Rafaelson ក្លាយជាកីឡាករចូលសញ្ជាតិដំបូងគេ ដែលត្រូវបានកោះហៅចូលក្រុមជម្រើសជាតិវៀតណាម ក្នុងរយៈពេល ១៥ឆ្នាំ

Rafaelson ក្លាយជាកីឡាករចូលសញ្ជាតិដំបូងគេ ដែលត្រូវបានកោះហៅចូលក្រុមជម្រើសជាតិវៀតណាម ក្នុងរយៈពេល ១៥ឆ្នាំ

បន្ទាប់ពីសហព័ន្ធបាល់ទាត់ពិភពលោក (FIFA) អនុញ្ញាតឱ្យកីឡាករ Rafaelson ដែលមានឈ្មោះជាភាសាវៀតណាមថា Nguyen Xuan Son ពាក់អាវជម្រើសជាតិវៀតណាម លេងក្នុងពានរង្វាន់ AFF Cup 2024 ចាប់ពីថ្ងៃទី ២១ ខែធ្នូមក គ្រូបង្វឹក លោក Kim Sang-sik បានសម្រេចកោះហៅខ្សែប្រយុទ្ធដើមកំណើតប្រេស៊ីលរូបនេះ ចូលរួមក្នុងការប្រមូលផ្តុំហ្វឹកហាត់ជាមួយក្រុមជម្រើសជាតិវៀតណាម។

ការកោះហៅរបស់លោក Kim Sang-sik បានធ្វើឲ្យ កីឡាករ Rafaelson ក្លាយជាកីឡាករចូលសញ្ជាតិដំបូងគេ ដែលត្រូវបានកោះហៅចូលក្រុមជម្រើសជាតិវៀតណាម ក្នុងរយៈពេល ១៥ឆ្នាំ។ មែនទែនទៅ វៀតណាម ប្រើប្រាស់តែកីឡាករក្នុងស្រុកប៉ុណ្ណោះ ប៉ុន្តែបន្ទាប់ពីលទ្ធផលមិនគប់ប្រសើរមួយរយៈពេលចុងក្រោយនេះ បានធ្វើឲ្យវៀតណាម ងាកមកប្រើប្រាស់វិថីសាស្រ្តដូចប្រទេសឥណ្ឌូណេស៊ី ម៉ាឡេស៊ី និងកម្ពុជា ជាដើម ដោយនាំយកកីឡាករចូលសញ្ជាតិ។

ក្លឹប Nam Dinh របស់ Rafaelson នឹងប្រកួតចុងក្រោយនៃវគ្គចែកពូល AFC Champions League នៅថ្ងៃទី ៤ ខែធ្នូ បន្ទាប់មកទើបចូលទៅកាន់ជុំរុំហ្វឹកហាត់របស់វៀតណាម ប៉ុន្តែត្រូវរង់ចាំរហូតដល់ថ្ងៃទី ២០ ខែធ្នូ ដើម្បីបង្ហាញខ្លួនជាលើកដំបូង ស្របតាមបទប្បញ្ញត្តិរបស់ FIFA ស្តីពីរយៈពេលស្នាក់នៅ សម្រាប់កីឡាករដែលចូលសញ្ជាតិ។ ដូច្នេះ មានន័យថា Rafaelson នឹងអាចបង្ហាញខ្លួនក្នុងការប្រកួតជាមួយមីយ៉ាន់ម៉ា នៅកីឡដ្ឋាន Viet Tri នៅជុំចុងក្រោយ នៃវគ្គសន្សុំពិន្ទុក្នុងពូល B ។

សមត្ថភាបរបស់ Rafaelson ត្រូវបានទទួលស្គាល់យ៉ាងទូលំទូលាយ នៅក្នុង V-League ។ ខ្សែប្រយុទ្ធ ដែលកើតក្នុងឆ្នាំ ១៩៩៧រូបនេះ បានចំណាយពេលលេងបាល់ទាត់នៅវៀតណាម អស់រយៈពេល ៥ឆ្នាំ ដោយឈានដល់កម្រិតកំពូលក្នុងរដូវកាល 2023-24 ដោយស៊ុតបាន ៣១គ្រាប់ ក្នុងការបង្ហាញខ្លួន ២៦ប្រកួតក្នុង V-League និងបានបំបែកកំណត់ត្រាជាច្រើននៅទីនោះ។

ស្ទីលលេងរបស់គាត់ សមត្ថភាពក្នុងការប្រយុទ្ធមួយទល់នឹងមួយ និងការគ្រប់គ្រងបាល់ គឺជាគុណសម្បត្តិដែល Rafaelson ។ ក្រុមវៀតណាម បានខ្វះ “អ្នកប្រយុទ្ធ” ជាយូរយារណាស់មកហើយ ដែលពូកែការពារបាល់ ហើយអាចលេងបាល់វែង ដើម្បីរកគ្រាប់បាល់បាន។ ជាមួយនឹងកាយសម្បទាដ៏ល្អ Rafaelson គឺជាអ្វីគ្រប់យ៉ាង ដែលគ្រូបង្វឹក Kim Sang-sik ចង់បាន។

គួរបញ្ជាក់ថា ក្នុងពានរង្វាន់ ASEAN Mitsubishi Electric Cup 2024 ក្រុមជម្រើសជាតិវៀតណាម ស្ថិតក្នុងពូល B ជាមួយ ឥណ្ឌូណេស៊ី ហ្វីលីពីន មីយ៉ាន់ម៉ា និងឡាវ ខណៈកម្ពុជា ស្ថិតក្នុងពូល A ជាមួយ ក្រុមជម្រើសជាតិថៃ ម៉ាឡេស៊ី សិង្ហបុរី និងទីម័រខាងកើត៕