លោក ហ្សេលេនស្គី ថា រុស្ស៊ីវាយប្រហារលើហេដ្ឋារចនាសម្ព័ន្ធថាមពលអ៊ុយក្រែន មុនកិច្ចចរចាសន្តិភាពនៅអាប៊ុយដាប៊ី

លោក ហ្សេលេនស្គី ថា រុស្ស៊ីវាយប្រហារលើហេដ្ឋារចនាសម្ព័ន្ធថាមពលអ៊ុយក្រែន មុនកិច្ចចរចាសន្តិភាពនៅអាប៊ុយដាប៊ី

ទីក្រុងគៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) បាននិយាយនៅថ្ងៃអង្គារនេះថា ប្រទេសរុស្ស៊ីបានបើកការវាយប្រហារទ្រង់ទ្រាយធំពេញមួយយប់ លើហេដ្ឋារចនាសម្ព័ន្ធថាមពលរបស់អ៊ុយក្រែន ដោយប្រើប្រាស់មីស៊ីលបាលិស្ទីគក្នុងចំនួនដ៏ច្រើនបំផុតមួយនៅកិច្ចចរចាសន្តិភាពរវាងអ៊ុយក្រែន រុស្ស៊ី និងសហរដ្ឋអាមេរិក ដែលគ្រោងនឹងចាប់ផ្តើមឡើងវិញនៅទីក្រុងអាប៊ុយដាប៊ី ។

លោក ហ្សេលេនស្គី បានបញ្ជាក់ថា ការវាយប្រហារនេះបានប្រើប្រាស់មីស៊ីលជាង ៧០ គ្រាប់ រួមមានមីស៊ីលបាលិស្ទីគចំនួន ៣២ គ្រាប់ និងមីស៊ីលគ្រូសចំនួន ២៨ គ្រាប់ ព្រមទាំងយន្ដហោះដ្រូនវាយប្រហារជាង ៤៥០ គ្រឿង។ ការវាយប្រហារបានគ្របដណ្តប់លើតំបន់ចំនួន ៨ រួមមាន ទីក្រុងកៀវ (Kyiv), ខាកៀវ (Kharkiv), ឌីនីប្រូ (Dnipro), ស៊ូមី (Sumy), វីនីតសៀ (Vinnytsia), អូដេសា (Odesa) និង ហ្សាប៉ូរីសហ្ស៉ីយ៉ា (Zaporizhzhia)។

ក្រុមសង្គ្រោះបន្ទាន់រដ្ឋអ៊ុយក្រែនបានឱ្យដឹងថា មនុស្សយ៉ាងហោចណាស់ ៥ នាក់បានរងរបួស និងមនុស្ស ៣ នាក់ទៀតត្រូវបានជួយសង្គ្រោះ នៅទីក្រុងខាកៀវ បន្ទាប់ពីយន្ដហោះដ្រូនមួយគ្រឿងបានវាយប្រហារលើអគារលំនៅឋានខ្ពស់មួយកន្លែង បង្កឱ្យមានអគ្គិភ័យឆាបឆេះ។

ការវាយប្រហារទ្រង់ទ្រាយធំនេះ កើតមានឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានអះអាងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានយល់ព្រមផ្អាកការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែន រយៈពេលមួយសប្ដាហ៍ ដោយសារអាកាសធាតុត្រជាក់ខ្លាំង ដែលបានបង្កឱ្យមានការដាច់ចរន្តអគ្គិសនី និងប្រព័ន្ធកម្ដៅយ៉ាងទូលំទូលាយ។

លោក ត្រាំ បានប្រកាសពីការផ្អាកនេះកាលពីថ្ងៃព្រហស្បតិ៍ ប៉ុន្តែរុស្ស៊ីត្រូវបានរាយការណ៍ថា បានបន្តការវាយប្រហាររបស់ខ្លួនអស់រយៈពេលជាច្រើនថ្ងៃ មុនពេលកំណត់ផុតកំណត់ ដោយក្នុងនោះមានការវាយប្រហារមន្ទីរសម្ភពមួយនៅទីក្រុងហ្សាប៉ូរីសហ្ស៉ីយ៉ា និងការវាយប្រហារលើរថយន្តក្រុងដឹកអ្នករុករករ៉ែអ៊ុយក្រែន ដែលបណ្ដាលឱ្យមនុស្សយ៉ាងហោចណាស់ ១២ នាក់ស្លាប់៕