បុរសកំសត់ពាន Harry Kane បំបែកកំណត់ត្រារបស់ Haaland នៅ Bundesliga

បុរសកំសត់ពាន Harry Kane បំបែកកំណត់ត្រារបស់ Haaland នៅ Bundesliga

ខ្សែប្រយុទ្ធ Harry Kane បានស៊ុតបាល់ប៉េណាល់ទី ១គ្រាប់ ក្នុងជ័យជម្នះ ៥-០ របស់ក្រុម FC Bayern Munich លើក្រុម Hoffenheim ក្នុងជុំទី១៧ ដោយបានក្លាយជាកីឡាករលឿនបំផុត ដែលអាចរកបាន ៥២គ្រាប់ នៅក្នុងប្រវត្តិសាស្ត្រ Bundesliga ។

នៅកីឡដ្ឋាន Allianz Arena កាលពីម្សិលមិញ Bayern Munich បានគ្រប់គ្រងបាល់រហូតដល់ ៦៥% ដោយស៊ុតសរុប ២៥ជើង ស៊ុតចំគោដៅ ១០ដង ខណៈ Hoffenheim ស៊ុតសរុប ៥ជើង ស៊ុតចំគោដៅ ២ដងប៉ុណ្ណោះ។ ក្រៅពីគ្រាប់បាល់ប៉េណាល់ទី របស់ Kane គ្រាប់បាល់ដែលនៅសេសសល់របស់ Bayern Munich រកបានដោយ Raphael Guerreiro, Serge Gnabry ម្នាក់មួយគ្រាប់ និង Leroy Sane ២គ្រាប់ម្នាក់ឯង។

កាលពីយប់មិញនេះ Harry Kane បានស៊ុតបាល់ប៉េណាល់ទី ១គ្រាប់ នៅនាទី២៦ ដែលនាំឲ្យខ្សែប្រយុទ្ធអង់គ្លេស រូបនេះ ស៊ុតបញ្ចូលទីបាន ៥២គ្រាប់ ក្នុង ៤៧ប្រកួតនៅ Bundesliga របស់អាឡឺម៉ង់ ។ គ្រាប់បាល់ ៥២គ្រាប់លឿនបំផុតនៅ Bundesliga ពីមុន គឺកាន់កាប់ដោយខ្សែប្រយុទ្ធ Erling Haaland ប៉ុន្តែរូបគេចំណាយពេលដល់ទៅ ៥៣ប្រកួត។

នៅក្នុង Bundesliga នៅរដូវកាលនេះ បុរសកំសត់ពាន Harry Kane បានស៊ុតបញ្ជូលទីចំនួន ១៦គ្រាប់ និងបញ្ជូនបាល់ឲ្យមិត្តរួមក្រុមស៊ុតបញ្ជូលទីចំនួន ៦គ្រាប់។ បច្ចុប្បន្ន Kane បានស៊ុតបាល់ប៉េណាល់ទីសរុប ១២គ្រាប់ ក្នុង Bundesliga ហើយនៅក្នុងប្រវត្តិសាស្រ្តលីគកំពូលអាឡឺម៉ង់ មានតែកីឡាករ២រូបប៉ុណ្ណោះ រកគ្រាប់បាល់តាមរយៈការស៊ុតបាល់ប៉េណាល់ទីបាច្រើននជាងគេ គឺកីឡាករ Hans-Joachim Abel ស៊ុតបាន ១៦គ្រាប់ និង Ludwig Nolden ១៥គ្រាប់។

តាមរយៈជ័យជំនះយប់មិញនេះ ជួយឱ្យ Bayern បន្តឈរនៅលើកំពូលតារាង Bundesliga ដោយមាន ៤២ពិន្ទុ តាមពីក្រោយដោយ Bayern Leverkusen មាន ៣៨ពិន្ទុ និង Eintracht Frankfurt មាន ៣៣ពិន្ទុ៕