រករឿងខ្មែរទៀតហើយ! អ្នកនាំពាក្យរដ្ឋាភិបាលថៃ អំពាវនាវឲ្យប្រជាជនប្តឹង YouTube ដែលអះអាងថាជាខ្មែរដែលប្រើ AI បង្កាច់បង្ខូចកេរ្តិ៍ឈ្មោះប្រទេសខ្លួន

រករឿងខ្មែរទៀតហើយ! អ្នកនាំពាក្យរដ្ឋាភិបាលថៃ អំពាវនាវឲ្យប្រជាជនប្តឹង YouTube ដែលអះអាងថាជាខ្មែរដែលប្រើ AI បង្កាច់បង្ខូចកេរ្តិ៍ឈ្មោះប្រទេសខ្លួន

បាងកក៖ លោក ជីរ៉ាយុ ហ័ងសាប អ្នកនាំពាក្យរដ្ឋាភិបាលថៃ នៅថ្ងៃទី ២១ ខែកក្កដា ឆ្នាំ ២០២៥ បានចេញមុខអំពាវនាវជាបន្ទាន់ដល់សាធារណជន ឲ្យជួយធ្វើពាក្យបណ្ដឹងចំពោះបណ្ដាញ YouTube មួយឈ្មោះ “Carl Reed – Your Thailand Guide” ដែលត្រូវបានចោទប្រកាន់ថា បានប្រើបច្ចេកវិទ្យា AI ដើម្បីក្លែងបន្លំជាជនបរទេស និងផ្សព្វផ្សាយព័ត៌មានមិនពិតអំពីប្រទេសថៃ។

តាមសេចក្តីរាយការណ៍របស់ Khaosod English នៅថ្ងៃទី ២១ ខែកក្កដានេះ លោក ជីរ៉ាយុ បានឲ្យដឹងថា បន្ទាប់ពីការស៊ើបអង្កេត គេបានរកឃើញថា ទោះបីជាបណ្ដាញ YouTube នេះប្រើឈ្មោះ និងរូបភាពជនបរទេសក៏ដោយ ប៉ុន្តែតាមពិតវាត្រូវបានដំណើរការដោយបុគ្គលជនជាតិខ្មែរម្នាក់។ បុគ្គលនេះត្រូវបានគេរាយការណ៍ថា បានប្រើប្រាស់បច្ចេកវិទ្យា AI ដើម្បី បន្លំសំឡេងឲ្យដូចជនជាតិលោកខាងលិច ក្នុងគោលបំណង បង្វែរការពិតអំពីប្រទេសថៃ បង្កជម្លោះ និងមានចេតនាពិសេសវាយប្រហារវិស័យទេសចរណ៍ថៃ។

លោកបន្ថែមថា ខ្លឹមសារដែលបណ្ដាញ YouTube នេះបានផ្សព្វផ្សាយ ត្រូវបានគេពិពណ៌នាថា បាន ប្រមាថមើលងាយជនជាតិថៃ ក៏ដូចជាជនជាតិឥណ្ឌា ដោយមានគោលបំណង បង្កើតការស្អប់ខ្ពើម និងបំបែកបំបាក់ នៅទូទាំងតំបន់អាស៊ីអាគ្នេយ៍ និងអាស៊ីទាំងមូល។

លោក ជីរ៉ាយុ បានថ្លែងថា៖ «ខ្ញុំស្នើសុំការសហការពីប្រជាជនថៃទាំងអស់គ្នា ដើម្បីអនុវត្តតាមជំហានខាងលើ។ សូមកុំបណ្ដោយឲ្យជនជាតិខ្មែរទាំងនេះរួចខ្លួន ដើម្បីការពារការបំផ្លាញកេរ្តិ៍ឈ្មោះប្រទេសថៃដោយជនទុច្ចរិត។ លើសពីនេះ ប្រសិនបើអ្នកជួបប្រទះខ្លឹមសារបណ្ដាញសង្គមណាមួយដែលមានលក្ខណៈស្រដៀងគ្នា ដែលទាក់ទងនឹងការបំផ្លាញកេរ្តិ៍ឈ្មោះប្រទេសថៃ សូមរាយការណ៍ភ្លាមៗ ដើម្បីទប់ស្កាត់ និងកំណត់ការរីករាលដាលនៃព័ត៌មានមិនពិតឲ្យបានទូលំទូលាយ»៕