Ronaldo នឹងទទួលបានរង្វាន់ដ៏ពិសេសពីប្រធាន UEFA
Ronaldo នឹងទទួលបានរង្វាន់ដ៏ពិសេសពីប្រធាន UEFA
(បាល់ទាត់)៖ អតីតកីឡាករក្រុមអធិរាជស Real Madrid កីឡាករ Cristiano Ronaldo ដែលជាអ្នកស៊ុតបញ្ចូលទីច្រើនជាងគេគ្រប់ពេលនៅ UEFA Champions League នឹងទទួលបានរង្វាន់ពិសេសពីប្រធាន UEFA លោក Aleksander Čeferin ក្នុងការទទួលស្គាល់កេរ្តិ៍ដំណែលដ៏អស្ចារ្យរបស់គាត់ នៅក្នុងការប្រកួតដ៏មានកិត្យានុភាពបំផុតរបស់ពិភពលោក។
សមិទ្ធិផលរបស់ Ronaldo នៅក្នុងការប្រកួតក្លឹបលំដាប់កំពូលរបស់ទ្វីបអឺរ៉ុប ក្នុងរយៈពេលជាង ១៨ឆ្នាំ នឹងត្រូវបានទទួលស្គាល់ក្នុងការចាប់ឆ្នោតវគ្គចែកពូល UEFA Champions League 2024/25 ដែលនឹងប្រព្រឹត្តទៅនៅថ្ងៃព្រហស្បតិ៍ ទី ២៩ ខែសីហា នៅ Monaco។
Ronaldo ស៊ុតបញ្ចូលទីបាន ១៤០គ្រាប់ នៅ Champions League ក្នុងការបង្ហាញខ្លួន ១៨៣ប្រកួត សម្រាប់ Manchester United, Real Madrid និង Juventus។ Ronaldo មាន ១១គ្រាប់ នាំមុខគូរប្រជែង Lionel Messi និង ៤៦គ្រាប់នាំមុខ Robert Lewandowski ចំណាត់ថ្នាក់លេខ៣ នៅកំពូលតារាងពិន្ទុ។
ប្រធាន UEFA លោក Aleksander Čeferin បាននិយាយនៅក្នុងសេចក្តីថ្លែងការណ៍មួយថា៖« Cristiano Ronaldo គឺជាកីឡាករដ៏អស្ចារ្យបំផុតនៅ UEFA Champions League ។ សមិទ្ធិផលស៊ុតបញ្ចូលទីដ៏វិសេសវិសាលរបស់គាត់នៅក្នុងការប្រកួតនេះ ហាក់បីដូចជាមានគោលដៅ ដើម្បីឈរលើការសាកល្បងនៃពេលវេលា ដែលបង្កឱ្យមានការប្រកួតប្រជែងដ៏គួរឱ្យកត់សម្គាល់ សម្រាប់មនុស្សជំនាន់ក្រោយដើម្បីយកឈ្នះ។ ភាពល្អឥតខ្ចោះរបស់គាត់នៅកម្រិតខ្ពស់បំផុតគឺជាសក្ខីភាពមួយចំពោះការខិតខំប្រឹងប្រែងឥតឈប់ឈររបស់គាត់ ទាំងក្រុម និងកិត្តិយសបុគ្គល។ ជាងពីរទសវត្សរ៍មក គាត់បានវិវត្តន៍ជាបន្តបន្ទាប់ និងកែលម្អហ្គេមរបស់គាត់ ខណៈពេលដែលរក្សានូវចំណង់ចំណូលចិត្តវ័យក្មេងសម្រាប់ការស៊ុតបញ្ចូលទី និងអបអរគ្រាប់បាល់។ វិជ្ជាជីវៈរបស់គាត់ ក្រមសីលធម៌ការងារ ការយកចិត្តទុកដាក់ និងសមត្ថភាពក្នុងការបញ្ចេញពន្លឺនៅលើឆាកដ៏អស្ចារ្យបំផុត គឺជាគុណសម្បត្តិដែលកីឡាករបាល់ទាត់គ្រប់ទីកន្លែងគួរប្រាថ្នាចង់ធ្វើត្រាប់តាម»។
Ronaldo បានបញ្ចប់រដូវកាល Champion League ចំនួនប្រាំពីរដាច់ដោយឡែកពីគ្នាក្នុងនាមជាអ្នកស៊ុតបញ្ចូលទីច្រើនជាងកីឡាករណាៗទាំងអស់ ដែលរាប់ចាប់ពីគ្រាប់បាល់ចំនួន ៨គ្រាប់របស់គាត់ ក្នុងយុទ្ធនាការជ័យជំនះរបស់ Manchester United រដូវកាល ២០១៧-១៨ រហូតដល់ការរកបាន ១៥គ្រាប់ នៅពេលដែល Real Madrid ឈ្នះពានរង្វាន់ទីបីជាប់ៗគ្នា ក្នុងរដូវកាល ២០១៧-១៨។
Ronaldo ក៏មានកំណត់ត្រារកគ្រាប់បាល់បានច្រើនបំផុត ក្នុងរដូវកាល Champions League តែមួយ ដែលរកបាន១៧គ្រាប់ ក្នុងឆ្នាំ២០១៣/១៤ រួមទាំងការឈ្នះក្នុងម៉ោងបន្ថែមទល់នឹង Atlético de Madrid នៅវគ្គផ្ដាច់ព្រ័ត្រ។ សរុបមក Ronaldo បានឈ្នះពាន UCL នេះ ចំនួន ៥ដង ពោលគឺ Manchester United ១ដង និង Real Madrid ៤ ដង ហើយជាកីឡាករតែមួយគត់រហូតមកដល់បច្ចុប្បន្ន ដែលបានស៊ុតបញ្ចូលទីនៅវគ្គផ្តាច់ព្រ័ត្រ UEFA Champions League បីផ្សេងគ្នា (២០០៨, ២០១៤, ២០១៧)៕
