ក្រសួងបរិស្ថាន និងអង្គការសម្ព័ន្ធមិត្តសត្វព្រៃ បន្តពង្រឹងភាពជាដៃគូអភិវឌ្ឍ និងចូលរួមគាំទ្រក្នុងយុទ្ធសាស្រ្តចក្រារបស់ក្រសួង
ក្រសួងបរិស្ថាន និងអង្គការសម្ព័ន្ធមិត្តសត្វព្រៃ បន្តពង្រឹងភាពជាដៃគូអភិវឌ្ឍ និងចូលរួមគាំទ្រក្នុងយុទ្ធសាស្រ្តចក្រារបស់ក្រសួង
ភ្នំពេញ : រដ្ឋមន្រ្តីក្រសួងបរិស្ថាន កាលពីថ្ងៃទី២៥ ខែកញ្ញា ឆ្នាំ២០២៣ ម្សិលមិញនេះបានអនុញ្ញាតឱ្យលោកស្រីបណ្ឌិត Suwanna Gauntlett នាយិកាប្រតិបត្តិនៃអង្គការសម្ព័ន្ធមិត្តសត្វព្រៃ Wildlife Alliance ចូលជួបសម្តែងការគួរសម និង ពិភាក្សាការងារនាទីស្តីការក្រសួង។
ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងអំណរគុណចំពោះលោកស្រីបណ្ឌិត ក្នុងកិច្ចសហការ និងភាពជាដៃគូអភិវឌ្ឍកន្លងមក ហើយឯកឧត្តមក៏បានលើកឡើងពីយុទ្ធសាស្រ្តចក្រា ដែលក្រសួងបាន និងកំពុងអនុវត្តនៅក្នុងដំណាក់កាលទី១ នៃយុទ្ធសាស្រ្តបញ្ចកោណរបស់រាជរដ្ឋាភិបាល។
ក្នុងយុទ្ធសាស្ត្ររបស់ក្រសួងនោះរួមមាននូវយុទ្ធនាការបន្តបន្ទាប់ទៀតដូចជា យុទ្ធនាការកាត់បន្ថយថង់ប្លាស្ទិកនៅតាមសាលារៀន (កំពុងបន្តទៅតាមបណ្តារោងចក្រផ្សេងៗ) យុទ្ធនាការផ្តល់ដើមឈើចំនួនជាង ១លានដើមជូនប្រជាពលរដ្ឋដែលមានតម្រូវការដាំ និងការលើកស្ទួយជីវភាពប្រជាសហគមន៍ តាមរយៈការជំរុញឱ្យមានក្រុមហ៊ុនវិនិយោគនៅក្នុងតំបន់ ដែលអាចជួយឱ្យប្រជាពលរដ្ឋ រកចំណូលបានពីក្រុមហ៊ុនវិនិយោគទាំងនោះ ដូចជាជំរុញឱ្យប្រជាពលរដ្ឋដាំឬស្សី ហើយលក់ឬស្សីឱ្យក្រុមហ៊ុនយកទៅកែច្នៃធ្វើជាគ្រឿងសង្ហារឹមជាដើម។
លើសពីនេះក្រសួងក៏បានជំរុញឱ្យមានការដាំដុះដំណាំហូបផ្លែ ដាំស្រូវ និងដំណាំរួមផ្សំផ្សេងៗទៀត ហើយការធ្វើបែបនេះជាលទ្ធផល ប្រជាពលរដ្ឋមិនចូលព្រៃរកអនុផលព្រៃឈើដូចមុន ក៏ពួកគេអាចមានអាហារហូបចុក និងជីវភាពល្អប្រសើរផងដែរ។
លោកស្រីបណ្ឌិត Suwanna Gauntlett បានសម្តែងមោទនភាពចំពោះលទ្ធផលដែលសម្រេចបានលឿន និងឆាប់រហ័សនេះចំពោះលោកស្រីបណ្ឌិតផ្ទាល់ នឹងបន្តជាដៃគូអភិវឌ្ឍជាមួយក្រសួងបរិស្ថានបន្តទៀត ហើយនឹងចូលរួមគាំទ្រ ក្នុងយុទ្ធសាស្រ្តចក្រារបស់ក្រសួង ដើម្បីជំរុញការអភិវឌ្ឍគ្រប់ជ្រុងជ្រោយ៕
