ឯកអគ្គរដ្ឋទូតអាមេរិកប្រចាំបារាំង ត្រូវបានហាមឃាត់មិនឲ្យជួបមន្រ្តីរដ្ឋាភិបាលបារាំង

ឯកអគ្គរដ្ឋទូតអាមេរិកប្រចាំបារាំង ត្រូវបានហាមឃាត់មិនឲ្យជួបមន្រ្តីរដ្ឋាភិបាលបារាំង

ប៉ារីស, (រ៉យទ័រ) ៖ លោក Charles Kushner ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសបារាំង ត្រូវបានហាមឃាត់មិនឲ្យជួបដោយផ្ទាល់ជាមួយសមាជិករដ្ឋាភិបាលបារាំង បន្ទាប់ពីលោកមិនបានបង្ហាញខ្លួនតាមការកោះហៅរបស់ក្រសួងការបរទេសបារាំង។ នេះបើយោងតាមប្រភពការទូតមួយបានបញ្ជាក់កាលពីថ្ងៃចន្ទទី២៣ ខែកុម្ភៈ ២០២៦។

ប្រភពដដែលបានឲ្យដឹងថា លោក Kushner ត្រូវបានកោះហៅទៅក្រសួងការបរទេស បន្ទាប់ពីស្ថានទូតសហរដ្ឋអាមេរិកបានចេញសេចក្តីថ្លែងការណ៍សោកស្តាយជុំវិញករណីសម្លាប់សកម្មជនស្តាំនិយមជ្រុលម្នាក់នៅបារាំង ខណៈព្រមានអំពីការកើនឡើងនៃការជជែកដេញដោលនយោបាយខ្លាំងក្លា។ ទោះជាយ៉ាងណា លោកមិនបានបង្ហាញខ្លួនតាមការកោះហៅនោះទេ។

សកម្មជនស្តាំនិយមជ្រុលបារាំង លោក Quentin Deranque ត្រូវបានវាយដំរហូតដល់ស្លាប់ ក្នុងការប៉ះទង្គិចជាមួយក្រុមសកម្មជនឆ្វេងរឹងរូស ករណីដែលបង្កឲ្យមានការភ្ញាក់ផ្អើលទូទាំងប្រទេស។ ឧប្បត្តិហេតុនេះត្រូវបានមនុស្សមួយចំនួនហៅថា “ពេលវេលា របស់ លោក Charlie Kirk របស់បារាំង” ដោយយោងទៅកាន់ការវាយប្រហារលើសកម្មជនអភិរក្សនិយមអាមេរិកកាលពីឆ្នាំមុន។

ស្ថានទូតសហរដ្ឋអាមេរិកប្រចាំនៅបារាំង និងការិយាល័យប្រឆាំងភេរវកម្មនៃក្រសួងការបរទេសសហរដ្ឋអាមេរិក បានបញ្ជាក់ថា កំពុងតាមដានស្ថានការណ៍នេះ។ ពួកគេក៏បានព្រមានតាមបណ្តាញសង្គម X អំពីការកើនឡើងនៃចលនាឆ្វេងនិយមជ្រុល និងអំពាវនាវឲ្យចាត់ទុកជាការគំរាមកំហែងដល់សុវត្ថិភាពសាធារណៈ។

ប្រភពការទូតបានបន្ថែមថា ដោយសារតែអ្វីដែលរដ្ឋមន្ត្រីបារាំងចាត់ទុកថា ជាការយល់ច្រឡំយ៉ាងធ្ងន់ធ្ងរនៃតួនាទីការទូត លោក Kushner នឹងមិនត្រូវបានអនុញ្ញាតឲ្យចូលជួបដោយផ្ទាល់ជាមួយសមាជិករដ្ឋាភិបាលបារាំងទៀតឡើយ។

នេះគឺជាលើកទីពីរហើយដែលលោក Kushner មិនបានបង្ហាញខ្លួនតាមការកោះហៅ។ កាលពីខែសីហា ឆ្នាំ២០២៥ លោកក៏ត្រូវបានស្នើឲ្យបកស្រាយនៅក្រសួងការបរទេសបារាំងផងដែរ បន្ទាប់ពីលោកបានបង្ហាញការព្រួយបារម្ភជាសាធារណៈអំពីការកើនឡើងនៃសកម្មភាពប្រឆាំងជនជាតិយូដា នៅបារាំង និងរិះគន់អាជ្ញាធរបារាំងថាមិនបានចាត់វិធានការគ្រប់គ្រាន់៕
https://www.thestar.com.my/news/world/2026/02/24/us-ambassador-to-france-banned-from-meeting-french-government