អាហ្វហ្គានីស្ថានចោទប៉ាគីស្ថាន វាយប្រហារកាប៊ុល ស្លាប់ជាង ៤០០នាក់ ខណៈអ៊ីស្លាម៉ាបាដ បដិសេធ

អាហ្វហ្គានីស្ថានចោទប៉ាគីស្ថាន វាយប្រហារកាប៊ុល ស្លាប់ជាង ៤០០នាក់ ខណៈអ៊ីស្លាម៉ាបាដ បដិសេធ

Kabul, Afghanistan (Reuters) ៖អាហ្វហ្គានីស្ថានបានអះអាងថា ប៉ាគីស្ថានបានវាយប្រហារលើមជ្ឈមណ្ឌលស្តារនីតិសម្បទាមួយនៅទីក្រុងកាប៊ុល បណ្តាលឲ្យមនុស្ស ៤០៨នាក់ស្លាប់។

ទោះជាយ៉ាងណា ទីក្រុងអ៊ីស្លាម៉ាបាដ បានច្រានចោលការអះអាងនេះ ដោយបញ្ជាក់ថា ព័ត៌មានអំពីការស្លាប់មនុស្សជាង ៤០០នាក់ និងរងរបួស ២៦៥នាក់ ក្នុងការវាយប្រហារតាមអាកាសលើមជ្ឈមណ្ឌលស្តារនីតិសម្បទាគ្រឿងញៀននៅកាប៊ុល គឺមិនត្រឹមត្រូវឡើយ។

អ្នកនាំពាក្យរដ្ឋាភិបាលតាលីបង់ អាហ្វហ្គានីស្ថានបាននិយាយនៅថ្ងៃអង្គារនេះថា ឧប្បត្តិហេតុនេះគឺជាហេតុការណ៍ដ៏សាហាវបំផុត ចាប់តាំងពីការប៉ះទង្គិចគ្នារវាងភាគីទាំងពីរ បានចាប់ផ្តើមកាលពីខែតុលា ឆ្នាំមុន។

យ៉ាងនេះក្តី ប៉ាគីស្ថានបានច្រានចោលសេចក្តីថ្លែងការណ៍នេះ ដោយហៅថាជាព័ត៌មានភាន់ច្រឡំ និងបំភាន់សាធារណៈ ហើយបានបញ្ជាក់ថា ខ្លួនបានវាយប្រហារយ៉ាងច្បាស់លាស់លើគោលដៅយោធា និងហេដ្ឋារចនាសម្ព័ន្ធដែលគាំទ្រភេរវកម្ម នៅយប់ថ្ងៃចន្ទ។

ការវាយប្រហារតាមអាកាសលើទីក្រុងកាប៊ុល បានកើតឡើងប៉ុន្មានម៉ោងបន្ទាប់ពីប្រទេសចិនបានប្រកាសថា ខ្លួនត្រៀមខ្លួនរួចជាស្រេច ដើម្បីបន្តជួយសម្របសម្រួលកិច្ចខិតខំប្រឹងប្រែង ក្នុងការបន្ធូរបន្ថយភាពតានតឹង និងជំរុញឲ្យភាគីទាំងពីរត្រឡប់ទៅរកការចរចាវិញ។

កិច្ចខិតខំប្រឹងប្រែងសម្រុះសម្រួល ដោយប្រទេសកាតា តួកគី និងអារ៉ាប៊ីសាអ៊ូឌីត ក៏បានបរាជ័យមកមុនផងដែរ។
លោក Amir Khan Muttaqi រដ្ឋមន្ត្រីការបរទេសតាលីបង់ បាននិយាយថា អាហ្វហ្គានីស្ថានបានបាត់បង់ទំនុកចិត្តលើចេតនារបស់ប៉ាគីស្ថាន ចំពោះដំណោះស្រាយតាមផ្លូវការទូតនេះ។ បើយោងតាមសេចក្តីថ្លែងការណ៍របស់ការិយាល័យលោក។

ជម្លោះនេះត្រូវបានចាត់ទុកថា ជាជម្លោះដ៏អាក្រក់បំផុតរវាងប្រទេសជិតខាងឥស្លាមនៅអាស៊ីខាងត្បូង ដែលមានព្រំដែនជាប់គ្នាប្រវែងប្រមាណ ២,៦០០ គីឡូម៉ែត្រ (១,៦០០ ម៉ាយល៍)។

មជ្ឈមណ្ឌលស្តារនីតិសម្បទាគ្រឿងញៀននេះ ធ្លាប់ជាមូលដ្ឋានហ្វឹកហ្វឺនរបស់អង្គការ NATO

លោក Hamdullah Fitrat អ្នកនាំពាក្យរងរបស់ក្រុមតាលីបង់ បានសរសេរនៅលើបណ្ដាញសង្គម X ថា ការវាយប្រហារនេះបានកើតឡើងនៅម៉ោង ៩យប់ (១២:៣០នាទីព្រឹក ម៉ោង ET) កាលពីថ្ងៃចន្ទ ហើយបានសំដៅទៅលើមន្ទីរពេទ្យ Omid ដែលគ្រប់គ្រងដោយរដ្ឋ ដែលជាមជ្ឈមណ្ឌលស្តារនីតិសម្បទាគ្រឿងញៀនមានសមត្ថភាពប្រហែល ២,០០០ គ្រែ។

ក្រសួងព័ត៌មានប៉ាគីស្ថានបាននិយាយថា មន្ទីរពេទ្យ Omid ស្ថិតនៅចម្ងាយប៉ុន្មានម៉ាយល៍ពី Camp Phoenix ដែលជាកន្លែងផ្ទុកគ្រាប់រំសេវ និងឧបករណ៍យោធា ដែលត្រូវបានកំណត់ជាគោលដៅវាយប្រហារ។

រដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar បានសរសេរនៅលើ X ថា ការផ្ទុះបន្តបន្ទាប់ដែលអាចមើលឃើញពីចម្ងាយ បង្ហាញយ៉ាងច្បាស់អំពីវត្តមាននៃឃ្លាំងគ្រាប់រំសេវធំៗ។

អ្នករស់នៅទីក្រុងកាប៊ុល រួមទាំងអ្នកសារព័ត៌មាន Reuters បាននិយាយថា Camp Phoenix ដែលជាមូលដ្ឋានយោធារបស់ NATO ដែលត្រូវបានបោះបង់ចោលនៅក្នុងទីក្រុងនេះ ត្រូវបានបម្លែងទៅជាមជ្ឈមណ្ឌលព្យាបាលអ្នកញៀនគ្រឿងញៀនប្រហែលមួយទសវត្សរ៍មកហើយ។ អ្នកស្រុកហៅវាថា “Omid Camp” ឬ “ជំរុំនៃក្តីសង្ឃឹម” ទោះបីជាឈ្មោះផ្លូវការរបស់វាគឺ មន្ទីរពេទ្យព្យាបាលអ្នកញៀនគ្រឿងញៀន Ibn Sina ក៏ដោយ៕