ដំណាំទំពាំងបារាំង មានទីផ្សារល្អ ផ្ដល់ផលប្រយោជន៍ចំពោះសុខភាព
ដំណាំទំពាំងបារាំង មានទីផ្សារល្អ ផ្ដល់ផលប្រយោជន៍ចំពោះសុខភាព
ទំពាំងបារាំងជាដំណាំបន្លែមួយប្រភេទដែលមានអាយុកាលដាំដុះវែង អាចចាប់ផ្តើមប្រមូលផលក្រោយពីដាំដុះបាន ៥-៦ខែ ហើយអាចបន្តប្រមូលផលបានយូរឆ្នាំ។
ដំណាំទំពាំងបារាំង ភាគច្រើនមានដាំដុះនៅខេត្តមួយចំនួនដូចជា ប៉ៃលិន បាត់ដំបង ត្បូងឃ្មុំ កំពង់ឆ្នាំង និងខេត្តតាកែវ។ រីឯដីដែលល្អសម្រាប់ការដាំដុះ គឺជាដីដែលមិនជាំទឹក ហើយដំណាំប្រភេទនេះមិនត្រូវការសារធាតុចិញ្ចឹមច្រើនដូចដំណាំផ្សេងៗទៀតទេ។
ទំពាំងបារាំងក៏ជាប្រភេទដំណាំដែលធន់នឹងអាកាសធាតុរាំងស្ងួត ប៉ុន្តែក៏ទាមទារការថែទាំយកចិត្តទុកដាក់ខ្ពស់ ដោយត្រូវការប្រើប្រាស់កម្លាំងពលកម្មច្រើនសម្រាប់សម្អាតស្មៅ ស្រោចស្រព និងការប្រមូលផលពន្លករៀងរាល់ថ្ងៃ និងមិនអាចទុកពន្លកទំពាំងឱ្យចាស់បានទេ។
លោកស្រី លឹម សុភាព កសិករដែលដាំដុះទំពាំងបារាំងនៅក្នុងខេត្តប៉ៃលិន បានចែករំលែកពីបទពិសោធន៍ក្នុងការដាំដុះរបស់ខ្លួនដោយថា ការដាំដុះលក្ខណៈអាជីវកម្ម នឹងត្រូវការផ្ទៃដីដាំដុះធំជាងដំណាំបន្លែទូទៅ ព្រោះក្នុងមួយគុម្ពអាចប្រមូលផលបានត្រឹម ១-៥ដើមក្នុងមួយដង ហើយត្រូវចំណាយដើមទុនច្រើនសម្រាប់ការដាំដុះដំបូង។
កសិកររូបនេះបានឱ្យដឹងទៀតថា៖ «ការចំណាយការដាំដុះទំពាំងបារាំងលើផ្ទៃដី ២ ៤០០ម៉ែតក្រឡា ត្រូវការដើមទុនប្រហែល ៩ លានរៀល សម្រាប់ការចំណាយលើការរៀបប្រព័ន្ធស្រោចស្រព សម្ភារៈ កម្លាំងពលកម្ម និងជីជាដើម»។
យ៉ាងណាមិញ អ្នកស្រីបានបញ្ជាក់បន្ថែមថា ទីផ្សារទំពាំងបារាំងកាលពីប៉ុន្មានឆ្នាំមុនមានភាពលំបាកក្នុងការលក់ ថ្វីត្បិតថាគេមិនទាន់ស្គាល់ ប៉ុន្តែសម្រាប់បច្ចុប្បន្នបន្លែទំពាំងមានទីផ្សារល្អ ងាយស្រួលលក់ និងមានតម្លៃថ្លៃ ដោយទំពាំងមួយគីឡូក្រាមមានតម្លៃចាប់ពី ១១,០០០ទៅ ១៣,០០០រៀល អាស្រ័យទៅតាមរដូវកាល។
សម្រាប់ទីផ្សារវិញ គឺភាគច្រើនអ្នកស្រី លក់ទៅកាន់ទីផ្សារក្នុងស្រុក និងមួយផ្នែកផ្គត់ចូលទីផ្សារក្នុងរាជធានីភ្នំពេញ តាមរយៈការប្រមូលទិញពីសំណាក់ផ្សារទំនើបនានា។
គួរបញ្ចាក់ថា ដំណាំទំពាំងបារាំងមានអត្ថប្រយោជន៍ច្រើនសម្រាប់ជួយដល់សុខភាពមនុស្សដូចជា៖ ជួយលាងសម្អាត ជាតិពុលក្នុងសសៃឈាម ជួយកាត់បន្ថយជំងឺទឹកនោមផ្អែម ជួយប្រឆាំងនឹងជំងឺមហារីក និងជួយសម្រួលដល់ការបន្ទោបង់ជាដើម៕
