ក្រសួងបរិស្ថានដាក់ចេញវិធានការទប់ស្កាត់បទល្មើសធនធានធម្មជាតិ
ក្រសួងបរិស្ថានដាក់ចេញវិធានការទប់ស្កាត់បទល្មើសធនធានធម្មជាតិ
កិច្ចខិតខំប្រឹងប្រែងរួមគ្នាដើម្បីផ្តល់អាទិភាពដល់និរន្តរភាពបរិស្ថាន ក្រសួងបរិស្ថានកំពុងចាត់ វិធានការដើម្បីដោះស្រាយឧក្រិដ្ឋកម្មធនធានធម្មជាតិ ដោយធានានូវការការពារជីវៈចម្រុះ និងធនធានធម្មជាតិដ៏សម្បូរបែបរបស់ប្រទេស។
គំនិតផ្តួចផ្តើមនេះគឺស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា ដែលសង្កត់ធ្ងន់លើនិរន្តរភាព កំណើនការងារ សមធម៌ និងប្រសិទ្ធភាព។
ដើម្បីសម្រេចបាននូវយុទ្ធសាស្ត្រនេះ ក្រសួងបរិស្ថានបានកំណត់នូវវិធានការសំខាន់ៗចំនួនបួន សំដៅគ្រប់គ្រងធនធានធម្មជាតិប្រកបដោយប្រសិទ្ធិភាព ការអភិរក្សជីវៈចម្រុះ និងការអភិវឌ្ឍន៍ប្រកបដោយចីរភាព។
វិធានការសំខាន់ទាំង៤រួមមាន៖
ទី១គឺ គ្មានការអត់ឱនចំពោះឧក្រិដ្ឋកម្មលើធនធានធម្មជាតិ ដោយក្រសួងប្តេជ្ញាធានាការអនុវត្តច្បាប់ពាក់ព័ន្ធឱ្យបានពេញលេញក្នុងគោលបំណងលុបបំបាត់វប្បធម៌ដែលមានស្រាប់ក្នុងការផ្តល់ការអប់រំ ការណែនាំ និងការបន្ធូរបន្ថយដល់បុគ្គលដែលប្រព្រឹត្តបទល្មើសធនធានធម្មជាតិ។ គោលជំហរម៉ឺងម៉ាត់នេះមានបំណងរារាំង និងដាក់ទោសទណ្ឌជនល្មើស និងការពារកុំឱ្យប៉ះពាល់ដល់បរិស្ថានថែមទៀត។
ទី២គឺ ការសហការជាមួយអាជ្ញាធរមូលដ្ឋាន៖ ក្នុងគោលបំណងទប់ស្កាត់បទល្មើសធនធានធម្មជាតិ ក្រសួងកំពុងជំរុញកិច្ចសហប្រតិបត្តិការជិតស្និទ្ធជាមួយគណៈបញ្ជាការឯកភាពរដ្ឋបាលរាជធានី-ខេត្ត ពិសេសអាជ្ញាធរមូលដ្ឋានដែលកំពុងប្រតិបត្តិការ នៅតាមមតំបន់ការពារ។
ទី៣គឺ ការប្រឆាំងអំពើពុករលួយ និងការអនុវត្តច្បាប់៖ ដោយក្រសួងបរិស្ថានកំពុងពង្រឹងកិច្ចខិត ខំប្រឹងប្រែងរបស់ខ្លួនប្រឆាំងនឹងឧក្រិដ្ឋកម្មធនធានធម្មជាតិ តាមរយៈកិច្ចសហប្រតិបត្តិការជាមួយអង្គភាពប្រឆាំងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស។
ទី៤គឺ ការដាំដើមឈើឡើងវិញ និងការគ្រប់គ្រងព្រៃឈើប្រកបដោយនិរន្តរភាព៖
ដើម្បីធានានិរន្តរភាពនៃធនធានធម្មជាតិរបស់កម្ពុជា ក្រសួងកំពុងផ្តោតលើការដាំដើមឈើឲ្យបាន ច្រើនជាងការកាប់បំផ្លាញ។
គោលដៅគឺដើម្បីបង្កើនគម្របព្រៃឈើឱ្យបាន 60% នៅឆ្នាំ 2050។ នេះនឹងមិនត្រឹមតែជួយដល់ ការអភិរក្សបរិស្ថានប៉ុណ្ណោះទេ ថែមទាំងជួយលើកកម្ពស់ជីវភាពរស់នៅរបស់ សហគមន៍មូលដ្ឋាន ផងដែរ។ ជាផ្នែកមួយនៃផែនការនេះ ក្រសួងបរិស្ថានបានផ្តួចផ្តើមយុទ្ធនាការដាំដើមឈើ ដែលបានចាប់ផ្តើមនៅថ្ងៃទី១០ ខែតុលា ដោយមានគោលបំណងដាំដើមឈើឱ្យបានយ៉ាងហោច ណាស់ ១លានដើមក្នុងមួយឆ្នាំ ចាប់ពីឆ្នាំ២០២៤។
ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានស្វាគមន៍ និងលើកទឹកចិត្តដល់អង្គការ ដៃគូក្នុងស្រុក និងបរទេស សហការគ្នាក្នុងកិច្ចខិតខំប្រឹងប្រែងនេះ។ កិច្ចខិតខំប្រឹងប្រែងរួមគ្នា នេះមានគោលបំណងពង្រីកគម្របព្រៃឈើតាមរយៈការដាំដើមឈើ។
ឯកឧត្តមរដ្ឋមន្ត្រីបានសង្កត់ធ្ងន់លើសារៈសំខាន់នៃដើមឈើដែលមានតម្លៃសេដ្ឋកិច្ចខ្ពស់ ដែលជាប្រភពអាហារ និងឱកាសសម្រាប់លក់។ គំនិតផ្តួចផ្តើមនេះមិនត្រឹមតែការពារ និងថែរក្សាព្រៃឈើរបស់យើងប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់ កិច្ចខិតខំប្រឹងប្រែងកាត់បន្ថយការប្រែប្រួលអាកាសធាតុពិភពលោកផងដែរ៕
