អ្នកនាំពាក្យក្រសួងកសិកម្ម៖ ការឡើងថ្លៃនៃស្រូវអង្ករមិនប៉ះពាល់ដល់សន្តិសុខស្បៀងនោះទេ
អ្នកនាំពាក្យក្រសួងកសិកម្ម៖ ការឡើងថ្លៃនៃស្រូវអង្ករមិនប៉ះពាល់ដល់សន្តិសុខស្បៀងនោះទេ
យោងតាមសេចក្តីប្រកាសព័ត៌មានរបស់ សហព័ន្ធស្រូវអង្ករកម្ពុជាបានឱ្យដឹងថា តម្លៃស្រូវនៅកម្ពុជាបានហក់ឡើងជាបន្តបន្ទាប់ ដោយគិតត្រឹមថ្ងៃទី៧ ខែសីហា តម្លៃស្រូវបានកើនឡើងចន្លោះពី ១២០០រៀលដល់ ១៣០០រៀល ក្នុងមួយគីឡូក្រាម។
ការហក់ឡើងនៃតម្លៃស្រូវ អង្ករនេះបានបង្កជាការកត់សម្គាល់មួយ ខណៈដែលនេះជាតម្លៃខ្ពស់មួយក្នុងរយៈពេល៣ឆ្នាំចុងក្រោយ។ វាក៏បានបង្កជាការព្រួយបារម្ភដល់ប្រជាជន ចំពោះអស្ថេរភាពនៃសន្តិ សុខស្បៀងក្នុងប្រទេស ក្នុងអំឡុងពេលដែលសេដ្ឋកិច្ចពិភពលោកកំពុងជួបប្រទះបញ្ហាផង។
ប៉ុន្តែយ៉ាងណា អ្នកនាំពាក្យក្រសួងកសិកម្មនាពេលថ្មីៗនេះបានអះអាងថា ការឡើងថ្លៃនៃស្រូវ អង្ករក្នុងរយៈពេលចុងក្រោយនេះ នៅមិនតាន់អាចបង្កជាបញ្ហាប្រឈម ឬហានិភ័យណាមួយដល់ សន្តិសុខស្បៀងនៅកម្ពុជានោះទេ។
ជំទាវ អ៊ឹម រចនា អ្នកនាំពាក្យក្រសួងកសិកម្មបានបន្តឱ្យដឹងថា៖ «នៅក្រសួង យើងមានយន្ដការ ច្បាស់លាស់នៅក្នុងការធ្វើ Projection ការតាមដាន អង្កេត និងវិភាគរវាងទិន្នផលស្រូវដែលប្រមូល បាន និងការនាំចេញស្រូវអង្ករទៅកាន់ទីផ្សារអន្តរជាតិ»។
អ្នកនាំពាក្យរូបនេះបន្តថា យន្ដការនេះដាក់ចេញដើម្បីធានា ធ្វើយ៉ាងណារក្សាឱ្យបាននូវសន្តិសុខស្បៀង ជាពិសេសគឺរក្សាស្ថេរភាពតម្លៃអង្ករនៅលើទីផ្សារក្នុងស្រុក។ ជាការពិតហើយថានៅពេលឡើងថ្លៃ អង្ករក៏ត្រូវឡើងថ្លៃដោយជៀសពុំរួច ប៉ុន្តែបើពិនិត្យមើលពីតម្លៃវិញ ក្រសួងសង្កេតឃើញថា ការឡើងថ្លៃនេះវាស្ថិតក្នុងកម្រិតមួយដែលអាចគ្រប់គ្រងបាន ហើយក្រសួងនឹងបន្តតាមដានយ៉ាងយកចិត្តទុកដាក់បន្តទៀត។
ជំទាវ អ៊ឹម រចនា បានបញ្ជាក់ទៀតថា៖ «ការឡើងថ្លៃអង្ករនៅលើទីផ្សារនេះ វាជាទីផ្សារសកល មិនមែនកើតមានតែនៅកម្ពុជាទេ មានន័យថាប្រទេសផ្សេងទៀតក៏ជួបប្រទះបញ្ហានេះដូចគ្នាដែរ»។
កាលពីដើមខែសីហាកន្លងទៅនេះដែរ ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានបញ្ជាក់ថា បើទោះបីជាបច្ចុប្បន្ននេះតម្លៃស្រូវកើនឡើង និងជំរុញឱ្យតម្លៃអង្ករនៅលើទីផ្សារកើនឡើងក៏ដោយ ប៉ុន្តែមិនមែនស្ថិតក្នុងស្ថានភាពដែលគួរឱ្យព្រួយបារម្ភខ្លាំងនោះទេ ដោយនេះគឺជាចរន្តនៃការប្រែប្រួលថ្លៃទៅតាមតម្រូវការ និងការផ្គត់ផ្គង់ប៉ុណ្ណោះ។
ឯកឧត្តមបន្តថា ប្រសិនបើអង្ករឡើងថ្លៃ ដល់កម្រិតមួយដែលប៉ះពាល់ដល់ជីវភាពប្រជាពលរដ្ឋ ក្រសួង ពាណិជ្ជកម្មដែលមានក្រុមហ៊ុន ហ្រ្គីនត្រេដ ដែលជាសហគ្រាសទទួលបន្ទុកគ្រប់គ្រងសន្និធិស្បៀងត្រៀមបម្រុងយុទ្ធសាស្ត្ររបស់រាជរដ្ឋាភិបាល នឹងមានវិធានការសមស្របទៅតាមករណីឡើងថ្លៃ ប៉ុន្តែក្នុងពេលបច្ចុប្បន្ននេះ មិនទាន់ដល់ដំណាក់កាលដែលត្រូវអនុវត្តនៅឡើយទេ។
អ្នកនាំពាក្យរូបនេះនៅតែអំពាវនាវជាថ្មីដល់បងប្អូនប្រជាពលរដ្ឋ កុំឱ្យមានការភិតភ័យ ព្រួយបារម្ភ ខ្លាំងពេក ដែលអាចនាំឱ្យខាតប្រយោជន៍ជាតិទៅវិញ៕
