បច្ចេកវិទ្យា VAR នឹងត្រូវដាក់ឲ្យប្រើប្រាស់នៅ AFF Cup 2024 នេះ

បច្ចេកវិទ្យា VAR នឹងត្រូវដាក់ឲ្យប្រើប្រាស់នៅ AFF Cup 2024 នេះ

(បាល់ទាត់)៖ សហព័ន្ធកីឡាបាល់ទាត់អាស៊ីអាគ្នេយ៍ ហៅកាត់ថា AFF បានសម្រេចចិត្តអនុវត្តបច្ចេកវិទ្យាវីដេអូជំនួយការអាជ្ញាកណ្តាល ឬ Video Assistant Referee (VAR) នៅក្នុងការប្រកួត AFF Cup ឆ្នាំនេះ។

កាលពីខែកក្កដា កន្លងទៅ ប្រធាន AFF លោក ខៀវ សាម៉េត បានបញ្ជាក់ថា VAR កំពុងផ្លាស់ប្តូរបាល់ទាត់ និងក្លាយជាបច្ចេកវិទ្យាដ៏សំខាន់បំផុតមួយ ដើម្បីលើកកំពស់គុណភាពនៃការប្រកួតទៅកាន់កម្រិតថ្មីមួយ។ ទោះបីជាយ៉ាងណាក៏ដោយ នៅពេលនោះ មិនច្បាស់ថា នៅដំណាក់កាលណា ដែល VAR នឹងត្រូវប្រើប្រាស់នោះទេ។

ប៉ុន្តែកាលពីសប្ដាហ៍មុន AFF បានប្រកាសប្រើប្រាស់អនុវត្តបច្ចេកវិទ្យានេះទៅគ្រប់ការប្រកួតទាំងនៅ នៅក្នុងការប្រកួតជើងឯកអាស៊ីអាគ្នេយ៍ឆ្នាំនេះ។ ប្រព័ន្ធនេះ នឹងត្រូវបានគ្រប់គ្រងដោយភាគីទីបី ហើយនឹងមិនប្រើប្រាស់ធនធានដែលមាននៅក្នុងប្រទេសសមាជិកឡើយ ដែលមានន័យថា មន្រ្តីគ្រប់គ្រង VAR មកពីប្រទេសក្រៅពីតំបន់អាស៊ាន។ បើតាមការបញ្ជាក់របស់ AFF ការប្រកួតនីមួយៗក្នុងវគ្គចែកពូលនឹង មានកាមេរ៉ាចំនួន ១០គ្រាប់ ហើយចាប់ពីវគ្គពាក់កណ្តាលផ្តាច់ព្រ័ត្រ វានឹងកើនឡើងដល់ ១២គ្រាប់។

មែនទែនទៅ VAR ត្រូវបានគេលើកឡើងជាច្រើនឆ្នាំមកហើយ ក្នុងពាន AFF Cup។ នៅឆ្នាំ ២០២១ បន្ទាប់ពីការប្រកួតពាក់កណ្តាលផ្តាច់ព្រ័ត្រដ៏ចម្រូងចម្រាស រវាង វៀតណាម និងថៃ។ សហព័ន្ធកីឡាបាល់ទាត់វៀតណាម និងគ្រូបង្វឹក Park Hang-seo បានស្នើឱ្យ AFF ប្រើប្រាស់ VAR ក្នុងការប្រកួតនៅឆ្នាំក្រោយ តែទោះយ៉ាងណាក៏ដោយ ត្រឹមការប្រកួតឆ្នាំ ២០២២ បច្ចេកវិទ្យានេះ មិនត្រូវបានប្រើប្រាស់ទេ។

ទោះបីជាត្រូវបានចាត់ទុកថា ជាឧបករណ៍មួយ ដើម្បីជួយអាជ្ញាកណ្តាលក្នុងការធ្វើការសម្រេចចិត្តត្រឹមត្រូវ ស៊ីសង្វាក់គ្នា និងត្រឹមត្រូវក៏ដោយ VAR ទាមទារបញ្ហាជាច្រើនទាក់ទងនឹងការចំណាយ បច្ចេកវិទ្យា ក៏ដូចជាការអនុញ្ញាតពី FIFA ។ លើសពីនេះ អាជ្ញាកណ្តាលជាច្រើនមិនស៊ាំនឹងការប្រើប្រាស់បច្ចេកវិទ្យានេះទេ ទាំងនៅលើទីលាន និងនៅក្នុងបន្ទប់ VAR។

នៅឆ្នាំនេះ AFF បានអនុវត្តជាបណ្តើរៗនូវ VAR ក្នុងការប្រកួតនានាដូចជា ជើងឯកអាស៊ីអាគ្នេយ៍ U19 ឬជើងឯកក្លឹបអាស៊ីអាគ្នេយ៍។ គំនិតផ្តួចផ្តើមនេះ គឺជាពេលវេលាដ៏សំខាន់មួយក្នុងការលើកកម្ពស់ស្តង់ដារផ្លូវការនៃការប្រកួតបាល់ទាត់លំដាប់ថ្នាក់កំពូលក្នុងតំបន់។

ក្នុងការប្រកួត AFF Cup 2024 នេះ ក្រុមគោព្រៃកម្ពុជា ស្ថិតនៅក្នុងពូល A ជាមួយ ក្រុមជម្រើសជាតិថៃ ម៉ាឡេស៊ី សិង្ហបុរី និងទីម័រខាងកើត។ ក្នុងពូល B មាន វៀតណាម ឡាវ ឥណ្ឌូនេស៊ី ហ្វីលីពីន និងមីយ៉ាន់ម៉ា។

គួរបញ្ជាក់ថា ពានរង្វាន់ ASEAN Mitsubishi Electric Cup នឹងប្តូរឈ្មោះទៅជា ASEAN Cup ចាប់ពីឆ្នាំ 2024 តទៅ។ សម្រាប់ឆ្នាំនេះ មានក្រុមចំនួន ១០ក្រុម ចែកចេញជាពីរពូល(A និង B)។ ក្រុមនីមួយៗ នឹងលេងការប្រកួតក្នុងផ្ទះ និងក្រៅដីចំនួនពីរ ដើម្បីយក២ក្រុម ក្នុងមួយពូល លេងវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។