អ្នកលេងហ្វេសប៊ុកម្នាក់ បង្ហាញពីទាហានសៀមប្រើប្រាស់ប្រតិបត្តិការព័ត៌មាន (IO) ជាយុទ្ធសាស្ត្រប្រឆាំងកម្ពុជា
អ្នកលេងហ្វេសប៊ុកម្នាក់ បង្ហាញពីទាហានសៀមប្រើប្រាស់ប្រតិបត្តិការព័ត៌មាន (IO) ជាយុទ្ធសាស្ត្រប្រឆាំងកម្ពុជា
ភ្នំពេញ៖ អ្នកលេងហ្វេសប៊ុកម្នាក់ដែលមានគណនី Phany Khemara បានបង្ហាញពី ទាហានថៃ (សៀម) កំពុងប្រើប្រាស់យ៉ាងសកម្មនូវប្រតិបត្តិការព័ត៌មាន (Information Operations – IO) ដែលជាផ្នែកមួយនៃយុទ្ធសាស្ត្រ សង្រ្គាមបែបសមាសភាព (Hybrid Warfare) ប្រឆាំងនឹងកម្ពុជា។
យុទ្ធនាការនេះមិនមែនជារឿងថ្មីនោះទេ ប៉ុន្តែក្នុងឆ្នាំ ២០២៥ នេះ វាបានវិវត្តន៍កាន់តែមានភាពស្មុគស្មាញ និងមានលក្ខណៈបច្ចេកទេសច្រើនស្រទាប់។
១. អង្គភាព IO ផ្លូវការរបស់កងទ័ពសៀម
កងទ័ពថៃបានសារភាពជាផ្លូវការក្នុងសវនាការសភាចន្លោះឆ្នាំ ២០២០-២០២២ ថាពួកគេមានអង្គភាពឌីជីថលសម្រាប់ “ការការពារសង្គ្រាមចិត្តសាស្ត្ររបស់ជាតិ”។ អង្គភាពទាំងនោះរួមមាន កងបញ្ជាការប្រយុទ្ធសាយបឺរ (CWC) និង មជ្ឈមណ្ឌលសាយបឺរយោធា (ACC)។ នៅឆ្នាំ ២០២៣ ក្រុមហ៊ុន Meta (Facebook) បានលុបចោលគណនីរាប់ពាន់ដែលពាក់ព័ន្ធនឹងយោធាថៃ ដែលបានផ្សព្វផ្សាយព័ត៌មានប្រឆាំងកម្ពុជា និងលើកស្ទួយជាតិនិយមជ្រុល។
២. ការវាយប្រហារតាមអ៊ីនធឺណិត
ក្នុងឆ្នាំ ២០២៤-២០២៥ គេបានសង្កេតឃើញមានការផ្សព្វផ្សាយព័ត៌មានមិនពិតតាមបណ្តាញសង្គមដូចជា Facebook និង X (Twitter) ។ ឧទាហរណ៍៖
• ព័ត៌មានក្លែងក្លាយ៖ “កម្ពុជាចូលលុកលុយដីថៃ” ឬ “ទាហានកម្ពុជាសម្លាប់ព្រះសង្ឃថៃ”។
• ការប្រើប្រាស់ Bot៖ ក្រុម Bot armies ត្រូវបានបង្កើតឡើងដើម្បីចែករំលែកព័ត៌មានក្លែងក្លាយទាំងនេះ និងបង្កើនចំនួន Like, Share និង Comment យ៉ាងគំហុក។
• ការមើលងាយ៖ មាន Page ជាច្រើនត្រូវបានបង្កើតឡើងដើម្បីមើលងាយពលករខ្មែរ ឬចំអកឱ្យប្រទេសកម្ពុជា ដោយប្រើពាក្យពេចន៍ដូចជា “មិនល្ងង់ មិនមែនខ្មែរ” ឬ “ខ្មែរជា Scambodia”។ សកម្មភាពទាំងនេះតែងតែកើតឡើងក្នុងអំឡុងពេលមានព្រឹត្តិការណ៍សំខាន់ៗដូចជា កិច្ចប្រជុំ GBC ឬកិច្ចប្រជុំអាស៊ាន។
៣. យុទ្ធនាការវាយប្រហារកិត្តិយសថ្នាក់ដឹកនាំ
បន្ទាប់ពីការបែកធ្លាយសារសំឡេងរវាង សម្តេច ហ៊ុន សែន និងលោកស្រី ភេថងថាន់ ក្រុមបណ្តាញ IO របស់ថៃបានកាត់តសំឡេងបន្ថែមបន្ថយអត្ថន័យ និងបង្កើតរឿងប្រឌិត ដើម្បីបង្កឱ្យមានភាពតានតឹង។ សកម្មភាពទាំងអស់នេះត្រូវបានធ្វើឡើងជាពិសេសមុនកិច្ចប្រជុំ UN និងអាស៊ាន ដើម្បីបង្ខូចកិត្តិយសកម្ពុជា។
៤. ការផ្សព្វផ្សាយព័ត៌មានក្លែងក្លាយលើពលករខ្មែរ
បណ្តាញសង្គមថៃបានផ្សព្វផ្សាយព័ត៌មានប្រឌិតទៅលើពលករខ្មែរដូចជា “ពលករនឹងបាត់បង់កម្មសិទ្ធិដីធ្លី និងសញ្ជាតិ បើមិនវិលត្រឡប់មកកម្ពុជា”។ គោលបំណងគឺដើម្បីបង្កឱ្យមានការភ័យខ្លាច ការច្របូកច្របល់ និងបន្ទោសរាជរដ្ឋាភិបាលកម្ពុជាជាអ្នកបង្កវិបត្តិ។
៥. មូលហេតុនៃការប្រើប្រាស់ IO
គោលបំណងរបស់ថៃក្នុងការប្រើប្រាស់ IO គឺដើម្បី៖
• បង្កើតលេសសម្រាប់ការធ្វើសកម្មភាពយោធា។
• បំបាក់ស្មារតីយោធា និងប្រជាជនកម្ពុជា។
• បង្វែរទស្សនៈរបស់ប្រទេសសមាជិកអាស៊ាន។
• បង្កវិបត្តិផ្ទៃក្នុងកម្ពុជា។
• លើកកម្ពស់ឥទ្ធិពលរបស់ខ្លួនលើឆាកអន្តរជាតិ៕
