លោកថាក់ស៊ីន បង្ហាញគម្រោង «ThaiWORKS» ដើម្បីជំរុញសេដ្ឋកិច្ច និងវប្បធម៌ថៃ

លោកថាក់ស៊ីន បង្ហាញគម្រោង «ThaiWORKS» ដើម្បីជំរុញសេដ្ឋកិច្ច និងវប្បធម៌ថៃ

បាងកក៖ បន្ទាប់ពីភាពស្ងប់ស្ងាត់អស់មួយរយៈ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ បានបង្ហាញខ្លួនជាសាធារណៈឡើងវិញកាលពីថ្ងៃពុធ ដោយបានណែនាំគម្រោងថ្មីមួយឈ្មោះ «ThaiWORKS»។

បើតាមការចុះផ្សាយរបស់កាសែតបាងកកប៉ុស្តិ៍ គម្រោងនេះមានគោលបំណងលើកស្ទួយឧស្សាហកម្មច្នៃប្រឌិត និងវប្បធម៌របស់ប្រទេសថៃទៅកាន់ឆាកអន្តរជាតិ។

លោក ថាក់ស៊ីន បានថ្លែងក្នុងវេទិកា SPLASH – Soft Power Forum 2025 ដោយសង្កត់ធ្ងន់ថា ThaiWORKS គឺជាការវិវត្តន៍មួយពីគម្រោង OTOP (មួយឃុំ មួយផលិតផល) ដែលលោកបានបង្កើតកាលពី ២០ ឆ្នាំមុន។ គម្រោងថ្មីនេះនឹងប្រើប្រាស់ការរចនា បច្ចេកវិទ្យា និងទីផ្សារសកល ដើម្បីជួយសិល្បករ និងសហគ្រិនថៃតូចៗ ឱ្យអាចប្រកួតប្រជែងនៅលើទីផ្សារពិភពលោកបានកាន់តែប្រសើរ។

ការបង្ហាញខ្លួនរបស់លោក ថាក់ស៊ីន ធ្វើឡើងស្របពេលដែលកូនស្រីរបស់លោក គឺលោកស្រី Paetongtarn Shinawatra ដែលទើបតែផ្លាស់ប្ដូរទៅកាន់តំណែងនៅក្រសួងវប្បធម៌ ដែលជាផ្នែកមួយសំខាន់ក្នុងការជំរុញថាមពលទន់របស់ប្រទេស។

លោក ថាក់ស៊ីន ក៏បានបញ្ជាក់ដែរថា លោកបានចំណាយប្រាក់ផ្ទាល់ខ្លួន ដើម្បីជួលអ្នកជំនាញផ្នែកយីហោល្បីល្បាញលើពិភពលោក លោក Peter Arnell មកជួយក្នុងគម្រោង ThaiWORKS នេះ។

តាមរយៈគម្រោង ThaiWORKS លោក ថាក់ស៊ីន សង្ឃឹមថានឹងជួយអាជីវកម្មខ្នាតតូចរបស់ថៃ ឱ្យកាន់តែរឹងមាំ និងអាចប្រកួតប្រជែងបាន ទោះបីជាមានការប្រកួតប្រជែងពីទំនិញនាំចូលក៏ដោយ។ នេះជាសញ្ញាបញ្ជាក់ពីការផ្ដោតសារជាថ្មីរបស់លោកលើការអភិវឌ្ឍសេដ្ឋកិច្ច និងការពង្រឹងម៉ាកយីហោជាតិ៕

https://www.bangkokpost.com/thailand/general/3066258/thaksin-talks-up-new-soft-power-push