ប្រជាសហគមន៍ក្នុងតំបន់ជីផាត បង្កើនការដាំដុះដំណាំហូបផ្លែជាច្រើនមុខដើម្បីលក់ជូនភ្ញៀវទេសចរ
ជីផាត ជាតំបន់ទេសចរណ៍ធម្មជាតិដ៏ពេញនិយមមួយដែលប្រមូលផ្ដុំទៅដោយធនធានធម្មជាតិជា ច្រើនប្រភេទ។ សហគមន៍អេកូទេសចរណ៍ជីផាតឯណោះវិញ បានកកើតឡើងតាំងពីឆ្នាំ ២០០៨ មកម្លេះ ប៉ុន្តែកាលណោះមិនសូវជាមានអ្នកស្គាល់ច្រើនទេ។
រហូតដល់រយៈពេលប្រមាណជាជិត ១០ឆ្នាំចុងក្រោយនេះ ដែលសន្ទុះនៃការដើរក្នុងស្រុកចាប់ផ្ដើម រីករាលដាល ទើបសហគមន៍មួយនេះចាប់ផ្ដើមស្គាល់ភាពល្បីល្បាញផងដែរ។ ដោយឡែក សហគមន៍អេកូទេសចរណ៍ជីផាត មានប្រជាជនជាសមាជិកប្រមាណជា ៦០០គ្រួសារ ក្នុងនោះក៏មានអ្នកដែលទទួលផលដោយផ្ទាល់ និងដោយប្រយោលពីវិស័យទេសចរណ៍។
អ្នកដែលបានទទួលផលដោយផ្ទាល់គឺជា អ្នកដែលបម្រើសេវាកម្មទេសចរណ៍ដូចជា ផ្ទះស្នាក់ សេវាកម្ម ម្ហូបអាហារ សេវាកម្មដឹកជញ្ជូនជាដើម។ រីឯអ្នកដែលទទួលផលដោយប្រយោល គឺក្រុមគ្រួសាររបស់ កសិករផ្សេងទៀត ដែលដាំដុះដំណាំហូបផ្លែទុកលក់ជូនភ្ញៀវទេសចរ។
ដោយសារតែដីនៅក្នុងតំបន់ជីផាតមានអំណោយផលផង ការដាំដុះផ្សេងៗរបស់ប្រជាពលរដ្ឋក៏មិនមាន អ្វីជាឧបសគ្គនោះដែរ។ ផ្ទុយទៅវិញ វាបានក្លាយទៅជាទម្លាប់មួយដែលអ្នកទេសចរតម្រង់ទៅរកបន្លែ ផ្លែឈើ ដែលដាំដុះលើដីចំការ ដើម្បីទិញយកភ្លាមៗតែម្ដង។
បើតាមប្រធានសហគមន៍អេកូទេសចរណ៍ជីផាត បន្លែ បង្កា ដំណាំហូបផ្លែនៅក្នុងតំបន់ជីផាត បានក្លាយជាផ្នែកមួយដែលទាក់ទាញទេសចរផងដែរ ព្រោះភាគច្រើនលោកតែងតែលឺពីការកោតសរសើរ លើរសជាតិរបស់បន្លែ ផ្លែឈើស្រស់ៗទាំងនោះ។
លោក អ៊ន សុវណ្ណ ដែលជាប្រធានសហគមន៍បានបន្តឲ្យដឹងអំពីការដាំដុះរបស់ប្រជាកសិករនារដូវវស្សា ឆ្នាំនេះថា៖ « សម្រាប់ប្រជាកសិករ បច្ចុប្បន្ននេះឃើញថាពួកគាត់កាក់កបគ្រាន់បើ ឥឡូវនេះមានធូរេន សាវម៉ាវ មង្ឃុត ផ្លែបឺរ ចំណែកឯផ្លែឈើក្នុងព្រៃដូចជាភ្ញៀវអីហ្នឹង គឺកសិករយើងកំពុងតែប្រមូលទិន្នផលលក់ជូនភ្ញៀវទេសចរមកលេងផ្ទាល់ និងមានកសិករខ្លះមានទាំងម៉ូយមកទិញទៀតផង និយាយរួមកសិផលក្នុងសហគមន៍មានការកើនឡើង ហើយតម្រូវការទីផ្សារក៏ល្អផងដែរ។»
សម្រាប់ឆ្នាំនេះដែរ លោកបានកត់សម្គាល់ឃើញប្រជាកសិករចាប់ផ្ដើមដាក់ដាំបន្លែបង្ការចម្រុះបន្ថែមទៀតដូចជា ពោត សណ្ដែក ត្រសក់ ស្ពៃ បន្លែ ជាពិសេសស្រូវ និងដំណាំតាមរដូវកាលមួយចំនួនទៀត។ ហើយដែលការបង្កើនការដាំដុះទាំងនោះគឺដើម្បីផ្គត់ផ្គង់ជូនភ្ញៀវទេសចរមួយផ្នែកធំ។
យ៉ាងណាមិញ លោក អ៊ន សុវណ្ណ បានឲ្យដឹងពីចំនួនភ្ញៀវដែលចូលទៅទស្សនាសហគមន៍របស់លោក ថា៖ «ទាក់ទងជាមួយភ្ញៀវទេសចរណ៍ដែលមកទស្សនាតំបន់អេកូទេសចរណ៍ជីផាតរបស់យើងមានចំនួនតិចជាងមុន បានន័យថាបើរដូវប្រាំងគឺគ្រាន់បើ ចន្លោះខែ ១-២ ភ្ញៀវទេសចរណ៍បុកមកលេងខ្លាំង ទាំងភ្ញៀវបរទេស និងភ្ញៀវជាតិ ម្យ៉ាងទៀតអាចនិយាយបានថា នៅសហគមន៍យើងនេះខែវស្សាគឺយើងពិបាកក្នុងការធ្វើដំណើរទៅតាមគោលដៅកន្លែងកម្សាន្តផ្សេងៗ។»
បើទោះជាមានបញ្ហាក្នុងការធ្វើដំណើរយ៉ាងណាក្ដី ជាមធ្យមក្នុងមួយខែសហគមន៍ជីផាតនៅតែអាចទទួលភ្ញៀវទេសចរ ចន្លោះពី ១៥០នាក់ ទៅ២០០នាក់។ ហើយដើម្បីសម្រួលការធ្វើដំណើររបស់ភ្ញៀវ សហគមន៍ក៏បានត្រួសត្រាយផ្លូវរួចរាល់ហើយសម្រាប់ឆ្នាំ២០២៣នេះ ដែលមានន័យថាទោះបីរដូវវស្សាក្តីបើទេសចរចង់ទៅលេងកម្សាន្ដគឺអាចទៅបាន ជាពិសេសទៅភ្លក់ផ្លែឈើជាច្រើនមុខដែលប្រជាកសិករ កំពុងដាំដុះ។
ដោយឡែក ដើម្បីផ្ដល់សេវាកម្មដ៏ល្អជូនភ្ញៀវទាំងក្នុងស្រុក និងអន្តរជាតិ៖ «យើងត្រៀមដូចជាសម្ភារជួល យើងនៅតែត្រៀមសម្រាប់ខែវស្សានេះ សេវាកម្មស្នាក់នៅរបស់យើងក៏មានការពង្រឹងបញ្ហាសុវត្ថិភាព បន្ទប់ស្នាក់ ហើយសម្រាប់សហគមន៍ផ្ទាល់ក៏ពង្រឹងនូវសមត្ថភាពសហគមន៍បន្ថែមដូចជា មគ្គុទ្ទេសក៍ទេសចរ ចុងភៅ ហើយយើងក៏មានត្រៀមនូវសម្ភារៈសម្រាប់ផ្សងព្រេងដូចជា កង់ឡើងភ្នំ កាយ៉ាក និងទូកជាដើម»៕