តិសាស្រ្តបាល់ទាត់ រួចហើយ។
ជាការពិតណាស់ Ronaldo និង Messi បានគ្រប់គ្រងពិភពកីឡាបាល់ទាត់អស់រយៈពេលជាងមួយទសវត្សរ៍ ដោយបានឈ្នះពានរង្វាន់សរុបចំនួន ៧៩ និងជាកីឡាករតែពីរនាក់គត់ ដែលបានស៊ុតបញ្ចូលទីច្រើនជាង ៨០០គ្រាប់។
ពិភាក្សាអំពីការប្រកួតប្រជែងរបស់គាត់ជាមួយ Messi អំឡុងពេលបំពេញកាតព្វកិច្ចអន្តរជាតិជាមួយព័រទុយហ្គាល់ Ronaldo រីករាយក្នុងការផ្តោតលើសមិទ្ធផលរួមគ្នារបស់ពួកគេ ដោយនិយាយថា៖ «អ្នកដែលចូលចិត្ត Cristiano Ronaldo មិនចាំបាច់ស្អប់ Messi ទេ។ យើងធ្វើបានល្អ យើងបានផ្លាស់ប្តូរប្រវត្តិសាស្ត្របាល់ទាត់។ យើងត្រូវបានគេគោរពទូទាំងពិភពលោក នោះជារឿងសំខាន់បំផុត»។
អតីតកីឡាករ Manchester United រូបបនេះ បានបន្តថា ៖« Messi បានដើរតាមគន្លងរបស់គាត់ ហើយខ្ញុំបានដើរតាមផ្លូវរបស់ខ្ញុំ ដោយមិនគិតពីការលេងនៅក្រៅទ្វីបអឺរ៉ុប។ តាមអ្វីដែលខ្ញុំបានឃើញ គាត់ធ្វើបានល្អ ហើយខ្ញុំក៏ដូចគ្នាដែរ។ ពីមុនមក ខ្ញុំមិនដែលឃើញការប្រជែងគ្នាបែបនេះទេ ប៉ុន្តែពេលនេះ ការប្រជែងគ្នា បានចប់ទៅហើយ។ យើងរួមគ្នាលើវិស័យបាល់ទាត់ ១៥ឆ្នាំ ខ្ញុំមិននិយាយថា យើងជាមិត្តទេ ប៉ុន្តែយើងគោរពគ្នាទៅវិញទៅមក។ ការប្រកួតប្រជែងគឺល្អ អ្នកគាំទ្រចូលចិត្តវា»។
Ronaldo ទើបតែបានឈ្នះពានដំបូងរបស់គាត់ជាមួយក្រុម Al-Nassr សមាជិក Saudi Pro League ដែលជាក្លឹបដែលគាត់បានចូលរួមកាលពីខែមករា ពី Manchester United នៅពេលដែលគាត់បានលើកពាន Arab Club Champions Cup កាលពីខែមុន។ អតីតកីឡាករ Real Madrid រូបនេះ បានក្លាយជាកីឡាករតែម្នាក់គត់ ដែលស៊ុតបញ្ចូលទីបាន ៨៥០ គ្រាប់ ក្នុងជ័យជម្នះ ៥-១ កាលពីថ្ងៃសៅរ៍។
ចំណែក Messi ដែលជាម្ចាស់ជើងឯក World Cup បានចូលរួមជាមួយក្លឹប Inter Miami CF ក្នុងខែមិថុនា ក្នុងនាមជាភ្នាក់ងារឥតគិតថ្លៃ បន្ទាប់ពីពីររដូវកាលនៅ Paris Saint-Germain ។ ប្រធានក្រុមអាហ្សង់ទីនរូបនេះ ទើបតែឈ្នះពានរង្វាន់ទី ៤៤ របស់គាត់ បន្ទាប់ពីជួយ Inter Miami លើកពាន Leagues Cup 2023 កាលពីខែសីហា៕