មេដឹកនាំបារាំង ធ្វើដំណើរទស្សនៈកិច្ចរយៈពេល៣ថ្ងៃនៅប្រទេសចិន ជាមួយគោលបំណងធំៗពាក់ព័ន្ធនឹងសង្គ្រាមនៅអ៊ុយក្រែន
មេដឹកនាំបារាំង ធ្វើដំណើរទស្សនៈកិច្ចរយៈពេល៣ថ្ងៃនៅប្រទេសចិន ជាមួយគោលបំណងធំៗពាក់ព័ន្ធនឹងសង្គ្រាមនៅអ៊ុយក្រែន
បរទេស ៖ តបតាមការអញ្ជើញរបស់ប្រធានាធិបតីចិន Xi Jinping លោកប្រធានាធិបតីបារាំង Emmanuel Macron នឹងត្រូវធ្វើដំណើរទៅបំពេញទស្សនកិច្ចផ្លូវរដ្ឋរយៈពេល៣ថ្ងៃនៅប្រទេសចិនចាប់ពីថ្ងៃទី ៥ ដល់ថ្ងៃទី ៧ ខែមេសាខាងមុខនេះ។
ដំណើរទស្សនកិច្ចដែលនឹងធ្វើឡើងនៅក្នុងពេលដែលលោក Xi ទើបតែបញ្ចប់ទស្សនកិច្ចជាប្រវត្តិសាស្ត្រទៅកាន់ប្រទេសរុស្ស៊ី ជាពិសេសនៅក្នុងពេលជម្លោះនៅអ៊ុយក្រែនកំពុងពោរពេញទៅដោយភាពតានតឹងនៃការប្រឈមមុខដាក់គ្នានៃអាវុធប្រល័យលោកដោយរុស្ស៊ីប្រកាសថានឹងដាក់បញ្ឈរជើងគ្រាប់ក្បាលនុយក្លេអ៊ែរប្រភេទតាក់ទិច ឬ Tactical Nuclear នៅប្រទេសបេឡារូស ចំណែកឯអ៊ុយក្រែនក៏កំពុងស្វែងរកការគាំទ្រក្នុងការទទួលយកក្បាលគ្រាប់នុយក្លេអ៊ែររបស់អាមេរិកវិញផងដែរជាការឆ្លើយតប។
មានការយល់ឃើញខុសគ្នាមួយចំនួនចំពោះដំណើរទស្សនកិច្ចលើកនេះដោយក្នុងនោះតាមរយៈការចេញផ្សាយរបស់ The Politico បានលើកឡើងថា ដំណើរទស្សនកិច្ចដែលពោរពេញទៅដោយបំណងដ៏ស៊ីជម្រៅមួយរបស់លោក Macron ផ្តោតសំខាន់ទៅលើការបញ្ចុះបញ្ចូលរដ្ឋាភិបាលប៉េកាំងឲ្យខិតឆ្ងាយបន្តិចពីរដ្ឋាភិបាលទីក្រុងមូស្គូចំពោះមុខជម្លោះដ៏ដុនដាបមួយនេះ។
ប្រភពដដែលបានបន្តថា ប្រទេសបារាំងសង្ឃឹមថានឹងអាចរារាំងមេដឹកនាំចិន Xi Jinping ពីការទទួលយកភាពស្និទ្ធស្នាលជាមួយប្រធានាធិបតីរុស្ស៊ី លោក Vladimir Putin ហើយចង់ឱ្យចិនជំនួសមកវិញនូវតួនាទីសម្របសម្រួលជុំវិញសង្រ្គាមនៅអ៊ុយក្រែន។
ទោះបីជាយ៉ាងណាក៏ដោយ គេនៅមិនច្បាស់នៅឡើយទេថា ឥទ្ធិពលរបស់ Macron មានកម្រិតណា ហើយផ្នែកខាងក្រោយនៃការធ្វើដំណើរទស្សនកិច្ចរយៈពេល ៣ថ្ងៃរបស់គាត់ដែលចាប់ផ្តើមពីថ្ងៃទី៥ ខែមេសានឹងទទួលបាលលទ្ធផលបែបណានោះទេ។
ជាក់ស្តែងក្នុងពេលបច្ចុប្បន្ននេះ ទោះបីជាអឺរ៉ុបកំពុងបន្តដកខ្លួនចេញពីឥទ្ធិពលនៃប្រេង និងថាមពលរបស់រុស្ស៊ី និងការកាត់ផ្តាច់ទំនាក់ទំនងពាណិជ្ជកម្មជាមួយរុស្ស៊ីក្តី ប៉ុន្តែភាពតានតឹងភូមិសាស្ត្រនយោបាយបែរជាកំពុងកើនឡើងរវាងចិន និងអាមេរិក ដែលជាមហាអំណាចសេដ្ឋកិច្ចទាំងពីររបស់ពិភពលោកទៅវិញ។ ដោយឡែកសម្រាប់សេតវិមានវិញគេជឿជាក់ថានឹងមានការរំពឹងទុកតិចតួចបំផុតពីកិច្ចប្រជុំនេះ។
ក្នុងពេលជាមួយគ្នានេះ បារាំងបានដាក់ក្តីសង្ឃឹមថាពេលវេលាដែលលោក Macron ចំណាយដោយផ្ទាល់ជាមួយលោក Xi នឹងជួយដោះស្រាយបញ្ហាចំពោះមុខសំខាន់ៗមួយចំនួន ដូចជាការយកឈ្នះការគាំទ្ររបស់ចិនលើបញ្ហាដូចជាការបញ្ឈប់ការវាយប្រហាររបស់រុស្ស៊ីលើហេដ្ឋារចនាសម្ព័ន្ធស៊ីវិលនៅអ៊ុយក្រែន ឬការបញ្ឈប់ការផ្ទេរកុមារអ៊ុយក្រែនខុសច្បាប់ជាដើម។
គួរឲ្យដឹងដែរថា តាមផែនការប្រធានាធិបតីបារាំងនឹងចំណាយពេលយ៉ាងហោចណាស់ពី ៦ទៅ៧ម៉ោងដើម្បីពិភាក្សាជាមួយនឹងលោក Xi ហើយវាក្លាយទៅជាជំនួបរបស់ប្រធានាធិបតីបារាំងលើកដំបូងដែលបានបំពេញទស្សនកិច្ចទៅកាន់ខេត្ត Guangzhou គិតចាប់តាំងតែពីពេលដែលមេដឹកនាំចិននៅជាឪពុករបស់លោក Xi មកម្ល៉េះ៕
