អាជ្ញាធរជាតិអប្សរា ប្រមូលទឹកបានគ្រប់គ្រាន់សម្រាប់ត្រៀមប្រើប្រាស់នារដូវប្រាំង

អាជ្ញាធរជាតិអប្សរា ប្រមូលទឹកបានគ្រប់គ្រាន់សម្រាប់ត្រៀមប្រើប្រាស់នារដូវប្រាំង

សៀមរាប​៖ យោងតាមក្រសួងធនធានទឹក និងឧតុនិយម រដូវវស្សានឹងចាប់ផ្តើមអស់ឥទ្ធិពលនៅដើមខែវិច្ឆិកា ខាងមុខនេះ គឺមានន័យថា ភ្លៀងក៏នឹងលែងមានបន្តទៀត ហើយរដូវរំហើយក៏នឹងចូលមកដល់។ អាជ្ញាធរជាតិអប្សរា បានប្រមូលទឹកស្ដុកពេញអាង ឬបារាយណ៍សំខាន់នានា ស្ទើរតែ១០០ភាគរយហើយ សម្រាប់ត្រៀមប្រើប្រាស់នៅក្នុងរដូវប្រាំងខាងមុខ។

លោក ភឿន សុឃីម ប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ បានឱ្យដឹងថា ស្ថានភាពជំនន់ទឹកភ្លៀងក្នុងតំបន់រមណីយដ្ឋានអង្គរ មានសភាពធូរស្រាលខ្លាំងហើយ បន្ទាប់ពីរាំងភ្លៀង​ប៉ុន្មានថ្ងៃ​​ចុងក្រោយនេះ។ ជាមួយគ្នានោះ ក្រុមការងារគ្រប់គ្រងទឹក បាននិងកំពុងបញ្ចូល​តាម​អាងស្ដុក​ទឹកធំៗ ដោយរំពឹងថានៅចុងខែតុលានេះ នឹងពេញទាំងស្រុងតាមបារាយណ៍ និងកសិន្ធុសំខាន់ៗ សរុបប្រហែល៧០លានម៉ែត្រគុប សម្រាប់ទុកប្រើប្រាស់នារដូវប្រាំងខាងមុខ។

ដូចនៅតំបន់ដទៃទៀតដែរ ដោយសាររងឥទ្ធិពលព្យុះនៅចុងខែកញ្ញាកន្លងទៅ បណ្ដាលឱ្យភ្លៀងធ្លាក់ខ្លាំង ហើយទឹកធ្លាក់ពីភ្នំគូលែនយ៉ាងគំហុកបំផុតមិនធ្លាប់មានប៉ុន្មានឆ្នាំចុងក្រោយនេះ។ យ៉ាងណា អ្នកជំនាញទឹកលោក ភឿន សុឃីម អះអាងថា ក្រុមការងារគ្រប់គ្រងទឹកនៃអាជ្ញាធរជាតិអប្សរា បានខិតខំដោះស្រាយ និងគ្រប់គ្រងស្ថានភាពទឹកបានល្អប្រសើរ ដោយមិនឱ្យប៉ះពាល់ធ្ងន់ធ្ងរនៅតំបន់ប្រាសាទ គឺស្ថានភាពទឹកជន់លិចរយៈពេលខ្លីប៉ុណ្ណោះ ដោយបានបញ្ជៀសតាមទ្វារទឹកនានា ទម្លាក់ទៅផ្នែកខាងក្រោមនៃបឹងទន្លេសាប។

ជាមួយគ្នានេះ លោក ភឿង សុឃីម បានសំណូមពរដល់ប្រជាពលរដ្ឋ ពិសេសនៅ​តាមមាត់ប្រ​ឡាយ​ទឹកបុរាណ មិនត្រូវចាក់ដីលុប​ដោយគ្មានបច្ចេកទេស​លើប្រព័ន្ធទឹកបុរាណទាំងនោះទេ ដែលវា​បណ្ដាល​ឱ្យស្ទះមាត់ទឹក និងជន់លិចជាដើម។

ជារៀងរាល់ឆ្នាំ បម្រែបម្រួលអាកាសធាតុ ធ្វើឱ្យការគ្រប់គ្រងទឹកក៏មានការផ្លាស់ប្តូរ​ពីមួយឆ្នាំទៅមួយឆ្នាំផងដែរ។ យ៉ាងណាមិញ ការងារគ្រប់គ្រងទឹកក៏ដូចគ្នាដែរ លោក ភឿន សុឃីម ពន្យល់ថា ក្រុមការងាររបស់លោកបានបន្តតាមដានស្ថានការណ៍ជាប់ និងរៀនបានបទពិសោធន៍ផ្សេងៗ ដើម្បីការងារគ្រប់គ្រងទឹកក្នុងតំបន់រមណីយដ្ឋានអង្គរឱ្យបានកាន់តែមានប្រសិទ្ធភាព និងឆ្លើយតបបាន​ទាន់ពេលវេលាជាក់ស្ដែង៕