លោក ត្រាំ បង្កភាពតានតឹងជុំវិញកោះគ្រីនឡែន ខណៈ Air Force One ជួបបញ្ហាបច្ចេកទេស
លោក ត្រាំ បង្កភាពតានតឹងជុំវិញកោះគ្រីនឡែន ខណៈ Air Force One ជួបបញ្ហាបច្ចេកទេស
វ៉ាស៊ីនតោន/ដាវ៉ូស៖ស្ថានការណ៍នយោបាយ និងសន្តិសុខអន្តរជាតិបានកើនឡើងកម្តៅខ្លាំង នៅថ្ងៃទី ២១ ខែមករា ឆ្នាំ ២០២៦ បន្ទាប់ពីព្រឹត្តិការណ៍សំខាន់ជាច្រើនបានកើតឡើងស្របពេលគ្នា ពាក់ព័ន្ធនឹងប្រធានាធិបតីសហរដ្ឋអាមេរិក លោក ដូណាល់ ត្រាំ និងវិបត្តិជុំវិញកោះគ្រីនឡែន ដែលបានធ្វើឲ្យសម្ព័ន្ធមិត្តអឺរ៉ុប និងអង្គការណាតូ (NATO) មានការព្រួយបារម្ភយ៉ាងខ្លាំង។
ការគំរាមកំហែងលើកោះគ្រីនឡែន និងភាពតានតឹងជាមួយអឺរ៉ុប
លោក ដូណាល់ ត្រាំ បានធ្វើឲ្យសម្ព័ន្ធមិត្តអឺរ៉ុបភ្ញាក់ផ្អើលជាថ្មី បន្ទាប់ពីលោកបញ្ជាក់ជាថ្មីអំពីមហិច្ឆតារបស់ខ្លួនក្នុងការគ្រប់គ្រងកោះគ្រីនឡែន (Greenland) ដែលជាដែនដីស្វ័យគ្រប់គ្រងក្រោមអធិបតេយ្យភាពរបស់ប្រទេសដាណឺម៉ាក។
តាមរយៈសារបង្ហោះលើបណ្តាញសង្គម លោក ត្រាំ មិនបានបដិសេធលទ្ធភាពនៃការប្រើប្រាស់កម្លាំងយោធា ដើម្បីសម្រេចគោលដៅយុទ្ធសាស្ត្រនេះឡើយ។ ព្រមជាមួយគ្នានេះ លោកក៏បានគំរាមដាក់ពន្ធគយ ១០ ភាគរយ លើទំនិញពីបណ្តាប្រទេសអឺរ៉ុបណាដែលហ៊ានរារាំង ឬប្រឆាំងនឹងផែនការរបស់លោក។
បន្ថែមពីនេះ លោក ត្រាំ ក៏បានបង្ហាញការមិនពេញចិត្តចំពោះគណៈកម្មាធិការពានរង្វាន់ណូបែល ដោយអះអាងថា ការមិនផ្តល់ពានរង្វាន់ណូបែលសន្តិភាពជូនលោក បានធ្វើឲ្យលោកមិនចាំបាច់បន្តគោរពតាមសម្ពាធ ឬការរំពឹងទុកពីសហគមន៍អន្តរជាតិដូចមុនទៀតឡើយ។
បារាំងស្នើសុំធ្វើសមយុទ្ធណាតូនៅគ្រីនឡែន
ក្នុងបរិបទនៃភាពតានតឹងកើនឡើងនេះ ប្រទេសបារាំងបានស្នើសុំឲ្យអង្គការណាតូ រៀបចំសមយុទ្ធយោធាមួយនៅលើកោះគ្រីនឡែន ហើយបានបញ្ជាក់ថា បារាំងត្រៀមខ្លួនចូលរួម និងរួមចំណែកក្នុងសកម្មភាពនេះផងដែរ។ វិមាន Elysee បានប្រាប់ CNN កាលពីថ្ងៃពុធថា ការស្នើសុំសមយុទ្ធនេះមានគោលបំណងពង្រឹងសន្តិសុខ និងការសហការយោធារវាងសម្ព័ន្ធមិត្ត។
ក្នុងរយៈពេលមួយសប្តាហ៍ចុងក្រោយ បារាំង រួមជាមួយបណ្តាប្រទេសអឺរ៉ុបផ្សេងទៀត បានបញ្ជូនកងទ័ព និងបុគ្គលិកយោធាចំនួនមួយទៅកាន់កោះគ្រីនឡែន ដើម្បីចូលរួមសមយុទ្ធរួមដាច់ដោយឡែកមួយ ដែលដឹកនាំដោយប្រទេសដាណឺម៉ាក។
ការផ្លាស់ទីកម្លាំងយោធារបស់អឺរ៉ុបនេះ កើតឡើងក្នុងពេលដែលលោក ដូណាល់ ត្រាំ កំពុងបង្កើនការគំរាមកំហែងអំពីការប្រើកម្លាំង ដើម្បីភ្ជាប់កោះអាកាសធាតុត្រជាក់នេះចូលជាផ្នែកនៃសហរដ្ឋអាមេរិក។ ការប្រកាសរបស់លោក ត្រាំ ត្រូវបានអ្នកវិភាគមើលឃើញថា បានធ្វើឲ្យសម្ព័ន្ធសន្តិសុខដឹកនាំដោយសហរដ្ឋអាមេរិក ដែលមានអាយុកាលរាប់ទសវត្សរ៍ កំពុងជួបវិបត្តិធ្ងន់ធ្ងរ។
រហូតមកទល់ពេលនេះ អង្គការណាតូ មិនទាន់បានឆ្លើយតបជាផ្លូវការចំពោះការស្នើសុំរបស់បារាំងនៅឡើយទេ។
តាមការពន្យល់របស់ណាតូ សមយុទ្ធរបស់អង្គការនេះ ត្រូវបានរៀបចំដោយមេបញ្ជាការណាតូ ហើយអាចមានទំហំនិងវិសាលភាពខុសៗគ្នា ចាប់ពីសមយុទ្ធតូចដែលមានតែបុគ្គលិកមួយចំនួន រហូតដល់សមយុទ្ធយោធាធំៗ ដែលរួមមានយន្តហោះ នាវាចម្បាំង កាំភ្លើងធំ រថពាសដែក និងកងទ័ពរាប់ពាន់នាក់។ ប្រទេសសមាជិកណាតូ នឹងរួមចំណែកតាមរយៈការផ្តល់កម្លាំងយោធា ឧបករណ៍ ឬការគាំទ្រផ្សេងៗ ហើយជាធម្មតា ប្រទេសចូលរួមនីមួយៗ ត្រូវទទួលខុសត្រូវលើថវិកានៃការចូលរួមរបស់ខ្លួន។
យន្តហោះ Air Force One ជួបបញ្ហាបច្ចេកទេស
នៅក្នុងព្រឹត្តិការណ៍ដ៏កម្រមួយ ស្របពេលលោក ត្រាំ កំពុងធ្វើដំណើរទៅចូលរួមវេទិកាសេដ្ឋកិច្ចពិភពលោក នៅទីក្រុង Davos ប្រទេសស្វីស យន្តហោះប្រធានាធិបតី Air Force One បានជួបបញ្ហាបច្ចេកទេសផ្នែកប្រព័ន្ធអគ្គិសនី បន្ទាប់ពីហោះចេញពីមូលដ្ឋានទ័ពអាកាស Andrews បានត្រឹមរយៈពេលខ្លី។
ដើម្បីធានាសុវត្ថិភាព យន្តហោះត្រូវបានបង្ខំឲ្យហោះត្រឡប់មកចុះចតវិញជាបន្ទាន់។ ទោះជាយ៉ាងណា លោក ត្រាំ មិនបានលុបចោលដំណើររបស់ខ្លួនឡើយ ដោយបានប្តូរទៅជិះយន្តហោះបម្រុងមួយទៀត និងបន្តដំណើរទៅកាន់ទីក្រុង Davos ឱ្យទាន់ពេលវេលា។
អ្នកវិភាគយល់ឃើញថា ការគំរាមកំហែងរបស់លោក ត្រាំ ចំពោះកោះគ្រីនឡែន រួមជាមួយចលនាយោធារបស់បណ្តាប្រទេសអឺរ៉ុប និងការចូលមកពាក់ព័ន្ធរបស់ណាតូ កំពុងធ្វើឲ្យតំបន់អាក់ទិកក្លាយជាចំណុចតានតឹងថ្មីមួយ ដែលអាចមានផលប៉ះពាល់យ៉ាងជ្រាលជ្រៅដល់តុល្យភាពអំណាច និងសន្តិសុខពិភពលោក៕
