លោក ត្រាំ ព្រមានអ៊ីរ៉ង់ថា នឹងរងការទម្លាក់គ្រាប់បែកកាន់តែខ្លាំង ប្រសិនបើមិនយល់ព្រមលើកិច្ចព្រមព្រៀងសន្តិភាព

លោក ត្រាំ ព្រមានអ៊ីរ៉ង់ថា នឹងរងការទម្លាក់គ្រាប់បែកកាន់តែខ្លាំង ប្រសិនបើមិនយល់ព្រមលើកិច្ចព្រមព្រៀងសន្តិភាព

វ៉ាស៊ីនតោន៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃពុធថា អ៊ីរ៉ង់នឹងរងការទម្លាក់គ្រាប់បែកក្នុងកម្រិតធ្ងន់ធ្ងរជាងមុន ប្រសិនបើមិនយល់ព្រមលើកិច្ចព្រមព្រៀងសន្តិភាព។

ការព្រមាននេះបានបង្កើនភាពតានតឹងបន្ថែមទៀត ខណៈសារព័ត៌មានជាច្រើនរាយការណ៍ថា ទីក្រុងវ៉ាស៊ីនតោន និងទីក្រុងតេហេរ៉ង់ កំពុងខិតជិតឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម។

ក្នុងសារបង្ហោះលើបណ្ដាញសង្គម Truth Social លោក ត្រាំ បាននិយាយថា ប្រតិបត្តិការយោធារបស់សហរដ្ឋអាមេរិក ដែលមានឈ្មោះថា “Operation Epic Fury” អាចនឹងបញ្ចប់ ប្រសិនបើអ៊ីរ៉ង់អនុវត្តតាមអ្វីដែលបានព្រមព្រៀងគ្នា ទោះបីជាលោកបានទទួលស្គាល់ថា នោះអាចជាការរំពឹងទុកដ៏ធំមួយក៏ដោយ។

លោកបានបន្ថែមថា ប្រសិនបើមានកិច្ចព្រមព្រៀង ការរារាំងរបស់កងទ័ពជើងទឹកអាមេរិកលើកំពង់ផែអ៊ីរ៉ង់នៅឈូងសមុទ្រអូម៉ង់ នឹងត្រូវបញ្ចប់ ហើយច្រកសមុទ្រ Hormuz នឹងបើកឱ្យប្រើប្រាស់សម្រាប់គ្រប់ប្រទេស រួមទាំងអ៊ីរ៉ង់ផងដែរ។
ប៉ុន្តែលោក ត្រាំ បានព្រមានថា ប្រសិនបើអ៊ីរ៉ង់មិនយល់ព្រមលើកិច្ចព្រមព្រៀងទេ ការទម្លាក់គ្រាប់បែកនឹងចាប់ផ្តើម ហើយមានកម្រិត និងអាំងតង់ស៊ីតេខ្ពស់ជាងមុន។

ការលើកឡើងរបស់លោក ត្រាំ បានធ្វើឡើងបន្ទាប់ពីសារព័ត៌មាន Axios រាយការណ៍ថា សហរដ្ឋអាមេរិក និងអ៊ីរ៉ង់ កំពុងខិតជិតសម្រេចបានអនុស្សរណៈនៃការយោគយល់គ្នា ដែលមាន ១៤ ចំណុច សម្រាប់បញ្ចប់សង្គ្រាម និងបង្កើតក្របខ័ណ្ឌសម្រាប់ការចរចាបន្ថែម។

Axios ក៏បានរាយការណ៍ផងដែរថា ទីក្រុងវ៉ាស៊ីនតោន កំពុងរង់ចាំការឆ្លើយតបពីទីក្រុងតេហេរ៉ង់ លើចំណុចសំខាន់ៗ ក្នុងរយៈពេល ៤៨ ម៉ោងខាងមុខ។

ក្រោយព័ត៌មាននេះត្រូវបានផ្សព្វផ្សាយ សន្ទស្សន៍ភាគហ៊ុនបានកើនឡើង ខណៈតម្លៃប្រេងបានធ្លាក់ចុះ ដែលបង្ហាញពីក្តីសង្ឃឹមថា សង្គ្រាមដែលអូសបន្លាយអស់រយៈពេលជាងពីរខែ អាចឈានទៅរកការបញ្ចប់ក្នុងពេលឆាប់ៗ។

ទោះជាយ៉ាងណា លោក ត្រាំ បានប្រាប់កាសែត The New York Post ថា វានៅតែលឿនពេកក្នុងការពិចារណាចាប់ផ្តើមកិច្ចចរចាសន្តិភាពដោយផ្ទាល់ជុំថ្មីមួយជាមួយអ៊ីរ៉ង់។

លោកក៏បានប្រាប់ទូរទស្សន៍ PBS News ថា សង្គ្រាមនេះមាន “ឱកាសល្អ” ក្នុងការបញ្ចប់ ប៉ុន្តែប្រសិនបើវាមិនបញ្ចប់ទេ សហរដ្ឋអាមេរិកនឹងបន្តការវាយប្រហារតាមផ្លូវអាកាស។

ក្នុងព្រឹត្តិការណ៍មួយដែលប្រារព្ធទិវាអ្នកម្តាយជាមួយគ្រួសារយោធា លោក ត្រាំ បាននិយាយថា អ៊ីរ៉ង់ហាក់បង្ហាញបំណងចង់ឈានដល់កិច្ចព្រមព្រៀងមួយដើម្បីបញ្ចប់សង្គ្រាម។
លោកបានថ្លែងថា៖“យើងកំពុងដោះស្រាយជាមួយមនុស្សដែលចង់ធ្វើកិច្ចព្រមព្រៀងយ៉ាងខ្លាំង ហើយយើងនឹងឃើញថា តើពួកគេអាចធ្វើកិច្ចព្រមព្រៀងដែលពេញចិត្តយើងបានឬអត់”។

ក្រោយមក នៅក្នុងការិយាល័យ Oval Office លោក ត្រាំ បាននិយាយថា ប្រធានក្រុមហ៊ុនប្រេងធំៗ រួមមាន Exxon Mobil និង Chevron បានជួបជាមួយលោកនៅសេតវិមានកាលពីយប់ថ្ងៃអង្គារ។
លោកបានបញ្ជាក់ថា ក្រុមហ៊ុនទាំងនោះបានពិភាក្សាអំពីប្រទេសវេណេស៊ុយអេឡា ដែលជាប្រទេសផលិតប្រេងដ៏សំខាន់មួយនៅអាមេរិកខាងត្បូង។ ទោះជាយ៉ាងណា លោកមិនបានបញ្ជាក់ថា មានការពិភាក្សាអំពីអ៊ីរ៉ង់ ឬច្រកសមុទ្រ Hormuz ដែរឬទេ។

ច្រកសមុទ្រ Hormuz គឺជាផ្លូវដឹកជញ្ជូនប្រេងដ៏សំខាន់មួយរបស់ពិភពលោក ហើយការបិទច្រកនេះក្នុងអំឡុងពេលសង្គ្រាម បានបង្កវិបត្តិផ្គត់ផ្គង់ថាមពលសកល។

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បាននិយាយថា ទីក្រុងតេហេរ៉ង់នៅតែកំពុងពិនិត្យសំណើរបស់អាមេរិក ហើយនឹងផ្តល់ការឆ្លើយតបតាមរយៈអ្នកសម្រុះសម្រួលនៅប្រទេសប៉ាគីស្ថាន។

នៅក្នុងសារបង្ហោះលើបណ្ដាញ X លោក Baqaei បានដកស្រង់សេចក្តីសម្រេចរបស់តុលាការយុត្តិធម៌អន្តរជាតិ (ICJ) ដោយបញ្ជាក់ថា ការចរចាពិតប្រាកដ ត្រូវតែផ្អែកលើ “ជំនឿជាក់លាក់” និងមិនអាចប្រើជាឧបករណ៍សម្រាប់ការគាបសង្កត់ ឬការបោកបញ្ឆោតឡើយ។

រដ្ឋមន្ត្រីការបរទេសអ៊ីរ៉ង់ លោក Abbas Araghchi ដែលបានជួបជាមួយរដ្ឋមន្ត្រីការបរទេសចិន លោក Wang Yi កាលពីថ្ងៃពុធ បាននិយាយថា អ៊ីរ៉ង់ និងចិន បានបញ្ជាក់ជាថ្មីពីសារៈសំខាន់នៃអធិបតេយ្យភាព និងសេចក្តីថ្លៃថ្នូរជាតិរបស់អ៊ីរ៉ង់។
លោក Araghchi ក៏បានបញ្ជាក់លើបណ្ដាញ X ថា អ៊ីរ៉ង់ជឿជាក់លើចិន និងទន្ទឹងរង់ចាំពង្រឹងភាពជាដៃគូយុទ្ធសាស្ត្ររវាងប្រទេសទាំងពីរ។

មុនការប្រកាសរបស់លោក ត្រាំ មន្ត្រីរដ្ឋាភិបាលប៉ាគីស្ថានម្នាក់បានប្រាប់សារព័ត៌មាន MS NOW ថា លទ្ធភាពនៃកិច្ចព្រមព្រៀងបញ្ចប់សង្គ្រាម អាចនឹងកើតមានក្នុងរយៈពេលប៉ុន្មានថ្ងៃខាងមុខ។

យោងតាម Axios អនុស្សរណៈនៃការយោគយល់គ្នាដែលកំពុងត្រូវពិចារណា រួមមានការប្តេជ្ញារបស់អ៊ីរ៉ង់ក្នុងការផ្អាកសកម្មភាពចម្រាញ់នុយក្លេអ៊ែរ ការដកទណ្ឌកម្មរបស់សហរដ្ឋអាមេរិក និងការបន្ធូរបន្ថយការគ្រប់គ្រងលើការដឹកជញ្ជូនតាមច្រកសមុទ្រ Hormuz។ លក្ខខណ្ឌជាច្រើននៅក្នុងកិច្ចព្រមព្រៀងនេះ ត្រូវបានរាយការណ៍ថា នៅអាស្រ័យលើការចរចាចុងក្រោយរវាងភាគីទាំងពីរ។

គួរបញ្ជាក់ថា បទឈប់បាញ់រវាងសហរដ្ឋអាមេរិក និងអ៊ីរ៉ង់ បានចាប់ផ្តើមតាំងពីថ្ងៃទី៧ ខែមេសា ដើម្បីបើកផ្លូវសម្រាប់ការចរចា ប៉ុន្តែស្ថានភាពនៅតែមានភាពផុយស្រួយ។
កាលពីដើមសប្តាហ៍នេះ អ៊ីរ៉ង់បានវាយប្រហារលើកងកម្លាំងអាមេរិក ដែលកំពុងជួយនាវាពាណិជ្ជកម្មឆ្លងកាត់ច្រកសមុទ្រ Hormuz ហើយក៏បានបើកការវាយប្រហារថ្មីលើអេមីរ៉ាតអារ៉ាប់រួមផងដែរ។
ជាការឆ្លើយតប សហរដ្ឋអាមេរិកបានអះអាងថា ខ្លួនបានបំផ្លាញទូកតូចៗរបស់អ៊ីរ៉ង់ចំនួន ៦ គ្រឿង ដែលព្យាយាមរំខានដល់នាវាពាណិជ្ជកម្មក្នុងផ្លូវទឹកនេះ។

ទីបញ្ជាការកណ្ដាលសហរដ្ឋអាមេរិក (CENTCOM) ក៏បាននិយាយថា ខ្លួនបានរារាំងនាវាដឹកប្រេងគ្មានទង់ជាតិមួយ ដែលកំពុងធ្វើដំណើរទៅកាន់កំពង់ផែអ៊ីរ៉ង់ ដោយចោទថា បានរំលោភលើវិធានការបិទផ្លូវរបស់សហរដ្ឋអាមេរិក។

សុទិដ្ឋិនិយមចំពោះការបញ្ចប់ជម្លោះ បានកើនឡើងកាលពីថ្ងៃអង្គារ បន្ទាប់ពីលោក ត្រាំ ប្រកាសផ្អាក “Project Freedom” ដែលជាប្រតិបត្តិការរបស់យោធាអាមេរិកក្នុងការនាំនាវាចេញពីច្រកសមុទ្រ Hormuz ដើម្បីរង់ចាំមើលថា តើកិច្ចព្រមព្រៀងសន្តិភាពអាចសម្រេចបានឬអត់។

ក្នុងសារបង្ហោះលើ Truth Social កាលពីយប់ថ្ងៃអង្គារ លោក ត្រាំ បានបញ្ជាក់ថា “វឌ្ឍនភាពដ៏អស្ចារ្យ” កំពុងត្រូវបានធ្វើឡើងឆ្ពោះទៅរកកិច្ចព្រមព្រៀងពេញលេញ និងមានស្ថេរភាពជាមួយអ៊ីរ៉ង់៕