គិតត្រឹមខែតុលានេះ គម្រោងលើកកម្ពស់ការផ្គត់ផ្គង់ទឹកស្អាត សម្រេចវឌ្ឍនភាពការងារបាន ៣៦,៣៦%
គិតត្រឹមខែតុលានេះ គម្រោងលើកកម្ពស់ការផ្គត់ផ្គង់ទឹកស្អាត សម្រេចវឌ្ឍនភាពការងារបាន ៣៦,៣៦%
នាថ្ងៃទី៦ ខែវិច្ឆិកា ឆ្នាំ២០២៣ ឯកឧត្តមបណ្ឌិត រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែតុលា ពិនិត្យ និងវាយតម្លៃវឌ្ឍនភាពការងារនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានរបស់ធនាគារពិភពលោក។
ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានណែនាំឱ្យក្រុមហ៊ុនសាងសង់ និងក្រុមហ៊ុនទីប្រឹក្សាគម្រោងយកចិត្តទុកដាក់ខ្ពស់ និងគោរពតាមបទដ្ឋានបច្ចេកទេសនៃកិច្ចសន្យាឱ្យបានខ្ជាប់ខ្ជួន ធ្វើយ៉ាងណាឱ្យគម្រោងនេះបញ្ចប់តាមផែនការកំណត់ ប្រកបដោយប្រសិទ្ធភាពខ្ពស់។
យ៉ាងណាមិញ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានរបស់ធនាគារពិភពលោក គិតមកដល់ត្រឹម ខែតុលា ឆ្នាំ២០២៣នេះ បានសម្រេចវឌ្ឍនភាពការងារចំនួន ៣៦,៣៦% និងបានចំណាយពេលអនុវត្តគម្រោងជាង ៦៦%។
គួរជម្រាបថា កិច្ចប្រជុំវាយតម្លៃនេះ ធ្វើឡើងដោយមានការចូលរួមពីឯកឧត្តមអនុរដ្ឋលេខាធិការ នាយកគម្រោង ក្រុមហ៊ុនទទួលបន្ទុកការសាងសង់ ក្រុមហ៊ុនត្រួតពិនិត្យបច្ចេកទេស មន្ត្រីបច្ចេកទេសនៃអង្គភាពគ្រប់គ្រងគម្រោង ទីប្រឹក្សាបច្ចេកទេស និងមន្ត្រីជំនាញពាក់ព័ន្ឋផងដែរ៕
