មន្ត្រីកម្ពុជា៖ ការសម្ពោធ «សមាគមពាណិជ្ជករហ៊ូប៉ីឈូនៅកម្ពុជា» នឹងរួមចំណែកក្នុងការកៀរគរធុរជន និងវិនិយោគិនមកកម្ពុជា

មន្ត្រីកម្ពុជា៖ ការសម្ពោធ «សមាគមពាណិជ្ជករហ៊ូប៉ីឈូនៅកម្ពុជា» នឹងរួមចំណែកក្នុងការកៀរគរធុរជន និងវិនិយោគិនមកកម្ពុជា

ភ្នំពេញ៖ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរំពឹងថា ការសម្ពោធជាផ្លូវការសមាគមពាណិជ្ជករហ៊ូប៉ីឈូនៅកម្ពុជា នឹងមានបេសកកម្មរួមចំណែកជាមួយរាជរដ្ឋាភិបាលកម្ពុជាក្នុងការកៀរគរធុរជន និងវិនិយោគិនមកពីខេត្តហ៊ូប៉ី ក៏ដូចជាខេត្តផ្សេងៗទៀតនៃសាធារណរដ្ឋប្រជាមានិតចិនឱ្យមកបណ្តាក់ទុនវិនិយោគនៅព្រះរាជាណាចក្រកម្ពុជា។

ការរំពឹងរបស់លោក លោក ជា វុទ្ធី បែបនេះ ក្នុងពេលលោក ពិធីសម្ពោធជាផ្លូវការសមាគមពាណិជ្ជករហ៊ូប៉ីឈូនៅកម្ពុជានៅសាលសន្និបាត និងពិព័រណ៍កោះពេជ្រ នារសៀលថ្ងៃអាទិត្យ ទី២៥ ខែឧសភា ឆ្នាំ២០២៥។ នាឱកាសនេះលោក បានលើកឡើងពីចំណងមិត្តភាពដែកថែបរវាងកម្ពុជា និងចិន ហើយដែលបច្ចុប្បន្ន កម្ពុជា-ចិន បានឈានដល់កម្រិតក្របខណ្ឌកិច្ចសហប្រតិបត្តិការត្បូងពេជ្រ ដែលជាក្របខណ្ឌកិច្ចសហប្រតិបត្តិការកម្រិតកំពូលមួយ។

លើសពីនេះទៀត លោកបានចែករំលែកនូវចំណុចគន្លឹះមួយចំនួនដែលធ្វើឱ្យកម្ពុជាបានក្លាយជាគោលដៅវិនិយោគដ៏លេចធ្លោមួយនៅអាស៊ីអាគ្នេយ៍ ព្រមទាំងត្រូវបានអង្គភាព FDI Intelligence នៃកាសែត Financial Times ដាក់ពិន្ទុជា “គោលដៅវិនិយោគផ្ទាល់បរទេសឈានមុខក្នុងឆ្នាំ២០២៤” ក្នុងចំណោមប្រទេសនាំមុខ៥០លើសកលលោក ដែលមានទស្សនវិស័យវិនិយោគផ្ទាល់បរទេសដ៏ស្វាហាប់ ដូចជា ការបន្តរក្សាសន្តិភាព ស្ថិរភាពនយោបាយ សណ្តាប់ធ្នាប់សង្គម និងស្ថិរភាពម៉ាក្រូសេដ្ឋកិច្ច ក៏ដូចជាការគ្រប់គ្រងអតិផរណា, ភាពសម្បូរពលកម្មវ័យក្មេងនិងមានជំនាញ, ទីតាំងយុទ្ធសាស្រ្តស្ថិតនៅចំកណ្តាលនៃមហាអនុតំបន់មេគង្គនិងតំបន់អាស៊ីអាគ្នេយ៍, សក្តានុពលក្នុងការតភ្ជាប់ជាមួយនឹងទីផ្សារអន្តរជាតិ តាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី, ការឆ្លើយតបយ៉ាងរហ័សរបស់រាជរដ្ឋាភិបាលក្នុងគ្រាមានវិបត្តិ និងយន្តការកិច្ចសន្ទនាដ៏មានប្រសិទ្ធភាពរវាងរាជរដ្ឋាភិបាល-ផ្នែកឯកជន, ការបន្តពង្រីកនិងកសាងហេដ្ឋារចនាសម្ព័ន្ធតភ្ជាប់, និងការបន្តដាក់ចេញនូវវិធានការគាំទ្រផ្សេងៗសំដៅធ្វើការកែលម្អបរិយាកាសវិនិយោគនិងធុរកិច្ច។

ជាមួយគ្នានេះ លោកក៏បានលើកទឹកចិត្តដល់សមាគមក្នុងការបន្តចែករំលែកនូវបទពិសោធន៍ជោគជ័យរបស់បណ្តាក្រុមហ៊ុនមកខេត្តហ៊ូប៉ីដែលបានវិនិយោគនៅកម្ពុជាកន្លងមកឱ្យបានទូលំទូលាយដើម្បីបង្ហាញពីសក្តានុពលសេដ្ឋកិច្ចកម្ពុជាដែលពោរពេញទៅដោយថាមវន្ត និងភាពប្រកួតប្រជែងខ្ពស់។

បន្ថែមពីនេះទៀត លោកបានអំពាវនាវដល់វិនិយោគិនចិនដទៃទៀតដែលមិនទាន់មកកម្ពុជា សូមអញ្ជើញមកកម្ពុជាដើម្បីសិក្សាស្វែងយល់បន្ថែមអំពីសក្តានុពលដ៏សម្បូរបែប និងកាលានុវត្តភាពជាច្រើន ព្រមទាំងសម្រេចចិត្តជាយុទ្ធសាស្រ្ត ដើម្បីទាញយកអត្ថប្រយោជន៍ជាអតិបរមាពីកិច្ចសហប្រតិបត្តិការដ៏ស្អិតល្មួតនៃប្រទេសទាំងពីរ កម្ពុជា-ចិន៕