UN បង្ហាញសុទិដ្ឋិនិយមលើក្រុមជួយសង្គ្រោះនៅក្នុងប្រទេសមីយ៉ាន់ម៉ា បន្ទាប់ពីគ្រោះរញ្ជួយដីកម្រិត ៧. ៧ រិចទ័រ
UN បង្ហាញសុទិដ្ឋិនិយមលើក្រុមជួយសង្គ្រោះនៅក្នុងប្រទេសមីយ៉ាន់ម៉ា បន្ទាប់ពីគ្រោះរញ្ជួយដីកម្រិត ៧. ៧ រិចទ័រ
មីយ៉ាន់ម៉ា៖ អង្គការសហប្រជាជាតិ (UN) កាលពីថ្ងៃទី ១ ខែមេសា បានផ្តល់ព័ត៌មានពីការបង្ហាញនូវសុទិដ្ឋិនិយមលើកិច្ចខិតខំប្រឹងប្រែងរបស់ក្រុមជួយសង្គ្រោះមនុស្សធម៌ដែលកំពុងបន្តនៅក្នុងប្រទេសមីយ៉ាន់ម៉ា បន្ទាប់ពីគ្រោះរញ្ជួយដីកម្រិត ៧.៧ រិចទ័រ។
អ្នកសម្របសម្រួលអង្គការសហប្រជាជាតិ និងមនុស្សធម៌នៅក្នុងប្រទេសមីយ៉ាន់ម៉ា លោក Marcoluigi Corsi បានរាយការណ៍ថា ការផ្តល់ជំនួយកំពុងដំណើរការដោយរលូនដោយគ្មានឧបសគ្គខ្លាំងក្លានោះទេ ។
ចំណែក លោកស្រី Julia Rees នាយករងអង្គការយូនីសេហ្វ បាននិយាយថា តម្រូវការមានច្រើន និងកំពុងកើនឡើងតាមម៉ោង។ គ្រួសារកំពុងប្រឈមនឹងការខ្វះខាតទឹកស្អាត ស្បៀងអាហារ និងការផ្គត់ផ្គង់វេជ្ជសាស្ត្រយ៉ាងធ្ងន់ធ្ងរ។
លោកស្រីបន្តថា បញ្ហារបួសផ្លូវចិត្តគឺមានការើនឡើងច្រើនណាស់ជាពិសេសគឺ សម្រាប់កុមារដែលធ្លាប់ឆ្លងកាត់នូវបញ្ហានេះ និងការផ្លាស់ទីលំនៅ ។ គ្រោះមហន្តរាយនេះបានបន្ថែមនូវការភ័យខ្លាច និងការបាត់បង់មួយទៀត។
ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានកត់សម្គាល់ថា ក្រុមស្វែងរក និងជួយសង្គ្រោះក្នុងស្រុក គាំទ្រដោយអង្គភាពអន្តរជាតិ កំពុងបង្កើនកិច្ចខិតខំប្រឹងប្រែង ជាពិសេសនៅភាគកណ្តាលនៃប្រទេសមីយ៉ាន់ម៉ា ដែលបន្តជួបប្រទះនឹងការរញ្ជួយដី។
លោកវេជ្ជបណ្ឌិត Fernando Thushara តំណាងអង្គការសុខភាពពិភពលោក (WHO) ប្រចាំប្រទេសមីយ៉ាន់ម៉ាថ្លែងា កន្លែងថែទាំសុខភាពក្នុងរដ្ឋធានី Nay Pyi Taw មានច្រើនលើសលប់។ កង្វះអគ្គិសនី ប្រេងឥន្ធនៈ និងទឹកស្អាតកំពុងរារាំងដល់កិច្ចខិតខំប្រឹងប្រែងព្យាបាល និងបង្កើនហានិភ័យនៃការផ្ទុះឡើងនៃជំងឺ។
ទន្ទឹមនឹងនេះ សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC) បានព្រមានថា សីតុណ្ហភាពឡើងដល់ 40°C កំពុងរារាំងដល់ប្រតិបត្តិការជួយសង្គ្រោះ។ អង្គការនេះបានស្នើកញ្ចប់ជំនួយដែលមានតម្លៃ ១១៣ លានដុល្លារអាមេរិក ដើម្បីជួយដល់បុគ្គលដែលរងផលប៉ះពាល់ប្រមាណ ១00,000 ។
ស្ថានភាពនៅក្នុងប្រទេសមីយ៉ាន់ម៉ាគឺធ្ងន់ធ្ងរខ្លាំងណាស់ ដោយមនុស្សជាង ២,០៥០នាក់ត្រូវបានរាយការណ៍ថាបានស្លាប់ ជាង ៣,៩00 នាក់បានរងរបួស និង ២៧០ នាក់កំពុងបាត់ខ្លួន។ ទោះជាយ៉ាងណាក៏ដោយ ចំនួនអ្នកស្លាប់ត្រូវបានគេរំពឹងថានឹងកើនឡើង ខណៈដែលតំបន់ជាច្រើននៅតែឯកោ ហើយការទំនាក់ទំនងត្រូវបានបាត់បង់បន្ទាប់ពីគ្រោះមហន្តរាយនេះ៕
