VINCI Airports ចាប់អារម្មណ៍ពង្រីកវិនិយោគលើវិស័យសំខាន់ៗនៅកម្ពុជា រួមទាំងថាមពល និងទឹកស្អាត
VINCI Airports ចាប់អារម្មណ៍ពង្រីកវិនិយោគលើវិស័យសំខាន់ៗនៅកម្ពុជា រួមទាំងថាមពល និងទឹកស្អាត
ភ្នំពេញ៖ ក្រុមហ៊ុន VINCI Airports បានបង្ហាញចំណាប់អារម្មណ៍ក្នុងការពង្រីកការវិនិយោគរបស់ខ្លួននៅកម្ពុជា ទៅលើវិស័យសំខាន់ៗដូចជា ថាមពលស្អាត និង ទឹកស្អាត។ នេះបើតាមជំនួបរវាងលោក Nicolas NOTEBAERT ប្រធានក្រុមហ៊ុន VINCI Airports ជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីព្រឹកថ្ងៃទី១០ ខែកក្កដា ឆ្នាំ២០២៥។
ក្នុងជំនួបនោះ លោក Notebaert បានកោតសរសើររាជរដ្ឋាភិបាលកម្ពុជាចំពោះការធានានូវសន្តិភាព ស្ថិរភាព និងការអភិវឌ្ឍសេដ្ឋកិច្ច ដែលជាកត្តាគន្លឹះសម្រាប់ភាពជោគជ័យនៃការវិនិយោគរបស់ក្រុមហ៊ុន។ លោកបានគូសបញ្ជាក់ពីកំណើនគួរឲ្យកត់សម្គាល់នៃចំនួនអ្នកដំណើរតាមយន្តហោះ ដែលកើន ៤០ ដងក្នុងរយៈពេល ៣០ ឆ្នាំចុងក្រោយនេះ។
ក្រៅពីវិស័យអាកាសចរណ៍ ដែលក្រុមហ៊ុនកំពុងត្រៀមសម្រាប់ការដាក់ឲ្យដំណើរការអាកាសយានដ្ឋានអន្តរជាតិតេជោនាពេលឆាប់ៗនេះ ក្រុមហ៊ុន VINCI Airports មានបំណងចូលរួមអភិវឌ្ឍន៍សង្គម-សេដ្ឋកិច្ចកម្ពុជាតាមរយៈការវិនិយោគលើវិស័យថ្មីៗ។ លោក Notebaert បានសម្តែងក្តីរំពឹងថា ការវិនិយោគទាំងនេះនឹងក្លាយជាគំរូនៃភាពជោគជ័យរួម (Win-Win) រវាងរាជរដ្ឋាភិបាល និងវិស័យឯកជន។
ជាការឆ្លើយតប សម្ដេចនាយករដ្ឋមន្ត្រីបានវាយតម្លៃខ្ពស់ចំពោះជោគជ័យរបស់ VINCI Airports នៅកម្ពុជា ដែលបានរួមចំណែកយ៉ាងសំខាន់ដល់កំណើនសេដ្ឋកិច្ច និងការទាក់ទាញភ្ញៀវទេសចរ។ សម្ដេចក៏បានអបអរសាទរខួបទី៣០ នៃភាពជាដៃគូរវាងក្រុមហ៊ុន និងកម្ពុជា (១៩៩៥-២០២៥)។
សម្ដេចបានគូសរំលេចពីគោលនយោបាយបើកចំហរបស់រាជរដ្ឋាភិបាលក្នុងការទាក់ទាញវិនិយោគ និងការភ្ជាប់ជើងហោះហើរត្រង់ទៅកាន់បណ្ដាប្រទេសជាច្រើនរួមមានឥណ្ឌា និងមជ្ឈិមបូព៌ា ដែលនឹងជំរុញវិស័យទេសចរណ៍ និងធុរកិច្ច។
សម្ដេចនាយករដ្ឋមន្ត្រីបានលើកទឹកចិត្តឲ្យក្រុមហ៊ុនបន្តទំនាក់ទំនងល្អជាមួយស្ថាប័នពាក់ព័ន្ធ ហើយបានបញ្ជាក់ថា រាជរដ្ឋាភិបាលត្រៀមខ្លួនរួចជាស្រេចក្នុងការគាំទ្ររាល់ការវិនិយោគរបស់ក្រុមហ៊ុននៅកម្ពុជា៕
