លោក Trump ៖ មេដឹកនាំអ៊ីរ៉ង់ថ្មីដែលមិនមានការយល់ព្រមពីទីក្រុងវ៉ាស៊ីនតោន នឹងមិនអាចកាន់តំណែងបានយូរឡើង

ដោយ៖ Chhan Sreyka | 6 ម៉ោងមុន ព័ត៌មានអន្តរជាតិ

វ៉ាស៊ីនតោន៖ ប្រធានាធិបតីសហរដ្ឋអាមេរិក លោក Donald Trump បានអះអាងជាថ្មីថា សហរដ្ឋអាមេរិកនឹងមានឥទ្ធិពលលើការជ្រើសរើសមេដឹកនាំកំពូលរបស់អ៊ីរ៉ង់។ លោកបាននិយាយថា បុគ្គលណាដែលត្រូវបានជ្រើសរើសសម្រាប់តួនាទីនេះ ដោយគ្មានការយល់ព្រមពីទីក្រុងវ៉ាស៊ីនតោន នឹងមិនអាចកាន់តំណែងបានយូរឡើយ។

សេចក្តីថ្លែងការណ៍នេះ ត្រូវបានធ្វើឡើងកាលពីថ្ងៃអាទិត្យ ប៉ុន្មានម៉ោងមុនពេលប្រព័ន្ធផ្សព្វផ្សាយរដ្ឋអ៊ីរ៉ង់រាយការណ៍ថា សភាអ្នកជំនាញបានជ្រើសរើសលោក Mojtaba Khamenei ជាមេដឹកនាំកំពូលថ្មី។ លោកគឺជាកូនប្រុសរបស់លោក Ali Khamenei ដែលបានទទួលមរណភាពប៉ុន្មានម៉ោងបន្ទាប់ពីសហរដ្ឋអាមេរិក និងអ៊ីស្រាអែលចាប់ផ្តើមសង្គ្រាមលើអ៊ីរ៉ង់ កាលពីថ្ងៃទី២៨ ខែកុម្ភៈ។

លោក Trump មិនបានឆ្លើយតបភ្លាមៗចំពោះការជ្រើសរើសលោក Mojtaba Khamenei ទេ ប៉ុន្តែលោកបាននិយាយកាលពីពេលថ្មីៗនេះថា មេដឹកនាំកំពូលអ៊ីរ៉ង់នាពេលអនាគត នឹងត្រូវការការយល់ព្រមពីសហរដ្ឋអាមេរិក។ ទោះយ៉ាងណា មន្ត្រីអ៊ីរ៉ង់បានបដិសេធថា រដ្ឋបាល Trump មិនមានឥទ្ធិពលលើការសម្រេចចិត្តនេះឡើយ។

ក្នុងបទសម្ភាសន៍ជាមួយ ABC News លោក Trump បាននិយាយដោយសំដៅទៅលើមេដឹកនាំកំពូលថ្មីដែលអាចកើតមានថា៖«ប្រសិនបើគាត់មិនទទួលបានការយល់ព្រមពីយើងទេ គាត់នឹងមិនអាចកាន់តំណែងបានយូរឡើយ»។

លោក Trump ក៏បានបន្ថែមថា លោកមិនចង់ឱ្យរដ្ឋបាលអាមេរិកនាពេលអនាគត ត្រូវតែត្រឡប់មកដោះស្រាយបញ្ហាដដែលនេះម្ដងទៀតក្នុងរយៈពេលប៉ុន្មានឆ្នាំខាងមុខ ដែលជាការបង្ហាញពីលទ្ធភាពនៃសកម្មភាពយោធាបន្ថែម។

លោកបាននិយាយថា៖«ខ្ញុំមិនចង់ឱ្យមនុស្សត្រូវត្រឡប់មកដោះស្រាយបញ្ហានេះម្ដងទៀតក្នុងរយៈពេលប្រាំឆ្នាំទេ ឬអាក្រក់ជាងនេះ គឺអនុញ្ញាតឱ្យពួកគេមានអាវុធនុយក្លេអ៊ែរ»។

នៅផ្នែកម្ខាង មន្ត្រីអ៊ីរ៉ង់ ដែលបានបើកការវាយប្រហារសងសឹកនៅទូទាំងតំបន់មជ្ឈិមបូព៌ា បានបដិសេធជាបន្តបន្ទាប់ចំពោះការអះអាងថា ទីក្រុងវ៉ាស៊ីនតោនមានឥទ្ធិពលលើការជ្រើសរើសមេដឹកនាំកំពូលរបស់ពួកគេ។

មន្ត្រីអ៊ីរ៉ង់បានបញ្ជាក់ថា ការជ្រើសរើសមេដឹកនាំថ្មី គឺជាសិទ្ធិរបស់ប្រជាជនអ៊ីរ៉ង់។ ពួកគេបានបន្ថែមថា ប្រជាជនអ៊ីរ៉ង់បានបោះឆ្នោតជ្រើសរើសសមាជិកសភាអ្នកជំនាញ ដែលជាស្ថាប័នមានភារកិច្ចជ្រើសរើសមេដឹកនាំកំពូល។

កាលពីព្រឹកថ្ងៃអាទិត្យ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា៖
«យើងនឹងមិនអនុញ្ញាតឱ្យនរណាម្នាក់ជ្រៀតជ្រែកក្នុងកិច្ចការផ្ទៃក្នុងរបស់យើងឡើយ»។

ក្នុងបទសម្ភាសន៍ជាមួយ Al Jazeera អ្នកវិភាគនយោបាយ លោកស្រី Barbara Slavin ដែលជាសមាជិកនៅ Stimson Center ក្នុងទីក្រុងវ៉ាស៊ីនតោន បានបញ្ជាក់ថា លោក Trump បាននិយាយទៅកាន់ប្រព័ន្ធផ្សព្វផ្សាយអាមេរិកថា លោកនឹងមិនទទួលយកលោក Mojtaba Khamenei ជាមេដឹកនាំកំពូលបន្ទាប់ឡើយ។

លោកស្រី Slavin បាននិយាយថា នេះជាការប្រឈមមុខដោយផ្ទាល់ចំពោះលោក Donald Trump។ លោកស្រីបានបន្ថែមថា ការជំនួសលោក Ali Khamenei ដោយកូនប្រុសរបស់គាត់ អាចនឹងមិនត្រូវបានសាធារណជនអាមេរិកទទួលយកយ៉ាងល្អឡើយ ព្រោះការស្ទង់មតិបង្ហាញថា ប្រជាជនអាមេរិកមានការប្រុងប្រយ័ត្នចំពោះសង្គ្រាមរួចទៅហើយ។

លោកស្រីបាននិយាយថា៖«វាអាចបង្កើនអារម្មណ៍នៅក្នុងសហរដ្ឋអាមេរិកថា សង្គ្រាមនេះគឺជាកំហុសមួយ»៕