អ៊ីរ៉ង់ ច្រានចោលចំពោះសំណើរបស់ អាមេរិកឱ្យរុះរើហេដ្ឋារចនាសម្ព័ន្ធនុយក្លេអ៊ែរ

អ៊ីរ៉ង់ ច្រានចោលចំពោះសំណើរបស់ អាមេរិកឱ្យរុះរើហេដ្ឋារចនាសម្ព័ន្ធនុយក្លេអ៊ែរ

អ៊ីរ៉ង់៖ ប្រធានាធិបតីអ៊ីរ៉ង់ លោក Masoud Pezeshkian បានច្រានចោលការទាមទាររបស់សហរដ្ឋអាមេរិកសម្រាប់ទីក្រុងតេអេរ៉ង់ ឱ្យរុះរើហេដ្ឋារចនាសម្ព័ន្ធនុយក្លេអ៊ែររបស់ខ្លួន។ នេះ បើតាម រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីថ្ងៃអាទិត្យម្សិលមិញនេះ។

លោក Abbas Araghchi នៅក្រោយកិច្ចពិភាក្សានៅទីក្រុង Muscat ដែលសម្របសម្រួលដោយប្រទេសអូម៉ង់ បង្ហាញពីកិច្ចខិតខំប្រឹងប្រែងចុងក្រោយបង្អស់ដើម្បីជួយឱ្យសម្រេចផែនការសកម្មភាព នុយក្លែអ៊ែរ បញ្ជាក់ថា ការចរចាដោយប្រយោលជាមួយសហរដ្ឋអាមេរិកក្នុងប្រទេសអូម៉ង់ ដើម្បីស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ ២០១៥ បានក្លាយទៅជា “ភាពតានតឹង » ។

ការចចារនេះ ធ្វើឡើងបន្ទាប់ពី សហរដ្ឋអាមេរិកបានដកខ្លួនជាឯកតោភាគីចេញពីកិច្ចព្រមព្រៀងក្នុងឆ្នាំ ២០១៨ក្រោមអាណត្តិដំបូងរបស់ប្រធានាធិបតីអាមេរិក លោក Donald Trump ដែលជំរុញឱ្យអ៊ីរ៉ង់កាត់បន្ថយការអនុលោមតាមការសន្យានុយក្លេអ៊ែររបស់ខ្លួនបន្តិចម្តងៗ។

លោក Araqchi បាននិយាយទៅកាន់ទូរទស្សន៍ IRIB ដែលគ្រប់គ្រងដោយរដ្ឋរបស់អ៊ីរ៉ង់បន្ទាប់ពីការចរចារជុំទី ៤ នៅរដ្ឋធានី Oman បាននិយាយថា ការពិភាក្សាបានផ្លាស់ប្តូរពីប្រធានបទទូទៅទៅជាសំណើជាក់លាក់បន្ថែមទៀត។ លោកបានកំណត់លក្ខណៈនៃកិច្ចពិភាក្សានេះថាជាការបោះជំហានទៅមុខ ប៉ុន្តែបានទទួលស្គាល់ពីភាពស្មុគស្មាញដែលកំពុងកើនឡើងនៃបញ្ហា។ ភាគីទាំងពីរបានឯកភាពបន្តការពិភាក្សា។

ទន្ទឹមនឹងនេះ ប្រធានាធិបតី Pezeshkian បានច្រានចោលការអំពាវនាវរបស់សហរដ្ឋអាមេរិកឱ្យរុះរើហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់។ លោកបានប្រកាសដោយបញ្ជាក់ជាថ្មីពីជំហររបស់ទីក្រុងតេអេរ៉ង់ថា កម្មវិធីនុយក្លេអ៊ែររបស់ខ្លួនគឺសម្រាប់គោលបំណងស៊ីវិល។ លោកក៏បានយោងក្រឹត្យសាសនារបស់មេដឹកនាំកំពូល Ali Khamenei ដែលហាមឃាត់ការអភិវឌ្ឍន៍អាវុធនុយក្លេអ៊ែរ។

នៅមុនកិច្ចពិភាក្សា Muscat បេសកជនពិសេសរបស់សហរដ្ឋអាមេរិក លោក Steve Witkoff បានទាមទារជាថ្មី ឱ្យប្រទេសអ៊ីរ៉ង់ រុះរើកម្មវិធីនុយក្លេអ៊ែររបស់ខ្លួនទាំងស្រុង រួមទាំងកន្លែងនៅ Natanz, Fordow និង Isfahan ផងដែរ។ មន្ត្រីសហរដ្ឋអាមេរិក រួមទាំងរដ្ឋមន្ត្រីការបរទេស Marco Rubio បានផ្តល់យោបល់ថា អ៊ីរ៉ង់គួរតែនាំចូលសារធាតុអ៊ុយរ៉ាញ៉ូមដែលចម្រាញ់រួចរាល់។

លោក Pezeshkian បានសង្កត់ធ្ងន់ទៀត ថា សកម្មភាពនុយក្លេអ៊ែររបស់អ៊ីរ៉ង់គឺចាំបាច់សម្រាប់គោលបំណង “សន្តិភាព” ដូចជា ឱសថវិទ្យុសកម្ម ការថែទាំសុខភាព កសិកម្ម និងឧស្សាហកម្ម។

លោកបានមានប្រសាសន៍ថា “យើងមានការយកចិត្តទុកដាក់យ៉ាងខ្លាំងក្នុងការចរចា និងស្វែងរកកិច្ចព្រមព្រៀង។ យើងរៀបចំការពិភាក្សាដោយសារតែយើងចង់បានសន្តិភាព” ដោយសង្កត់ធ្ងន់លើការប្តេជ្ញាចិត្តរបស់អ៊ីរ៉ង់ចំពោះសន្តិភាព និងសន្តិសុខក្នុងតំបន់។

សូមរំលឹកថា កិច្ចជុំចចារចុងក្រោយរវាងប្រទេសទាំងពីរ មានរយៈពេល ៣ លើកមកហើយ គឺ នៅ Muscat នៅថ្ងៃទី ១២ និង ២៦ ខែមេសា និងនៅទីក្រុងរ៉ូមនៅថ្ងៃទី ១៩ ខែមេសា៕