ម៉ាឡេស៊ី គាំទ្រការបង្កើតយន្តការអាស៊ាន ដើម្បីជួយអនុវត្តបទឈប់បាញ់រវាងកម្ពុជា-ថៃ

ម៉ាឡេស៊ី គាំទ្រការបង្កើតយន្តការអាស៊ាន ដើម្បីជួយអនុវត្តបទឈប់បាញ់រវាងកម្ពុជា-ថៃ

ម៉ាឡេស៊ី៖ នាយឧត្តមសេនីយ៍ Mohamed Nizam អគ្គមេបញ្ជាការកងទ័ពម៉ាឡេស៊ី បានប្រកាសគាំទ្រគាំទ្រការបង្កើតយន្តការអាស៊ាន ដើម្បីជួយអនុវត្តបទឈប់បាញ់រវាងកម្ពុជា-ថៃឱ្យមានប្រសិទ្ធិភាព ។

ការប្រកាសគាំទ្រនេះ ធ្វើឡើង នាថ្ងៃទី៦ ខែសីហា ឆ្នាំ២០២៥ ក្នុងគ្រាដែល នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំគណៈប្រតិភូយោធាជាន់ខ្ពស់ នៃកងយោធពលខេមរភូមិន្ទ ជួបពិភាក្សាការងារ នៅទីក្រុង Kuala Lumpur ប្រទេសម៉ាឡេស៊ី។

យោងតាមទំព័រហ្វសប៊ុករបស់លោកឧបនាយករដ្ឋមន្ត្រី ទៀ សីហា ឱ្យដឹងថា ក្នុងជំនួបនេះភាគីម៉ាឡេស៊ីបានបង្ហាញពីឆន្ទៈក្នុងការសហការជាមួយអាស៊ាន ដើម្បីជួយសម្របសម្រួលការអនុវត្តបទឈប់បាញ់រវាងកម្ពុជា-ថៃ ភាគីម៉ាឡេស៊ីគាំទ្រការបង្កើតឯកសារក្រមប្រតិបត្តិ (TOR) និងការបង្កើតក្រុមអ្នកសង្កេតការណ៍អាស៊ាន (ASEAN Monitoring Team – AMT) ដែលនិងក្លាយជាយន្តការសំខាន់ក្នុងការតាមដាន និងអនុវត្តបទឈប់បាញ់ឲ្យមានប្រសិទ្ធភាពខ្ពស់ដើម្បីឆាប់បង្រួបបង្រួមសន្ដិភាពក្នុងតំបន់។

នាឱកាសនោះ លោក General Nizam បានថ្លែងថា៖ «សន្តិភាពគឺមានតម្លៃខ្ពស់ ជីវិតគឺមានតម្លៃ ពេលវេលាគឺសំខាន់» ស្របតាមអនុសាសន៍របស់សម្តេចធិបតី តែងតែលើកឡើងថា៖ “មួយថ្ងៃ មួយម៉ោង មួយនាទី” ដែលយើងកំពុងចរចា គឺអាចជួយសង្គ្រោះជីវិតកងកម្លាំង និងប្រជាពលរដ្ឋរបស់យើងបាន «កាន់តែឆាប់ កាន់តែប្រសើ» ។

ក្នុងរយៈពេលបីថ្ងៃចុងក្រោយនេះ ក្រុមការងារលេខាធិការដ្ឋាន នៃគណៈកម្មការព្រំដែន (GBC) របស់កម្ពុជា-ថៃ បានធ្វើការផ្លាស់ប្តូរយោបល់សំខាន់ៗជាច្រើនក្នុងបរិយាកាសវិជ្ជមាន។

ភាគីថៃបានយល់ព្រមលើធាតុចូលជាច្រើនរបស់កម្ពុជា ខណៈកម្ពុជាក៏បានទទួលយកចំណុចវិជ្ជមានរបស់ភាគីថៃផងដែរ កិច្ចប្រជុំនេះកើតមានក្នុងបរិបទនៃការចងក្រងកិច្ចសហប្រតិបត្តិការយោធានិងការទូត ដើម្បីគាំទ្រសន្តិភាព និងស្ថិរភាពនៅតំបន់អាស៊ាន៕