វិសាខា ប៉ះ MBSA Pelican ក្នុងជំនួបបើកឆាក ពានរង្វាន់បាល់ទះ WSVI នៅតៃវ៉ាន់

វិសាខា ប៉ះ MBSA Pelican ក្នុងជំនួបបើកឆាក ពានរង្វាន់បាល់ទះ WSVI នៅតៃវ៉ាន់

ក្លិបបាល់ទះវិសាខា តំណាងកម្ពុជា នឹងចាប់ផ្ដើមយុទ្ធនាការការពារតំណែងជើងឯក នៅក្នុងពានរង្វាន់ The Win Streak Volleyball Invitational នៅតៃវ៉ាន់ នៅថ្ងៃទី៣០ ខែមេសា ដល់ថ្ងៃទី៤ ខែឧសភា ឆ្នាំ២០២៥។

សម្រាប់ការប្រកួតខាងលើនេះ ត្រូវបានបែងចែកជា ២ពូល គឺពូល A និងពូល B ដោយពូល A មានក្លិបបាល់ទះវិសាខា របស់កម្ពុជា, Hyundai Capital Skywalkers កូរ៉េខាងត្បូង, MBSA Pelican ម៉ាឡេស៊ី និងក្រុម Taichung Bank តៃវ៉ាន់ ខណៈពូល B មានម្ចាស់ផ្ទះ Win+Streak របស់តៃវ៉ាន់ , Jakarta Garuda ឥណ្ឌូណេស៊ី , Nakhon Ratchasima ថៃ និង Armed Forces កូរ៉េខាងត្បូង។ បន្ទាប់ពីវគ្គចែកពូល ក្រុមលេខ១ និងលេខ២ តាមពូលនីមួយៗ នឹងឡើងទៅវគ្គពាក់កណ្តាលផ្តាច់ព្រ័ត្រ។

នៅព្រឹកថ្ងៃទី៣០ ខែមេសា ឆ្នាំ២០២៥ វេលាម៉ោង ១១:០០ព្រឹក ក្លិបបាល់ទះវិសាខា ត្រូវប៉ះ MBSA Pelican ម៉ាឡេស៊ី ក្នុងជំនួបបើកឆាក។ នៅថ្ងៃទី១ ខែឧសភា ក្លិបបាល់ទះវិសាខា ត្រូវប៉ះ Taichung Bank តៃវ៉ាន់ វេលាម៉ោង ១២:០០ថ្ងៃត្រង់ និងនៅថ្ងៃទី២ ខែឧសភា ក្លិបបាល់ទះវិសាខា ប៉ះ Hyundai Capital Skywalkers កូរ៉េខាងត្បូង វេលាម៉ោង ៥:០០រសៀល។

គួរបញ្ជាក់ថា ក្លិបបាល់ទះវិសាខា បានក្លាយជាម្ចាស់ជើងឯក នៃពានរង្វាន់ Win+ Streak Volleyball Invitational Tournament 2024 ក្រោយយកឈ្នះម្ចាស់ផ្ទះ Win Streak របស់តៃវ៉ាន់ នៅវគ្គផ្តាច់ព្រ័ត្រ ក្នុងលទ្ធផល ៣ សិតទល់នឹង ១៕