ចំណាយសម្រាប់ទ័ពជើងទឹកអាមេរិកនឹងកើនឡើងទៅដល់ ២៥៦ពាន់លានដុល្លារនៅឆ្នាំក្រោយ
ចំណាយសម្រាប់ទ័ពជើងទឹកអាមេរិកនឹងកើនឡើងទៅដល់ ២៥៦ពាន់លានដុល្លារនៅឆ្នាំក្រោយ
បរទេស ៖ កងកម្លាំងកងទ័ពជើងទឹករបស់សហរដ្ឋអាមេរិក ឬ The Navy and Marine Corps នឹងអាចទទួលបានកញ្ចប់ថវិកាសម្រាប់ចំណាយយោធាកើនឡើងក្នុងទំហំ១១ពាន់លានដុល្លារធៀបទៅនឹងការចំណាយសម្រាប់ឆ្នាំ២០២៣នេះនៅក្នុងផែនការសម្រាប់ឆ្នាំ២០២៤។
វាគឺជាខ្ទង់ចំណាយមួយដែលស្ថិតជាផ្នែកមួយនៃខ្ទង់ចំណាយប្រចាំឆ្នាំដ៏ច្រើនបំផុតក្នុងប្រវត្តិសាស្ត្ររបស់អាមេរិកក្រោមការដឹកនាំរបស់លោកប្រធានាធិបតី Joe Biden ដែលអាមេរិកគ្រោងនឹងចំណាយថវិកាសម្រាប់វិស័យការពារជាតិទាំងអស់ដល់ទៅ ៨៤២ពាន់លានដុល្លារសម្រាប់ឆ្នាំ២០២៤។
យោងតាមការចេញផ្សាយដោយ The Defense News កាលពីថ្ងៃម្សិលមិញនេះបានឲ្យដឹងថាសេតវិមាននឹងធ្វើការស្នើសុំបង្កើនប្រាក់ចំណាយសម្រាប់កងកម្លាំងយោធាជើងទឹកអាមេរិកពី២៤៤,៧ពាន់លានដុល្លារដែលមានសម្រាប់ឆ្នាំ២០២៣នេះទៅដល់ ២៥៦ពាន់លានដុល្លារនៅក្នុងឆ្នាំ២០២៤ខាងមុខដែលថវិកាភាគច្រើននឹងយកទៅប្រើប្រាស់ក្នុងការបង្កើនសមត្ថភាពការពារដែនសមុទ្រដែលមានដូចជាការធ្វើទំនើបកម្មនាវាចម្បាំងនានាបូករួមទាំងនាវាមុជទឹកនិងក៏ដូចជាកិច្ចការងារអភិវឌ្ឍនិងស្រាវជ្រាវថ្មីៗផងដែរ។
គួរឲ្យដឹងដែរថា ក្រៅតែពីថវិកាជាតិសម្រាប់កងទ័ពជើងទឹកហើយនោះគេក៏បានសង្កេតឃើញដែរថាកងកម្លាំងទ័ពអាកាសនិងទីអវកាសអាមេរិកនឹងទទួលបានថវិកាសម្រាប់ចំណាយបូកបញ្ចូលគ្នាទៅដល់ ២៥៩,៤ពាន់លានដុល្លារហើយកងកម្លាំងទ័ពជើងគោកអាមេរិកនឹងទទួលបាន ១៨៥ពាន់លានដុល្លារ៕
