ANDRES NIETO និង GOSELINK កំពុងប្រជែងពានស្បែកជើងមាស នៅលីគកំពូលកម្ពុជា

ANDRES NIETO និង GOSELINK កំពុងប្រជែងពានស្បែកជើងមាស នៅលីគកំពូលកម្ពុជា

ការប្រកួតជម្រើសជើងឯកលីគកំពូលកម្ពុជា ឬខេមបូឌានព្រីមៀរលីគ គិតត្រឹមសប្ដាហ៍ទី២៤ ខ្សែប្រយុទ្ធចំនួន ២រូបរបស់ក្លិបបាល់ទាត់សឹងក្រហមភ្នំពេញក្រោន កំពុងប្រជែងគ្នាគ្រងដំណែងស្បែកជើងមាស រដូវកាលនេះ។

ក្រឡែកទៅមើលតារាងកីឡាករស៊ុតបញ្ជូលទីបានច្រើនជាងគេ (Top Scorer) គិតត្រឹមសប្ដាហ៍ទី ២៤នេះ កីឡាករ RAFAEL ANDRES NIETO និង JELLE JOOST GOSELINK របស់ភ្នំពេញក្រោន កំពុងកាន់កាប់តំណែងកំពូលតារាងមាន ១៦គ្រាប់ដូចគ្នា តាមពីក្រោយដោយកីឡាករ Ramon Souza របស់វិសាខា និងកីឡាករ Roque Silveira Dos Santo របស់ព្រះខ័នរាជស្វាយរៀង មាន ១៤គ្រាប់ដូចគ្នា។

ចំណែកកីឡាករ Josemar Balanga របស់កងយោធពលខេមរភូមិន្ទ ដែលកំពុងរបួស មានចំនួន ១៣គ្រាប់ ខណៈកីឡាករ សៀង ចន្ធា របស់បឹងកេត, PABLO AUGUST របស់ព្រះខ័នរាជស្វាយរៀង និងកីឡាករ Minagawa Yusuke របស់ណាហ្គាវើលដ៍ មាន ១២គ្រាប់ដូចគ្នា។

ចំពោះកីឡាករខ្មែរស៊ុតបញ្ជូលទីបានច្រើនជាងគេ គិតត្រឹមសប្ដាហ៍ទី២៤នេះ គឺកីឡាករ សៀង ចន្ធា របស់បឹងកេត មាន ១២គ្រាប់ តាមពីក្រោយដោយកីឡាករវិសាខា ស រតនា និងកីឡាករ ម៉ាត់ នូរុណ មាន ៨គ្រាប់ដូចគ្នា ខណៈកីឡាករ ហៅ សុនេត្រ និងកាន់ ម៉ូ មាន ៧គ្រាប់ដូចគ្នា។

រីឯកីឡាករដែលបញ្ជូនបាល់ឲ្យមិត្តិរួមក្រុមស៊ុតបញ្ជូលទីច្រើនជាងគេ គឺកីឡាករ អ៊ុក សុវណ្ណ របស់វិសាខា Assist បាន ១៧ដង តាមពីក្រោយដោយកីឡាករ លឹម ពិសុទ្ធ Assist បាន ១២ដង ខណៈកីឡាករ YOSHIHAMA RYOHEI របស់បឹកេត Assist បាន ១០ដង។

គួរបញ្ជាក់ថា គិតត្រឹមសប្ដាហ៍ទី២៤នេះ កីឡាកររបស់ព្រះខ័នរាជស្វាយរៀង វីរៈ ដារ៉ា គឺជាអ្នកចាំទី ដែលការពារមិនអោយបាល់ចូលទីច្រើនជាងគេ ដោយរក្សា Clean Sheets ចំនួន ១១ដង ខណៈអ្នកចាំទីរបស់អង្គរថាយហ្គឺរ យី ប៊ុនហេង រក្សា Clean Sheets ចំនួន ៩ដង៕