រុស្ស៊ី វាយប្រហារដ្រូនទ្រង់ទ្រាយធំបំផុតលើអ៊ុយក្រែន ក្រោយលោកត្រាំរិះគន់លោកពូទីន
រុស្ស៊ី វាយប្រហារដ្រូនទ្រង់ទ្រាយធំបំផុតលើអ៊ុយក្រែន ក្រោយលោកត្រាំរិះគន់លោកពូទីន
ក្រុង Kyiv, អ៊ុយក្រែន – កាលពីថ្ងៃពុធ ទី៩ ខែកក្កដា ឆ្នាំ២០២៥ រុស្ស៊ីបានបើកការវាយប្រហារដោយដ្រូន និងមីស៊ីលយ៉ាងច្រើនសម្បើមបំផុតមិនធ្លាប់មានលើប្រទេសអ៊ុយក្រែន។ ហេតុការណ៍នេះកើតឡើងប៉ុន្មានម៉ោងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានរិះគន់ប្រធានាធិបតីរុស្ស៊ី វ្ល៉ាឌីមៀរ ពូទីន ចំពោះការមិនបង្ហាញឆន្ទៈចរចាសន្តិភាព និងបានសន្យាផ្តល់ជំនួយយោធាបន្ថែមដល់អ៊ុយក្រែន។
កងទ័ពអាកាសអ៊ុយក្រែនបានរាយការណ៍ថា រុស្ស៊ីបានបាញ់ដ្រូនប្រភេទ Shahed ចំនួន ៧២៨ គ្រឿង និងមីស៊ីល ១៣ គ្រាប់។ នេះជាចំនួនដ្រូនច្រើនជាងកំណត់ត្រាចាស់ ៥៣៩ គ្រឿង កាលពីថ្ងៃទី៤ ខែកក្កដា។ ទោះបីជាដ្រូនភាគច្រើនត្រូវបានបាញ់ទម្លាក់ក៏ដោយ ក៏ការវាយប្រហារនេះបានបណ្ដាលឱ្យខូចខាត និងសម្លាប់ជនស៊ីវិលយ៉ាងតិចម្នាក់នៅខេត្ត Khmelnytskyi។
ប្រធានាធិបតីអ៊ុយក្រែន វ៉ុលឡូឌីមៀរ ហ្សេឡេនស្គី បានថ្លែងថា «នេះគឺជាការវាយប្រហារបង្ហាញពីភាពរឹងរូស ហើយវាកើតឡើងនៅពេលដែលមានការប៉ុនប៉ងជាច្រើនដើម្បីសម្រេចបានសន្តិភាព…ប៉ុន្តែរុស្ស៊ីបានបដិសេធទាំងអស់»។ លោកបន្ថែមថា ដៃគូរបស់អ៊ុយក្រែនដឹងពីវិធីដាក់សម្ពាធរុស្ស៊ីឱ្យគិតអំពីការបញ្ចប់សង្រ្គាម។
ការវាយប្រហារដ៏ខ្លាំងក្លានេះបានតម្រង់ទៅទីក្រុង Lutsk ដែលស្ថិតនៅភាគពាយព្យប្រទេសអ៊ុយក្រែន ក្បែរព្រំដែនប៉ូឡូញ និងបេឡារុស។ ការវាយប្រហារនេះថែមទាំងបានបង្ខំឱ្យយោធាប៉ូឡូញបញ្ចេញយន្តហោះចម្បាំងក្នុងដែនអាកាសរបស់ខ្លួនផងដែរ។
ការវាយប្រហារទ្រង់ទ្រាយធំនេះកើតឡើងក្រោយពេលលោក ដូណាល់ ត្រាំ បានសម្តែងការមិនពេញចិត្តចំពោះការខ្វះការប្ដេជ្ញាចិត្តរបស់លោក ពូទីន លើកិច្ចព្រមព្រៀងសន្តិភាព។
លោក ត្រាំ បានបញ្ជាក់ជាថ្មីថា សហរដ្ឋអាមេរិកនឹងបញ្ជូនជំនួយយោធាបន្ថែមទៅអ៊ុយក្រែន ដោយសង្កត់ធ្ងន់ថា អ៊ុយក្រែនត្រូវតែអាចការពារខ្លួនឯងបាន។ អ្នកនាំពាក្យក្រសួងការពារជាតិអាមេរិក លោក Sean Parnell ក៏បានបញ្ជាក់ដែរថា ក្រសួងកំពុងបញ្ជូនអាវុធការពារបន្ថែមតាមការណែនាំរបស់លោកប្រធានាធិបតី ត្រាំ៕
