ឥណ្ឌូនេស៊ី តែងតាំងអតីតកីឡាកររបស់ Barcelona លោក Patrick Kluivert ជាគ្រូបង្វឹកជម្រើសជាតិថ្មី

ដោយ៖ Chhan Sreyka | ម្សិលមិញ ម៉ោង 3:55 am កីឡា

អតីតខ្សែប្រយុទ្ធរបស់ក្រុមអ្នកមានបុណ្យ FC Barcelona, AC Milan និងក្រុមជម្រើសជាតិហូឡង់ លោក Patrick Kluivert នឹងក្លាយជាគ្រូបង្វឹកថ្មីរបស់ឥណ្ឌូនេស៊ី ជំនួសតំណែងលោក 𝗦𝗵𝗶𝗻 𝗧𝗮𝗲-𝘆𝗼𝗻𝗴។

លោក Patrick Kluivert ត្រូវបានគេបញ្ជាក់ថា នឹងចុះហត្ថលេខាលើកិច្ចសន្យារយៈពេល ២ឆ្នាំ ជាមួយនឹងជម្រើសក្នុងការបន្តរយៈពេលពីរឆ្នាំទៀត គោលដៅចំបងគឺត្រូវដឹកនាំប្រទេសឥណ្ឌូនេស៊ី ទៅកាន់ការប្រកួតបាល់ទាត់ពិភពលោក ឆ្នាំ ២០២៦ ។

បើតាមការសែតក្នុងស្រុករបស់ឥណ្ឌូណេស៊ី ការប្រកាសជាផ្លូវការរបស់ Kluivert នឹងប្រព្រឹត្តទៅនៅថ្ងៃទី ១២ ខែមករា ក្នុងទីក្រុងហ្សាកាតា។ សមាគមបាល់ទាត់នៃប្រទេសឥណ្ឌូនេស៊ី (PSSI) បានប្រគល់ភារកិច្ចឱ្យគ្រូបង្វឹកវ័យ ៤៨ ឆ្នាំរូបនេះ ក្នុងការធានាឱ្យមានកៅអីសម្រាប់ការប្រកួតជម្រុះ World Cup ជាប្រវត្តិសាស្ត្រ។

មែនទែនទៅ ការប្រកាសនេះធ្វើឡើង បន្ទាប់ពីការសម្រេចចិត្តរបស់ប្រទេសឥណ្ឌូណេស៊ី ក្នុងការចែកផ្លូវជាមួយគ្រូបង្វឹក Shin Tae-yong ដែលបានចំណាយពេលជិតប្រាំឆ្នាំ ជាមួយឥណ្ឌូណេស៊ី។ ទោះបីជាការបន្តកិច្ចសន្យារបស់គាត់ ក្នុងខែមេសា ឆ្នាំ ២០២៤ ដែលមានសុពលភាពដល់ឆ្នាំ ២០២៧ ក៏ដោយ ប្រធាន PSSI លោក Erick Thohir បាននិយាយថា ការសម្រេចចិត្តនេះ គឺមានការព្រមព្រៀងគ្នាទៅវិញទៅមក និងមិនទាក់ទងនឹងការធ្លាក់ចេញពីវគ្គចែកពូលរបស់ប្រទេសឥណ្ឌូនេស៊ី នៅព្រឹត្តិការណ៍ ASEAN Cup 2024 នោះទេ។

ការតែងតាំងរបស់ Kluivert បានបង្ហាញពីការប្តេជ្ញាចិត្តរបស់ប្រទេសឥណ្ឌូនេស៊ី ចំពោះយុទ្ធសាស្ត្រ “ហូឡង់” ដែលរួមបញ្ចូលទាំងការធ្វើឱ្យកីឡាករហូឡង់-ឥណ្ឌូនេស៊ី មានទទួលបានសញ្ជាតិបន្ថែម ដើម្បីពង្រឹងក្រុម។

គោលនយោបាយនេះ បានទទួលជោគជ័យដំបូង ដោយប្រទេសឥណ្ឌូនេស៊ី បានឈានដល់វគ្គជម្រុះជុំទី៣ នៃការប្រកួតបាល់ទាត់ពិភពលោកឆ្នាំ 2026 នៅអាស៊ី ជាលើកដំបូង។ បច្ចុប្បន្នក្រុមនេះ ស្ថិតនៅចំណាត់ថ្នាក់លេខ៣ ក្នុងពូល C ដោយត្រូវប្រជែងជាមួយក្រុមខ្លាំងដូចជា ជប៉ុន អូស្ត្រាលី និងអារ៉ាប៊ីសាអូឌីត។

ប្រព័ន្ធផ្សព្វផ្សាយអឺរ៉ុប បានរាយការណ៍ថា PSSI បានចុចបេក្ខភាពចំនួន២រូប គឺលោក Patrick Kluivert និងអតីតគ្រូបង្វឹកក្រុមបិសាចក្រហម Manchester United លោក Louis van Gaal ។ ទោះបីជា លោក Kluivert ខ្វះបទពិសោធន៍គ្រប់គ្រង បើប្រៀបធៀបទៅនឹង Van Gaal ប៉ុន្តែឥណ្ឌូនេស៊ី នៅតែជ្រើសរើសលោក Kluivert។

លោក Kluivert ត្រូវបានគេស្គាល់ថា ជាខ្សែប្រយុទ្ធល្អបំផុតមួយរូបរបស់អឺរ៉ុប ក្នុងទសវត្សរ៍ឆ្នាំ ១៩៩០ និងដើមឆ្នាំ ២០០០។ ដោយលោកបានឈ្នះ Champions League ជាមួយ Ajax ក្នុងឆ្នាំ ១៩៩៥ និង La Liga ជាមួយ Barcelona ក្នុងឆ្នាំ ១៩៩៩ ។ មិនតែប៉ុណ្ណោះ លោកក៏បានលេងឱ្យក្លឹបល្បីៗដូចជា AC Milan, Newcastle United, LOSC Lille, Valencia និង PSV ផងដែរ។ ជាមួយជម្រើសជាតិហូឡង់ Kluivert បង្ហាញខ្លួនបាន ៧៩ប្រកួត ស៊ុតបញ្ចូលទីបាន ៤០គ្រាប់។ លោកក៏ធ្លាប់ជួយហូឡង់ ឈានដល់វគ្គពាក់កណ្តាលផ្តាច់ព្រ័ត្រ នៃការប្រកួត World Cup 1998 និង Euro 2000 ផងដែរ ។

ចាប់តាំងពីចូលនិវត្តន៍មក Kluivert បានកាន់តួនាទីជាច្រើនរួមទាំងជំនួយការគ្រូបង្វឹក សម្រាប់ប្រទេសហូឡង់ ពីឆ្នាំ ២០១២ ដល់ឆ្នាំ ២០១៤ និងជានាយកបាល់ទាត់នៅ PSG ពីឆ្នាំ ២០១៦ ដល់ ២០១៧ និងធ្លាប់ធ្វើជាជំនួយការនៅក្រុមជម្រើសជាតិហូឡង់ ផងដែរ៕