បេឡារូស ចាប់ផ្តើមហ្វឹកហាត់ពីរបៀបប្រើប្រាស់មីស៊ីលដែលអាចបំពាក់ក្បាលនុយក្លេអ៊ែរ
បេឡារូស ចាប់ផ្តើមហ្វឹកហាត់ពីរបៀបប្រើប្រាស់មីស៊ីលដែលអាចបំពាក់ក្បាលនុយក្លេអ៊ែរ
បរទេស៖ The Newsweek ថ្ងៃនេះបានចេញផ្សាយថា កងកម្លាំងយោធានៃប្រទេសបេឡារូសបានចាប់ផ្តើមធ្វើការហ្វឹកហាត់ជាមួយនឹងមីស៊ីលឆ្លងទ្វីបប្រទេស Iskander ហើយ ដែលមីស៊ីលនេះត្រូវបានគេដឹងថាមានសមត្ថភាពបំពាក់ជាមួយនឹងក្បាលគ្រាប់នុយក្លេអ៊ែរផងដែរ។
ប្រភពដដែលបានឲ្យដឹងទៀតដែរថា សកម្មភាពរបស់យោធាបេឡារូសធ្វើឡើងនៅក្នុងពេលដែលកងម្លាំងយោធារបស់ប្រទេសរុស្ស៊ីកំពុងធ្វើសកម្មភាពវាយលុកទៅលើកងកម្លាំងយោធាអ៊ុយក្រែន នៅត្រង់តំបន់ច្រកព្រំដែនភាគខាងជើងរបស់ប្រទេស។
ក្រសួងការពារជាតិរុស្ស៊ីបានប្រកាសនៅលើបណ្តាញ Telegram ផ្លូវការរបស់ខ្លួនកាលពីថ្ងៃម្សិលមិញថា កងកម្លាំងបេឡារូស បានចាប់ផ្តើមធ្វើការហ្វឹកហាត់នៅតំបន់ភូមិភាគខាងត្បូងរបស់រុស្ស៊ីតាំងពីដើមខែមេសា មកម្ល៉េះជាមួយនឹងមីស៊ីលប្រភេទ Iskander ដែលមានសមត្ថភាពបំពាក់ជាមួយនឹងក្បាលគ្រាប់នុយក្លេអ៊ែរ។
ប្រធានាធិបតីរុស្ស៊ី Vladimir Putin កាលពីខែមិនាបានថ្លែងរួចមកហើយថា អាវុធនុយក្លេអ៊ែរបែបយុទ្ធសាស្ត្រ នឹងត្រូវដាក់ពង្រាយទៅកាន់ប្រទេសបេឡារូសដែលវាត្រូវបានក្រុមអ្នកជំនាញនយោបាយមើលឃើញថាវិធីសាស្ត្រមួយរបស់វិមានក្រឹមឡាំង ក្នុងការធ្វើឱ្យការគាំទ្ររបស់លោកខាងលិចចុះខ្សោយចំពោះអ៊ុយក្រែនតាមរយៈការប្រើការគំរាមកំហែងដោយគ្រាប់នុយក្លេអ៊ែរ។
ទោះបីជាយ៉ាងណាក្តី លោក Putin មិនបានបញ្ជាក់លំអិតឲ្យដឹងទេថា អាវុធទាំងនោះនឹងត្រូវដឹកជញ្ជូនទៅប្រទេសបេឡារូសនៅពេលណានោះទេប៉ុន្តែទីតាំងសម្រាប់ស្តុកផ្ទុកក្បាលគ្រាប់នឹងត្រូវបញ្ចប់ការសាងសង់រួចរាល់នៅខែកក្កដា៕
