គ.ជ.ប ៖ ការបោះឆ្នោតជ្រើសរើសក្រុមប្រឹក្សាក្រុង-ស្រុកថ្មីចំនួន៥ ប្រព្រឹត្តទៅដោយពុំមានភាពមិនប្រក្រតីណាមួយកើតឡើងទេ
គ.ជ.ប ៖ ការបោះឆ្នោតជ្រើសរើសក្រុមប្រឹក្សាក្រុង-ស្រុកថ្មីចំនួន៥ ប្រព្រឹត្តទៅដោយពុំមានភាពមិនប្រក្រតីណាមួយកើតឡើងទេ
ភ្នំពេញ ៖ ឯកឧត្តម ប្រាជ្ញ ចន្ទ ប្រធាន គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា ដំណើរការនៃការបោះឆ្នោតលើកទី១ ក្នុងការបោះឆ្នោតជ្រើសរើសក្រុមប្រឹក្សាក្រុង ស្រុក ចំនួន ៥ ដែលទើបបំបែក និងបង្កើតថ្មី កាលពីថ្ងៃអាទិត្យ កន្លងទៅនេះ បានប្រព្រឹត្តទៅពុំមានបាតុភាព ឬភាពមិនប្រក្រតីណាមួយកើតឡើងទេ។
កាលពីអាទិត្យ ទី៩ ខែមេសា ឆ្នាំ២០២៣ វេលាម៉ោង ៤:៣០ នាទី នៅសាលសន្និសីទ របស់ គ.ជ.ប មានបើកកិច្ចប្រជុំក្រោមអធិបតីភាព ដ៏ខ្ពង់ខ្ពស់របស់ ឯកឧត្តម ប្រាជ្ញ ចន្ទ ប្រធាន គ.ជ.ប ដើម្បីប្រកាសផ្សព្វផ្សាយអំពីព្រឹត្តិការណ៍ទូទៅនៃការបោះឆ្នោតលើកទី១ ក្នុងការបោះឆ្នោតជ្រើសរើសក្រុមប្រឹក្សាក្រុង ស្រុក ចំនួន ៥ ដែលទើបបំបែក និងបង្កើតថ្មី។
ឯកឧត្តម ប្រាជ្ញ ចន្ទ បានគូសបញ្ជាក់អំពីសភាពការណ៍មួយចំនួន និងស្ថាន ភាពនៃការបោះឆ្នោតលើកទី ១ (ការបោះឆ្នោតឡើងវិញ)ថា មានគណបក្សនយោបាយចំនួន ២ បានដាក់ភ្នាក់ងារគណបក្សរបស់ខ្លួនដើម្បីសង្កេតមើលនៅតាមការិយាល័យបោះឆ្នោត និងរាប់សន្លឹកឆ្នោត គឺគណបក្សប្រជាជនកម្ពុជា និងគណបក្ស ភ្លើងទៀន។ ភ្នាក់ងារគណបក្សនយោបាយសរុបមានចំនួន ២០ នាក់ ក្នុងនោះពេញសិទ្ធិចំនួន ១០ នាក់ (ស្រី ៤ នាក់) និងបម្រុង ១០ នាក់ (ស្រី ៥ នាក់)។ ចំពោះ អ្នកសង្កេតការណ៍ មានអ្នកសង្កេតការណ៍ជាតិ ចំនួន ៤៣ នាក់ ភ្ញៀវពិសេស ១ នាក់ និងអ្នកសារ-ព័ត៌មាន ៤២ នាក់ ។
ឯកឧត្តម ប្រាជ្ញ ចន្ទ ប្រធាន គ.ជ.ប បានបន្តថា ដំណើរការបោះឆ្នោតបានប្រព្រឹត្តទៅនៅ ថ្ងៃអាទិត្យ ទី៩ ខែមេសា ឆ្នាំ២០២៣ មានចំនួន ៥ ការិយាល័យបោះឆ្នោត ដោយចាប់ផ្តើមពី ម៉ោង ៧:០០ ព្រឹក រហូតដល់ម៉ោង ៨:២៥ នាទីព្រឹក។ ការបោះឆ្នោតនេះត្រូវបានបញ្ចប់ ដោយអ្នក បោះឆ្នោតចំនួន ២៤៦ នាក់ ( ស្រី ៤៩ នាក់) បានចេញទៅបោះឆ្នោតគ្រប់ចំនួន ស្មើនឹង ១០០% ។ ដំណើរការបោះឆ្នោតនេះ បានប្រព្រឹត្តទៅ ពុំមានបាតុភាព ឬភាពមិនប្រក្រតីណាមួយកើតឡើងទេ។
ពាក់ព័ន្ធនឹងលទ្ធផលបោះឆ្នោត ឯកឧត្តម ប្រាជ្ញ ចន្ទ ប្រធាន គ.ជ.ប បានមានប្រសាសន៍ ថា បន្ទាប់ពីបិទការបោះឆ្នោត ដំណើរការរាប់សន្លឹកឆ្នោត បានចាប់ផ្តើមភ្លាមៗនៅនឹងកន្លែងតាមនីតិវិធី។ បន្ទាប់មក គណៈកម្មការការិយាល័យបោះឆ្នោត បានបំពេញកំណត់ហេតុនៃការរាប់ សន្លឹកឆ្នោត (ទម្រង់ ១១០២) រួចបិទផ្សាយភ្លាមនៅមុខការិយាល័យរាប់សន្លឹកឆ្នោតនីមួយៗ និងផ្ដល់ជូនភ្នាក់ងារគណបក្សនយោបាយដែលមានវត្តមាន។
ឯកឧត្តម ប្រាជ្ញ ចន្ទ ប្រធាន គ.ជ.ប បានបញ្ជាក់ជូនទៀតថា យន្តការនៃការទទួល និងការប្រកាសផ្សាយលទ្ធផលបឋមនឹងត្រូវអនុវត្តតាមគោលការណ៍ និងបទពិសោធន៍នៃការបោះឆ្នោត ជ្រើសរើសក្រុមប្រឹក្សា អាណត្តិទី៣ ឆ្នាំ២០១៩ កន្លងមក។ ហើយលទ្ធផលបឋមនៃការបោះឆ្នោត ជ្រើសរើសក្រុមប្រឹក្សាក្រុងអរិយក្សត្រ ក្រុងសំពៅពូន នៃខេត្តកណ្តាល ក្រុងឧដុង្គម៉ែជ័យ ស្រុក សាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យ នៃខេត្តក្រចេះ នឹងប្រកាសផ្សាយនៅ ល្ងាចថ្ងៃបោះឆ្នោតនេះតែម្ដង បន្ទាប់ពីចប់កិច្ចប្រជុំជាមួយភាគីពាក់ព័ន្ធ ដោយផ្សាយចេញពី គ.ជ.ប និងស្នើសុំកិច្ចសហការជាមួយប្រព័ន្ធផ្សព្វផ្សាយរបស់រដ្ឋដើម្បីផ្សព្វផ្សាយបន្តជាសធារណៈ។ ទន្ទឹមនឹង នេះ លទ្ធផលបឋមនៃការបោះឆ្នោតនេះ ក៏មានបង្ហោះនៅលើគេហទំព័ររបស់ គ.ជ.ប ផងដែរ។
ឆ្លើយទៅនឹងសំណួររបស់ភាគីចូលរួមក្នុងកិច្ចប្រជុំ ពាក់ព័ន្ធនឹងបណ្ដឹងទៅនឹងការបោះឆ្នោត និងលទ្ធផលនៃការបោះឆ្នោត គ.ជ.ប បានបញ្ជាក់ជូនថា នៅថ្ងៃបោះឆ្នោតនេះពុំមានភាពមិនប្រក្រតី ឬបណ្តឹងពាក់ព័ន្ធនឹងការបោះឆ្នោតទេ ប៉ុន្តែគណបក្សនយោបាយមានសិទ្ធិប្ដឹងអំពីភាពមិនប្រក្រតី ឬប្តឹងតវ៉ា ឬជំទាស់ទៅនឹងលទ្ធផលនៃការបោះឆ្នោតទៅគណៈកម្មការខេត្តរៀបចំការបោះឆ្នោតពាក់ព័ន្ធ ពីរថ្ងៃទៀតបន្ទាប់ពីថ្ងៃបោះឆ្នោត គឺត្រឹមថ្ងៃទី១១ ខែមេសានេះ ។ ប្រសិនបើគ្មានបណ្ដឹងទេ នោះ គណៈកម្មការខេត្តរៀបចំការបោះឆ្នោតនឹងបូកសរុបលទ្ធផលបោះឆ្នោតតាមនីតិវិធី រួចបញ្ជូនមក គ.ជ.ប។
មុននឹងបញ្ចប់កិច្ចប្រជុំ ឯកឧត្តម ប្រាជ្ញ ចន្ទ ប្រធាន គ.ជ.ប បានឱ្យដឹងទៀតថា អង្គបោះឆ្នោត អាជ្ញាធរមានសមត្ថកិច្ចគ្រប់លំដាប់ថ្នាក់ មន្ត្រីបោះឆ្នោតគ្រប់លំដាប់ថ្នាក់ គណបក្សនយោបាយ និងភាគីពាក់ព័ន្ធទាំងអស់ បានចូលរួម និងសហការអនុវត្តតាមភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ដើម្បីបង្កលក្ខណៈឱ្យការបោះឆ្នោតឡើងវិញ ប្រព្រឹត្តទៅ ដោយជោគជ័យ និងប្រកបដោយសន្តិសុខ សុវត្ថិភាព និងសណ្ដាប់ធ្នាប់សាធារណៈ គ្មានអំពើហឹង្សា គ្មានការគំរាមកំហែង ៕
