ម៉ាឡេស៊ីផ្អាកនាំចូលបង្គា ៥ ប្រភេទពីថៃ ខណៈនាយករដ្ឋមន្ត្រីបញ្ជាឱ្យចរចាបន្ទាន់

ម៉ាឡេស៊ីផ្អាកនាំចូលបង្គា ៥ ប្រភេទពីថៃ ខណៈនាយករដ្ឋមន្ត្រីបញ្ជាឱ្យចរចាបន្ទាន់

បាងកក៖​ ការផ្អាកជាបណ្តោះអាសន្នរបស់ប្រទេសម៉ាឡេស៊ីលើការនាំចូលបង្គា ៥ ប្រភេទពីប្រទេសថៃ បានជំរុញឱ្យលោកនាយករដ្ឋមន្ត្រី Anutin Charnvirakul បញ្ជាឱ្យមានការចរចាជាបន្ទាន់ ដើម្បីកាត់បន្ថយផលប៉ះពាល់ដល់កសិករចិញ្ចឹមបង្គា និងអ្នកនាំចេញ។

វិធានការគ្រប់គ្រងការនាំចូលនេះបានចូលជាធរមាននៅថ្ងៃទី១ ខែមិថុនា ដោយគ្របដណ្តប់លើបង្គា ៥ ប្រភេទ រួមមាន បង្គាជើងស បង្គាខ្លាធំ បង្គាខ្លាពណ៌ត្នោត បង្គាចេក និងបង្គាពណ៌ខៀវ។ ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី២ ខែមិថុនា លោក Anutin បានណែនាំក្រសួងពាណិជ្ជកម្ម និងក្រសួងកសិកម្ម ឱ្យចូលរួមពិភាក្សាជាមួយអាជ្ញាធរម៉ាឡេស៊ី និងស្វែងរកដំណោះស្រាយ។

ភាគីម៉ាឡេស៊ីបានបញ្ជាក់ថា ការផ្អាកនេះនឹងបន្តអនុវត្តរហូតដល់អាជ្ញាធរថៃផ្តល់ការឆ្លើយតបពេញលេញចំពោះកម្រងសំណួរពាក់ព័ន្ធនឹងសុវត្ថិភាពចំណីអាហារ បន្ទាប់មកវិធានការនេះនឹងត្រូវបានពិនិត្យឡើងវិញ។

ទន្ទឹមនឹងនេះ ប្រព័ន្ធផ្សព្វផ្សាយម៉ាឡេស៊ីបានរាយការណ៍ថា វិធានការនេះក៏ជាការឆ្លើយតបទៅវិញទៅមកមួយផ្នែក ចំពោះការរឹតបន្តឹងរបស់ប្រទេសថៃលើការនាំចូលបង្គាមួយចំនួនពីប្រទេសម៉ាឡេស៊ីផងដែរ។

រដ្ឋាភិបាលថៃបានព្រមានថា ប្រសិនបើការផ្អាកនេះអូសបន្លាយរយៈពេលយូរ វាអាចប៉ះពាល់ដល់កសិករចិញ្ចឹមបង្គា អ្នកនាំចេញ និងឧស្សាហកម្មនេសាទ ជាពិសេសនៅតាមបណ្តាខេត្តភាគខាងត្បូង ដែលជាតំបន់ប្រមូលផ្តុំនៃការចិញ្ចឹមបង្គា។ លើសពីនេះ វាក៏អាចជំរុញឱ្យតម្លៃបង្គានៅកសិដ្ឋានធ្លាក់ចុះផងដែរ។

ជាមួយគ្នានេះ អាជ្ញាធរពាក់ព័ន្ធត្រូវបានបញ្ជាឱ្យរៀបចំវិធានការគាំទ្រ រួមមានការទប់ស្កាត់ការធ្លាក់ចុះតម្លៃ ការគ្រប់គ្រងការផ្គត់ផ្គង់បង្គាបន្ថែមដែលអាចត្រូវបានបង្វែរទៅកាន់ទីផ្សារក្នុងស្រុក និងការពង្រីកទីផ្សារនាំចេញជំនួស ដើម្បីកាត់បន្ថយផលប៉ះពាល់ដល់វិស័យនេះ៕