KOICA ជួយពង្រឹងការបណ្តុះបណ្តាលអាកាសចរណ៍ស៊ីវិលនៅកម្ពុជា

KOICA ជួយពង្រឹងការបណ្តុះបណ្តាលអាកាសចរណ៍ស៊ីវិលនៅកម្ពុជា

ភ្នំពេញ៖​ ទីភ្នាក់ងារកិច្ចសហប្រតិបត្តិការអន្តរជាតិកូរ៉េ ( KOICA ) បានប្តេជ្ញាជួយពង្រឹងការបណ្តុះបណ្តាលអាកាសចរណ៍ស៊ីវិលនៅកម្ពុជា ដើម្បី កសាងអនាគតដ៏ភ្លឺស្វាងសម្រាប់អាកាសចរណ៍។ ការប្តេជ្ញានេះ ធ្វើឡើងនៅថ្ងៃទី១០ ខែកុម្ភៈ ឆ្នាំ២០២៥ ក្នុងគ្រាដែល លោកស្រី Choi Moon Jung នាយិកានៃការិយាល័យ KOICA ប្រចាំប្រទេសកម្ពុជា បានជួបជាមួយលោក ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ។

កិច្ចប្រជុំបានពិភាក្សាលើលទ្ធផលនៃការសិក្សាលម្អិតលើគម្រោង “ការពង្រឹងប្រព័ន្ធបណ្តុះបណ្តាល អាកាសចរណ៍ស៊ីវិលនៅវិទ្យាស្ថានជាតិអាកាសចរណ៍ស៊ីវិលនៃ ប្រទេសកម្ពុជា” ដែលធ្វើឡើងចាប់ពីថ្ងៃទី ៣ ដល់ថ្ងៃទី ១០ ខែកុម្ភៈ ឆ្នាំ ២០២៥។ គម្រោងនេះមានគោលបំណងពង្រឹងប្រព័ន្ធបណ្តុះបណ្តាលអាកាសចរណ៍ស៊ីវិលតាមរយៈការកែលម្អហេដ្ឋារចនាសម្ព័ន្ធ ការលើកកំពស់គុណភាពបណ្តុះបណ្តាល និងឧបករណ៍បរិក្ខារបណ្តុះបណ្តាល។

ការសិក្សាលម្អិតនេះជាសកម្មភាពមួយដែលតំណាងឱ្យជំហានឆ្ពោះទៅមុខយ៉ាងសំខាន់ក្នុងការពង្រឹងការបណ្តុះបណ្តាលអាកាសចរណ៍ស៊ីវិលនៅកម្ពុជា។ តាមរយៈការវិនិយោគលើការបណ្តុះបណ្តាល និងការកសាងសមត្ថភាព កម្ពុជាកំពុងដាក់មូលដ្ឋានគ្រឹះសម្រាប់អនាគតអាកាសចរណ៍ប្រកបដោយសុវត្ថិភាព និរន្តរភាព និងវិបុលភាព។ ស្មារតីសហការដែលបានបង្ហាញក្នុងដំណើរការនេះគឺជាសក្ខីភាពមួយចំពោះការប្តេជ្ញាចិត្តរបស់អ្នកពាក់ព័ន្ធទាំងអស់ក្នុងការជំរុញវិស័យអាកាសចរណ៍កម្ពុជា។

លោកស្រី Choi Moon Jung បានលើកឡើងថា កម្ពុជាជាប្រទេសដៃគូអាទិភាពរបស់ ទីភ្នាក់ងាKOICA ក្នុងកិច្ចសហប្រតិបត្តិការអភិវឌ្ឍ។ទីភ្នាក់ងា KOICA បានជួយដល់កម្មវិធី និងគម្រោងផ្សេងៗ ដែលមិនត្រឹមតែមានចូលរួមចំនែកយ៉ាងច្រើនដល់ការអភិវឌ្ឍរបស់កម្ពុជាប៉ុណ្ណោះទេ ប៉ុន្តែថែមទាំងបានលើកកម្ពស់ទំនាក់ទំនងមិត្តភាពរវាងប្រទេសទាំងពីរ សាធារណរដ្ឋកូរ៉េ និងព្រះរាជាណាចក្រកម្ពុជាផងដែរ។

ទាក់ទិននឹងបញ្ហានេះ លោក ម៉ៅ ហាវណ្ណាល់ បានទទួលស្គាល់ពីសារៈសំខាន់នៃគម្រោង និងសម្តែងការអរគុណចំពោះការគាំទ្ររបស់សាធារណរដ្ឋកូរ៉េ៕