គម្រោងធ្វើឱ្យប្រសើរឡើងវិញនូវផ្លូវជាតិលេខ៥ សម្រេចបានជាង ៩០%ហើយ

គម្រោងធ្វើឱ្យប្រសើរឡើងវិញនូវផ្លូវជាតិលេខ៥ សម្រេចបានជាង ៩០%ហើយ

គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង​បច្ចុប្បន្ន សម្រេចលទ្ធផលបានជាង៩០%ហើយ ខណៈដែលគម្រោងស្ថាបនាស្ពានវាងក្រុងពោធិ៍សាត់ ដែលជាស្ពានធំមាន រហូតដល់ទៅ ៤គន្លង (២គន្លងទៅ និង២គន្លងមក) កំពុងត្រូវបានយកចិត្តទុកដាក់ពន្លឿនការស្ថាបនា ដោយរំពឹងថានឹងរួចរាល់ដំណាលគ្នា។ នេះបើតាមការចុះផ្សាយរបស់ក្រសួងសាធារណៈការ និងដឹក ជញ្ជូន។

ដោយឡែក ការចុះផ្សាយរបស់ក្រសួងនេះដែរធ្វើឡើងក្រោយពេលដែលឯកឧត្តមរដ្ឋមន្ត្រីក្រសួងសាធារណៈការចុះទៅពិនិត្យគម្រោងធ្វេីឱ្យប្រសេីរឡេីងកំណាត់ផ្លូវជាតិលេខ៥ ព្រែកក្តាម-ធ្លាម្អម ស្ពានវាងក្រុងពោធិ៍សាត់​ និងការកែលម្អបរិស្ថាន និងសណ្តាប់ធ្នាប់លើដីចំណីផ្លូវ ក្នុងខេត្តកំពង់ឆ្នាំង នាថ្ងៃទី១៣ ខែកញ្ញាម្សិលមិញនេះ។

បើតាមការឱ្យដឹងបន្ថែមពីក្រសួង គម្រោងកែលម្អកំណាត់ផ្លូវជាតិលេខ៥នេះ ធ្វើឡើងក្នុងគោលបំណងសម្រួលដល់ការធ្វើចរាចរណ៍របស់បងប្អូនប្រជាពលរដ្ឋ និងទេសចរណ៍​ ពិសេសកាត់បន្ថយ​ការកកស្ទះនៅទីប្រជុំជនក្រុងពោធិ៍សាត់។

ក្នុងនោះផងដែរ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានដឹកនាំ​គណៈប្រតិភូក្រសួង ចុះត្រួតពិនិត្យគម្រោងកែលម្អបរិស្ថាន និងសណ្តាប់ធ្នាប់លើដីចំណីផ្លូវ មុខសាលារៀនជ្រៃបាក់ ក្នុងខេត្តកំពង់ឆ្នាំង ដែលជាគម្រោងសាកល្បង (Pilot Project) របស់ទីភ្នាក់​ងារសហប្រតិបត្តិការ អន្តរជាតិជប៉ុន ប្រចាំនៅកម្ពុជា JICA បានបញ្ចប់ការសាងសង់ក្នុងឆ្នាំ២០១៩។

គួរបញ្ជាក់ថា គម្រោងធ្វេីឱ្យប្រសេីរឡេីងផ្លូវជាតិលេខ៥ (ផ្លូវអាស៊ានហាយវេលេខ១) ជាគម្រោងដែលស្ថាបនាផ្លូវប្រវែង ៣៦៦គីឡូម៉ែត្រ នឹងឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ ការស្ថាបនាគឺមានចំណុចចាប់ផ្ដើមចេញពីព្រែកក្តាម
និងចំណុច​បញ្ចប់នៅក្រុងប៉ោយប៉ែត ខេត្តបន្ទាយមានជ័យ។

យ៉ាងណាមិញ ក្នុងការសាងសង់ និងស្ថាបនា គេបានបែងចែកផ្លូវនេះជា៣កំណាត់គឺ​
កំណាត់ទី១ ភាគខាងជើង (បាត់ដំបង-សិរីសោភ័ណ) កំណាត់ទី២ ភាគខាងត្បូង (ព្រែកក្តាម-ធ្លាម្អម) និងកំណាត់ទី៣ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត)។

គម្រោងនេះផងដែរ មានទំហំទឹកប្រាក់សរុបប្រមាណ ៥០០លានដុល្លារសហរដ្ឋអាមេរិក
ហើយដែលវានឹងផ្តល់អត្ថប្រយោជន៍យ៉ាងធំធេងដូចជា៖ អាចបង្កើនការនាំចេញ-នាំចូល និងជាផ្លូវ​មួយប្រកបដោយសក្តានុពលខ្ពស់សម្រាប់បម្រើវិស័យសេដ្ឋកិច្ចកម្ពុជា ពិសេសអាចកាត់ បន្ថយគ្រោះ​ថ្នាក់ និងការកកស្ទះចរាចរណ៍បានយ៉ាងច្រើន។ លើសពីនេះទៅទៀត ប្រជាពលរដ្ឋតាម​ដងផ្លូវនេះ នឹងមានជីវភាពកាន់តែល្អប្រសើរតាមរយៈកំណើននៃការអភិវឌ្ឍ វិនិយោគ និងទេសចរណ៍៕