ដឹងតែកក្រើកហើយ! មនុស្សឈើ សុខ ធី ប៉ះ ក្របីព្រៃ ពេជ្រ សម្បត្តិ ដណ្ដើមខ្សែក្រវាត់ទម្ងន់ ៦០គីឡូក្រាម
ដឹងតែកក្រើកហើយ! មនុស្សឈើ សុខ ធី ប៉ះ ក្របីព្រៃ ពេជ្រ សម្បត្តិ ដណ្ដើមខ្សែក្រវាត់ទម្ងន់ ៦០គីឡូក្រាម
នៅទីបំផុត! ជំនួបដែលអ្នកស្នេហាវិស័យគុនខ្មែរ ចង់ឃើញបំផុត ពេលនេះបានកើតឡើងហើយ
រវាងក្របីព្រៃមុខដែក ពេជ្រ សម្បត្តិ និងមនុស្សឈើ សុខ ធី ក្នុងកម្មវិធី XTREME Power Boom នៅសង្វៀន ហង្សមាស ដែលជាការប្រកួតដណ្ដើមខ្សែក្រវាត់ 60Kg ។
បើតាមការឲ្យដឹងពីទំព័រហ្វេសប៊ុកផេកផ្លូវការណ៍ របស់ក្លិបគុនខ្មែរជើងឯកពិភពលោក (KKIF) បានបង្ហាញពីការចុះកុងត្រារួចរាល់ សម្រាប់ជំនួបដែលអ្នកគាំទ្រចង់ឃើញគឺ សុខ ធី ប៉ះ ពេជ្រ សម្បតិ្ត នៅសង្វៀនហង្សមាស ដើម្បីដណ្ដើមខ្សែក្រវាត់ទម្ងន់ ៦០គីឡូក្រាម។
គួររំលឹកថា កាលពីឆ្នាំ២០២៣ លោកឧកញ្ញា ស្រី ចាន់ថន ដែលជាម្ចាស់ក្លិបគុនខ្មែរជើងឯកពិភពលោក (KKIF) ធ្លាប់បានប្រកាសក្តែងៗ មិនឲ្យ សុខធី ប៉ះ ពេជ្រ សម្បត្តិ ឡើយ ដោយលោកបានលើកឡើងថា៖« សម្បត្តិ កើតក្នុងក្លិប១៥៧របស់ខ្ញុំតាំងពី២០១៧មកម្លេះ រយៈពេល៤ទៅ៥ឆ្នាំហើយ ចឹងខ្ញុំមិនឲ្យជួបកូនសិសស្សចាស់នោះទេ ទុកកំលាំងប៉ះជាមួយបរទេសល្អជាង»។ យ៉ាងណា ពេលនេះ លោកឧកញ្ញា ស្រី ចាន់ថន បានឯកភាពបើកភ្លើងខៀវ សម្រាប់ជំនួប សុខ ធី នឹង ពេជ្រ សម្បត្តិ។
ពីមុនមក សុខ ធី ត្រូវបានមហាជនចាប់គូទល់នឹង ពេជ្រ សម្បត្តិ ជាច្រើនលើកច្រើនសារ ហើយរូបខ្លួនផ្ទាល់ ធ្លាប់បាននិយាយថា៖« បើមានការរៀបចំមែន ក៏មិនហ៊ានរំពឹងច្រើនដែរ ត្រឹម ៥០/៥០ ប៉ុណ្ណោះ ព្រោះអីសម្បត្តិ ពេលនេះល្អ ហើយតាន់ទៀត។ (បើយើងសង្ឃឹមច្រើនខ្លាចចាញ់ទៅខ្មាសគេ) នេះជាការបន្ថែមរបស់ សុខ ធី ។
គួរបញ្ជាក់ថា អ្នកប្រដាល់មកពីជាយដែន រហស្សនាម មនុស្សឈើ សុខ ធី បានវិលមកកាន់កម្ពុជា ក្នុងឆ្នាំ២០២៣ ដោយទទួលបានជោគជ័យជាបន្តបន្ទាប់ ឈ្នះពានរង្វាន់ ខ្សែក្រវាត់ និងប្រាក់រង្វាន់ជាច្រើន។ ការត្រលប់មករស់នៅកម្ពុជាវិញ សុខ ធី ចូលហ្វឹកហាត់ជាមួយក្លឹបប្រដាល់ KKIF។ បច្ចុប្បន្ននេះ រូបគេមានតម្លៃខ្លួនក្នុងមួយប្រកួត បានចន្លោះ ១,៥០០-២,០០០ដុល្លារ។ រូបគេជាជើងខ្លាំងមួយរូប ប្រចាំទម្ងន់ ៦០គីឡូក្រាមនៅកម្ពុជា៕
