មេដឹកនាំអ៊ីរ៉ាក់បំពេញទស្សនកិច្ចនៅស៊ីរីលើកដំបូងក្រោយខកខានអស់រយៈពេលជាង១០ឆ្នាំ

មេដឹកនាំអ៊ីរ៉ាក់បំពេញទស្សនកិច្ចនៅស៊ីរីលើកដំបូងក្រោយខកខានអស់រយៈពេលជាង១០ឆ្នាំ

បរទេស ៖ នាយរដ្ឋមន្ត្រីនៃប្រទេសអ៊ីរ៉ាក់លោក Mohammed Shia’ al-Sudani កាលពីថ្ងៃអាទិត្យបានធ្វើដំណើរមកដល់រដ្ឋធានីក្រុងដាម៉ាសប្រទេសស៊ីរីក្នុងនាមជាមេដឹកនាំអ៊ីរ៉ាក់លើកដំបូងដែលមានវត្តមានមកដល់ទឹកដីស៊ីរីគិតចាប់តាំងតែពីវិបត្តិកាលពី១២ឆ្នាំមុន។

លោកប្រធានាធិបតីស៊ីរី Bashar al Assad បានទទួលស្វាគមន៍វត្តមានរបស់លោក al Sudani ដោយផ្ទាល់នៅវិមានរបស់ប្រធានាធិបតីដោយមានទាំងការធ្វើសេចក្តីថ្លែងការណ៍រួមជាមួយនឹងក្រុមអ្នកកាសែតផងតាមរយៈការលើកឡើងអំពីប្រធានបទនៃកិច្ចពិភាក្សាជាច្រើនដែលមានដូចជាភាពសុទិដ្ឋិនិយមក្នុងដំណើរឆ្ពោះទៅមុខរបស់តំបន់អារ៉ាប់ចំពោះប្រទេសស៊ីរី។

ក្នុងស្ថានភាពដែលកំពុងរងផលប៉ះពាល់ដល់​សេដ្ឋកិច្ចដូចគ្នានៅ​ក្នុង​ប្រទេស​ទាំង​ពីរ លោក al-Sudani បាន​សង្កត់​ធ្ងន់​ថា គន្លឹះ​សំខាន់នៃ​ស្ថិរភាព​ក្នុង​តំបន់​គឺ​ជាការ​ប្រឈម​មុខធំជាងគេចំពោះមុខ​បញ្ហា​សេដ្ឋកិច្ច ហើយជាលទ្ធផលមេដឹកនាំទាំងពីរក៏បានឯកភាពគ្នាបង្កើតយន្តការសម្របសម្រួលដើម្បីដោះស្រាយប្រយុទ្ធប្រឆាំងទៅនឹងការជួញដូរគ្រឿងញៀននៅតាមព្រំដែនទាំង ២ ផងដែរ។

ក្នុងអំឡុងពេលនៃកិច្ចប្រជុំនោះដែរ លោក al-Sudani ក៏បានសម្តែងការគាំទ្ររបស់អ៊ីរ៉ាក់សម្រាប់កិច្ចខិតខំប្រឹងប្រែងទាំងអស់ដើម្បីអាចនាំឲ្យមានទៅដល់ការដកទណ្ឌកម្មរបស់លោកខាងលិចទាំងស្រុងចេញពីប្រទេសស៊ីរី។

ដោយឡែក លោកប្រធានាធិបតី Assad បាននិយាយថា ដំណើរទស្សនៈកិច្ចរបស់ al-Sudani បាននឹងផ្តល់ឱកាសមួយក្នុងការឈានទៅដល់សម្រេចបាននូវជំហានដ៏សំខាន់នៅក្នុងកិច្ចសហប្រតិបត្តិការទ្វេភាគីកាន់តែប្រសើរឡើងបន្ថែមទៀតទាំងនៅពេលបច្ចុប្បន្ន និងអនាគត៕